Stap Lukaotgud long Laef

Hem i gohed se: “Mi bin kasem fulap lav mo sapot long wod mo famli blong mi. Lav ia i bin bigwan tumas. Bisop [blong mi] mo presiden blong Ol Yang Woman oli bin mekem fulap samting blong soem lav mo sapot blong tufala. … Mi bin luk han blong Lod … i stap lidim mi mo famli blong mi. … Wan wod olsem hemia blong mi, i famli ia we evriwan i nidim, speseli wan yang woman long situesen blong mi.”

Yang woman ia, famli blong hem, mo wod blong hem, i bin welkamem bebi boe blong gel ia long Febwari we i pas ia.

Presiden Russell M. Nelson i talem: “Wan hae mak long Jos ia we i tru mo i laef we i blong Lod, i we, oltaem hem i oganaes … wok blong givhan long wanwan pikinini blong God … [stap givhan wetem lav mo kaen fasin] long wan ia, semmak olsem we hem i bin mekem.”

Taem wan singgel woman i faenemaot se bae hem i bonem wan bebi we hem i no plan from, helt i kam wan wari, hem i konfius long saed blong spirit, i sem, i wari long mane, i gat ol kwestin abaot skul, i no sua abaot mared, mo i harem nogud tumas from ol drim we hem i bin gat. Mo hemia i save lidim hem blong mekem ol samting we bae hem i harem nogud plante from mo rigretem taem hem i stap filim ol samting ia.

Long eniwan we i stap lisin mo i bin eksperiensem bigfala harem nogud mo rigret from hem i bin gat o tekpat long wan abosen, plis tingbaot se, “Nomata we yumi no save jenisim samting we i pas, God i save hilim wanem we i pas.” Fogivnes i kam tru long merikel blong sakrifaes blong Atonmen blong Hem, taem yu lukluk long Hem wetem wan hat we i stap daon mo wantem sakem sin.

Plante taem tu toktok i joen wetem tabu fasin ia blong bon i kam long wol: laef mo joes. Laef hem i wan spesel pat blong plan blong Papa blong yumi we i stret evriwan, mo tru long raet blong Hem, yumi lukaotgud long laef; mo yumi jusum blong laef ia i gohed taem hem i stat insaed long bel blong mama. Yumi lukaotgud tu long presen blong joes blong jusum raet mo rong, help blong mekem ol raet joes we God i apruvum, mo i karem glad we i no save finis.

Taem wan woman mo man i gotru long wan impoten taem olsem we oli mas mekem wan impoten joes; ol toktok, han, mo hat blong yumi long saed blong spirit, filing mo mane—i save blesem olgeta blong filim lav blong Sevya mo olsem we Presiden Henry B. Eyring i bin talem, blong mekem oli andastanem samting long saed blong spirit, stat long “wanem we oli ting we oli stap luk” go kasem “wanem we oli no stap luk yet.”

Presiden Dallin H. Oaks i bin talem: “Lukluk blong yumi abaot abosen i no folem save ia we yumi kasem taem yumi save se laef long wol ia i stat. … Lukluk ia i stanap long save blong yumi se … evri spirit pikinini blong God i mas kam long wol ia from wan stamba tingting blong glori, mo we aedentiti blong wanwan i stat longtaem bifo oli kam insaed long bel blong mama, mo bae hem i gohed blong evri taem we i no save finis, we i stap kam yet.”

Toktok blong Lod abaot ol laef we oli no bon yet, we i kam tru long voes blong Fas Presidensi mo Kworom blong Olgeta Twelef Aposol, i neva defdefren mo i stap ripitim ol toktok blong ol profet blong bifo finis i kam, mo i givim wan klia tingting mo tabu lukluk abaot wanem Lod i stap askem blong yumi mekem.

“Jos blong Jisas Kraes blong Ol Lata-dei Sent i biliv se laef blong man i tabu mo i kam long God. From hemia, Jos i agensem fasin blong save jusum abosen wetem tingting blong gat gudlaef mo from wan sosol risen, mo i stap givim kaonsel long ol memba blong Jos blong no tekem abosen, mo mekem abosen, mo no leftemap tingting blong gat abosen, no pem abosen, mo no arenjem blong abosen i tekples.

“Ol taem nomo we [Lod i letem] hemia i posibol i taem we:

• Woman i gat bel from oli fosem hem tru long rep o fasin blong inses (taem wan memba blong famli i tekem stret memba blong famli bakegen), o

• Wan dokta we i gat raet, i talem se laef o helt blong mama i stap long bigfala denja, o

• Wan dokta we i gat raet, i talem se smol bebi ia, we i smol nomo yet i stap i gat plante problem mo bae i no letem bebi ia blong i laef afta we hem i bon i kam long wol ia.”

Fas Presidensi i gohed blong talem: Abosen i wan series problem. [Iven long ol situesen ia we i no stap hapen oltaem] oli save tingting long hem nomo afta we ol pipol we oli responsibol oli kasem konfemesen we i kam tru long prea” mo oli kaonsel wetem ol narawan.

Teti yia i pas, ol profet blong Lod oli bin givimaot wan ofisol toktok i go long wol. I tekem tu ol toktok ia:

“Mifala i … talemaot se God i givim komanmen ia se tabu paoa blong mekem pikinini i mas tekem ples nomo bitwin man mo woman we tufala i bin mared folem loa olsem hasban mo waef.

Mifala i stap talemaot naoia se fasin we oli mekem laef long wol ia, hem i kam long God. Mifala i stap talemaot trutok ia se laef hem i tabu mo hem i impoten insaed long plan ia blong God we i no save finis.”

Blong stap lukaotgud mo protektem laef we i no bon yet i no wan samting blong politik. Hem i wan loa blong laef we i kam long Lod tru long ol profet blong Hem.

Wan toktok we Presiden J. Reuben Clark Jr., we i bin stap long Fas Presidensi, i tokbaot gud ol yut blong yumi tedei se: “Ol yut blong Jos oli hanggri from ol samting blong Spirit; oli wantem tumas blong lanem gospel, mo oli wantem long wan wei we i kam stret mo klin, mo i no miks. Oli wantem blong save abaot … ol bilif blong yumi; oli wantem kasem wan testemoni blong ol trutok ia. Oli ol … yut blong askem kwestin mo stap lukaotem trutok.” Letem yumi toktok moa wetem fet mo sore long ol yut blong yumi insaed long ol hom, mo insaed long ol miting blong Rilif Sosaeti mo kworom blong ol elda, abaot loa blong Lod we i jastiti, laef we i tabu, mo wari blong yumi long ol laef we oli no bon yet mo ol mama blong olgeta.

Wan dia sista i bin raet long mi abaot wan eksperiens we hem i bin gat plante yia i pas: “Olsem wan we i gat 17 yia, mi faenemaot se mi gat bel mo boefren blong mi i no sapotem mi nomo. Mi filim sem mo we mi stap miwan [be mi] neva tingting long [wan abosen]. … Mi [bin gat] famli blong mi we i lavem mi mo bisop, we mitufala i stap mit oltaem blong hem i lidim mi. … Mi bin lukluk long God. Mi bin stadi ol skripja … mo prea [mo] faenem paoa tru long Sevya blong mi mo long rod ia blong fasin blong sakem sin. … Mi bin kasem wan ansa [long ol prea blong mi] we mi no save tanem baksaed long hem. … I brekem hat blong mi, be mi save se bae mi mas lego gel blong mi blong oli adoptem. … Mi prea from strong tingting [mo] mi filim lav blong Sevya we i klia bigwan tru long fasin blong sakem sin, mi save God … i stap ansarem ol prea mo mekem yumi kam moa strong.”

Wan gudfala kapol i adoptem naesfala bebi gel ia mo tijim gospel long hem. Naoia hem i mared wetem wan famli blong hemwan.

Samtaem, proteksen blong laef i save kam wetem bigfala hadtaem mo wari blong no stap sua long ol samting.

I no longtaem i pas, wan yangfala kapol we mi mo Kathy i lavem, tufala i raet i kam long mi abaot spesel bebi ia we tufala stap wet blong i bon.

Papa ia i raetem se: “[Taem waef blong mi] i gat bel blong 10 wik, mifala i faenem se merikel bebi blong mitufala i gat sik we i pas long famli we i trisomi 21. Plante oli save olsem Daon Sindrom. Mitufala i bin filim plante wari … we i kam long medikol saed blong tingting blong karemaot bebi ia. Sam wik afta, mifala i faenemaot se … pikinini blong mitufala we i no bon yet … bae i nidim plante hat operesen long fas yia blong laef blong hem. Truaot long wokbaot ia, taem mitufala i prea from help we i kam antap, … mitufala i bin filim Spirit we i kamfotem mitufala. Mitufala i kasem revelesen mo andastaning se gel blong mitufala i wan spesel pikinini blong Papa long Heven mo hem i wantem tumas blong stap long famli blong mitufala mo kam long wol.”

Mama blong bebi ia i raetem: “[Mitufala] i sek, konfius mo harem nogud bigwan long nius ia. … Taem mi gat bel blong 14 wik, mitufala i faenem se bebi blong mitufala i gat plante hat problem, mo wan we bae i save karemaot laef blong hem. Mitufala i toktok wetem plante dokta mo speselis taem mi gat bel blong 10–18 wik. … Long evri apoenmen blong mitufala, oli askem mitufala sapos mitufala i wantem gohed blong gat bebi ia o blong kilimded. … Sevya i bin hilim hat blong mi mo i mekem mi mi filim pis mo glad abaot bebi gel blong mitufala. … [Papa long Heven] i bin soem long mi bakegen mo bakegen se Hem i gat wan plan we i stret evriwan blong mi [mo] mi trastem Hem.”

Tufala i welkamem bebi gel blong tufala wan wik i pas stret tedei. Hem i blong tufala mo tufala i blong hem blong oltaem.

Strong fet mo strong tingting oli ol fasin blong ol disaepol blong Jisas Kraes.

Truaot long ol yia, mi bin gat spesel janis blong mitim ol man mo woman we oli bin lukaotem blong kambak long kavenan rod mo ol prishud mo tempol blesing blong olgeta wetem tingting we i stap daon, afta long plante yia we oli lusum membasip blong olgeta.

Long wan situesen, mi bin mekem wan intaviu long wan man long bihaf blong Fas Presidensi, blong mekem restoresen blong ol prishud mo tempol blesing blong hem.

Afta we hem i bin mared long tabu tempol, mo gat tri naesfala pikinini, man ia i no fetful long waef blong hem mo ol tabu kavenan blong hem. Wan singgel woman i bin gat bel blong hem mo i wantem wan abosen.

Gudfala waef blong hasban ia i plis long woman ia blong bonem bebi ia mo hem i promesem blong lukaotem pikinini ia wetem ol pikinini blong hem, taem hem i bon.

Singgel woman ia i tingting gud mo agri blong gat bebi.

Naoia hem i 10 yia we i pas. Sista ia we i gat tingting we i stap daon, mo sidaon long fored blong mi, i bin lavem boe ia olsem pikinini blong hemwan mo i bin tokbaot ol traehad blong hasban blong hem blong mekem gud ol samting mo blong lavem mo kea long hem mo famli. Papa ia i stap krae taem sista ia i stap toktok.

?Olsem wanem nao hae woman ia blong God i save tekem pikinini ia olsem se hem i bonem mo pikinini ia save stap olsem wan rimaenda long hem evri dei abaot hasban blong hem we i no bin stap fetful? ?Olsem wanem? From se hem i faenem paoa tru long Jisas Kraes mo hem i biliv long laef se hem i tabu mo i kam long God. Hem i save se pikinini ia we i no bon yet hem i wan pikinini blong God, we i klin mo i nogat sin.

Ol dia brata mo sista blong mi, lav blong ol pikinini we oli no bon yet raon long wol, i stap go smol, mo hem i wan bigfala wari. God i lukaotgud long laef. Hem i wok mo glori blong Hem blong mekem ol pikinini blong Hem i nomo save ded mo i kasem laef we i no save finis. Olsem ol disaepol blong Kraes, yumi lukaotgud long laef. “Nao from we yufala i stap lavlavem yufala, bambae olgeta man oli luksave se yufala i man blong mi.” Letem yumi serem lav blong yumi i bigwan moa wetem olgeta we oli nidim yumi plante. Mi talemaot lav blong mi long yufala mo lav blong Papa long Heven from ol pikinini blong Hem we oli stap kam long wol. Long nem blong Jisas Kraes, amen.