No Mekem Hat Blong Yufala I Kam Strong

Restoresen blong gospel blong Jisas Kraes i bin stat taem God Papa mo Pikinini blong Hem i bin kamaot long yangfala Josef Smit, tru long prea blong hem wetem tingting i stap daon. Olsem pat blong Restoresen, Josef Smith i bin transletem wan histri blong bifo tru long presen mo paoa blong God. Histri ia i holem “ol wok blong God wetem ol man bifo we oli stap laef long ol Amerika mo i holem fulwan gospel ia we i no gat en.”

Taem mi bin wan yang boe, taem mi ridim Buk blong Momon, oltaem mi stap tingting se from wanem Laman mo Lemyul i no bin bilivim ol trutok we oli bin givim long tufala, nomata wan enjel blong Lod i bin kamaot mo toktok stret long tufala. ?From wanem Laman mo Lemyul i no save stap putum tingting blong tufala i stap daon moa mo stap obei long ol tijing blong papa blong tufala, Lihae mo smol brata blong tufala Nifae?

Mi bin faenem wan long ol ansa blong kwestin ia insaed long 1 Nifae, we i talem se Nifae i bin “harem nogud from hat blong tufala i strong.” Nifae i askem ol bigfala brata blong hem se, “?Olsem wanem nao yutufala i strong long hat blong yutufala, mo yutufala i blaen long ol tingting blong yutufala?”

?Hem i minim wanem blong gat wan strong hat?

Toktok ia “strong” long lanwis blong Koria insaed long Buk blong Momon hem i 완악 (Wan-Aak: 頑惡). Ol toktok ia oli yusum ol Jaenis raeting ia “Wan” (頑), we i minim “stronghat,” mo “Aak” (惡), i minim “fasin nogud.” Taem yumi mekem hat blong yumi i strong, yumi blaen, mo ol gudfala samting oli no save kam insaed long hat o maen blong yumi. Bae yumi gat stronghat mo tingting blong hat blong yumi i stap nomo long ol samting blong wol mo stap blokem hat blong yumi long ol samting blong God. Yumi jusum blong tingting nomo long wanem we hat blong yumiwan i wantem mo no akseptem ol tingting mo daereksen blong ol narawan. Yumi jusum blong no openem hat blong yumi long ol samting we i blong God be long ol samting we oli pulum tingting blong yumi i go long ol samting blong wol mo enemi. Taem hat blong yumi oli strong, yumi stap longwe long paoa blong Tabu Spirit. Yumi “slo blong tingbaot Lod,” mo wanwan taem bae “[yumi] nomo save filim ol toktok” blong Hem.

Alma i bin tijim ol pipol long Amonaeha se sam bae “oli sakemaot Spirit blong God from hat blong olgeta i strong.” Hem i tijim long olgeta tu se “olgeta we bae oli mekem hat blong olgeta i strong, bae God i givim long olgeta pat ia we i moa smol blong trutok kasem taem we oli no save wan samting long saed blong ol sikret blong hem.” Long en, Spirit bae i kamaot, mo Lod “bae tekemaot ol toktok blong [Hem]” long olgeta we oli mekem hat blong olgeta i strong olsem Laman mo Lemyul. From Laman mo Lemyul tufala i gohed blong mekem hat blong tufala i strong, stap longwe long ol filing blong Tabu Spirit, mo bin jusum blong no akseptem ol toktok mo ol tijing blong papa blong tufala mo Nifae, long en, tufala i no akseptem ol trutok we i no save finis we i kam long God.

Nifae i gohed blong putum tingting blong hem i stap daon mo stap lukaotem daereksen we i kam tru long Spirit blong Lod, be i no Laman mo Lemyul. From hemia, Lod i mekem hat blong Nifae i kam sofsof. Nifae i serem se hem i “bin prea long Lod; mo luk hem i visitim mi, mo i mekem hat blong mi i kam sofsof, mekem se mi bilivim evri toktok we papa blong mi i talemaot.” Lod i helpem Nifae blong akseptem, andastanem, mo bilivim evri sikret blong God mo ol toktok blong Hem. Nifae i bin save gat Tabu Spirit olsem kompanion blong hem oltaem.

?Wanem nao yumi save mekem blong no mekem hat blong yumi i strong?

Faswan, yumi save praktisim blong sakem sin evri dei.

Sevya blong yumi i bin tijim, “From hemia, huia we i sakem sin mo kam long mi olsem wan smol pikinini, hem, bae mi akseptem.” Profet blong yumi we yumi lavem, Presiden Russell M. Nelson, i tijim:

“Blong sakem sin, hem i ki blong progres. Fet we i klin gud i mekem se yumi gohed blong muv fored long kavenan rod ia.

“Plis, no fraet o pusum bak dei blong stap sakem sin. Setan i laekem we yu harem nogud. … Stat tedei, blong stap gat glad ia blong sakem man we i folem fasin blong wol. Sevya i lavem yumi speseli nao, taem yumi sakem sin.”

Taem yumi mekem hat blong yumi i kam sofsof mo eksperiensem glad ia mo stap kam long Lod, yumi kam,“olsem wan pikinini, i stap lisin, no stap flas, putum tingting i stap daon, i save wet longtaem, i gat plante lav, glad blong stap biaen long evri samting we Lod i tingting blong putum long hem, olsem wan pikinini i stap biaen long papa blong hem.”

Nambatu, yumi save praktisim blong putum tingting i stap daon.

Fasin blong sakem sin evri dei bae i mekem tingting blong hat blong yumi i stap daon. Yumi wantem blong gat tingting i stap daon long fored blong Lod, olsem wan smol pikinini, we i stap obei long papa blong hem. Afta bae oltaem yumi gat Tabu Spirit i stap wetem yumi, mo hat blong yumi bae i kam sofsof.

Blong fo yia i pas, waef blong mi, Sue mo mi, mitufala i bin save gud wan naesfala kapol. Taem mitufala i mitim tufala blong fastaem, hasban i wan niu memba blong Jos, mo waef blong hem i stap mit wetem ol misinari blong stadi gospel. Plante misinari oli bin mit wetem hem blong helpem hem i kam long Kraes. Mifala i bin filim se hem i gat wan strong testemoni abaot gospel mo hem i save se Jos i tru. Hem i filim Spirit oltaem long taem we mifala i visitim hem mo tekpat long evri miting. Hem i laekem blong toktok wetem ol gudfala memba blong wod. Be, hem i filim i had tumas yet blong komitim hemwan blong go insaed long wota blong baptaes. Wan dei hem i bin stap ridim Moronae 7:43–44, we i talem:

“Mo bakegen, luk mi talem long yufala se hem i no save gat fet mo hop, be nomo sapos i hem i gat fasin blong no stap flas mo tingting blong hat blong hem i stap daon.

Sapos i olsem, fet blong [yu] mo hop i blong nating, from i no gat wan we God i akseptem long fored blong hem, be olgeta nomo we oli no stap flas mo tingting blong hat blong olgeta i stap daon.”

Afta we hem i ridim ol ves ia, hem i luksave wanem nao hem i nid blong mekem. Hem i bin ting se hem i andastanem mining blong fasin blong no stap flas mo blong putum tingting i stap daon. Be, andastaning blong hem i no bin bigwan inaf blong gat fet mo hop blong obei ol komanmen blong God. Hem i mas lego strong fasin blong hem mo waes tingting blong hemwan. Hem i stat blong putum tingting blong hem i stap daon tru long fasin blong sakem sin wetem tru hat. Hem i stat blong andastanem fasin blong putum tingting i stap daon folem lukluk blong God. Hem i dipen long Papa long Heven mo hem i prea blong mekem hat blong hemwan i kam sofsof. Tru long prea ia, hem i filim Spirit i witnes long hem se Papa long Heven i wantem hem blong kasem baptaes.

Tugeta hasban mo waef i serem se taem we tufala i stap putum tingting i stap daon moa, tufala save andastanem moa ol toktok blong God mo hat blong tufala i kam sofsof blong folem ol tijing blong Lod blong yumi, Jisas Kraes.

Nambatri, yumi save trastem mo dipen long Sevya blong yumi.

Nifae i bin wan gudfala eksampol blong letem hat blong hem i kam sofsof taem hem i stap trastem Lod. Hem i bin tijim, “Mi bin trastem yu, mo bae mi trastem yu blong oltaem. Bae mi no putum tras blong mi long han blong bodi blong mit mo bun.” Long semmak wei, long wan revelesen we Lod i givim long profet Josef Smit, Lod i talem, “Putum tras blong yu long Spirit ia we i lidim man blong mekem gud—yes, blong mekem samting i stret, blong wokbaot wetem tingting we i stap daon.” Taem yumi putum tras blong yumi long Lod mo dipen long Hem, i mekem hat blong yumi i kam sofsof, mo bae hem i sapotem yumi long evri hadtaem, ol trabol mo ol harem nogud blong yumi.

Sapos yumi sakem sin wetem tru hat, putum tingting blong yumi i stap daon, trastem mo dipen long Lod, hat blong yumi bae i kam sofsof. Bae Hem i givim Spirit blong Hem mo soem long yumi ol sikret blong heven. Bae yumi bilivim evri toktok we Hem i bin tijim, mo andastaning blong yumi bae kam moa bigwan.

Sevya blong yumi, Jisas Kraes, i nambawan eksampol blong fasin blong no stap flas. Insaed long 2 Nifae 31:7, yumi ridim i talem, “Be i nomata we hem i tabu, hem i soem long ol pikinini blong ol man we, folem bodi blong mit mo bun, hem i putum tingting blong hem i stap daon long fored blong Papa, mo hem i witnes long Papa se bae hem i obei long hem blong obei ol komanmen blong hem.” Nomata Hem i bin tabu mo stret gud evriwan, Hem i gat tingting we i stap daon long fored blong Papa mo obei long Hem, taem Hem i kasem baptaes.

Long en blong laef blong Hem long wol ia, Jisas Kraes i givim Hemwan long Papa blong Hem taem Hem i tekpat long konkon kap ia. Safaring ia i mekem Hem i, “seksek from soa long bodi, mo blad i ronaot long evri hol blong skin, mo safa tugeta long bodi mo long spirit.” Sevya i askem sapos Hem i “no dring kap ia we i konkon, mo wantem holemtaet [Hemwan].” Nomata long hemia, Hem i talem, “glori i go long Papa, mo [Hem] i dring mo [Hem] i finisim wok blong [Hem] blong mekem rere evri samting blong gud blong ol pikinini blong ol man.”

Ol Brata mo sista, Oli bin givim long yumi fridom blong mekem joes. Yumi save jusum blong mekem hat blong yumi i kam strong, o yumi save jusum blong mekem hat blong yumi i kam sofsof. Long evri dei laef blong yumi, yumi save jusum blong mekem ol samting we i invaetem Spirit blong Lod blong kam insaed mo stap long hat blong yumi. Mi save se insaed long ol joes ia, i gat pis mo glad.

Letem yumi folem eksampol blong Sevya, Jisas Kraes, we i bin folem tingting blong Papa long Heven. Taem yumi mekem olsem, Lod i promesem yumi, “From luk, bambae mi karem olgeta i kam wanples olsem wan mama faol i stap karem i kam wan ples ol pikinini blong hem andanit long ol wing blong hem, sapos oli no mekem hat blong olgeta i strong.” Long nem blong Jisas Kraes, amen.