Stap Lukaotgud long Laef

Samtaem, proteksen blong laef i save kam wetem bigfala hadtaem mo wari blong no stap sua long ol samting.

Plante taem tu toktok i joen wetem tabu fasin ia blong bon i kam long wol: laef mo joes. Laef hem i wan spesel pat blong plan blong Papa blong yumi we i stret evriwan, mo tru long raet blong Hem, yumi lukaotgud long laef; mo yumi jusum blong laef ia i gohed taem hem i stat insaed long bel blong mama. Yumi lukaotgud tu long presen blong joes blong jusum raet mo rong—blong help blong mekem ol raet joes we God i apruvum, mo i karem glad we i no save finis. …

Blong stap lukaotgud mo protektem laef we i no bon yet i no wan samting blong politik. Hem i wan loa blong laef we i kam long Lod tru long ol profet blong Hem.

… Letem yumi toktok moa wetem fet mo sore long ol yut blong yumi insaed long ol hom, mo wetem wanwan long yumi insaed long ol miting blong Rilif Sosaeti mo kworom blong ol elda, abaot loa blong Lod we i jastiti, laef we i tabu, mo wari blong yumi long ol laef we oli no bon yet mo ol mama blong olgeta. …

Long eniwan we i stap lisin mo i bin eksperiensem bigfala harem nogud mo rigret from hem i bin gat o tekpat long wan abosen, plis tingbaot: Nomata we yumi no save jenisim samting we i pas, God i save hilim wanem we i pas. Fogivnes i save kam tru long merikel blong sakrifaes blong Atonmen blong Hem, taem yu lukluk long Hem wetem wan hat we i stap daon mo wantem sakem sin.

Ol dia brata mo sista blong mi, lav blong ol pikinini we oli no bon yet raon long wol, i stap go smol, mo hem i wan bigfala wari. God i lukaotgud long laef. Hem i wok mo glori blong Hem blong mekem ol pikinini blong Hem i nomo save ded mo kasem laef we i no save finis. Olsem ol disaepol blong Kraes, yumi lukaotgud long laef.