“Nao From we Yufala i Stap Lavlavem Yufala, Bambae Olgeta Man Oli Luksave Se Yufala I Man blong Mi”
Lav blong yumi long God mo ol pikinini blong Hem i wan testemoni we i gat paoa i go long wol se i tru, se, hemia i Jos blong Sevya.
Plante yia i pas, sista Uchtdorf mo mi i bin travel i go tru long saot blong Jemani. Hemia i bifo long Ista, mo mitufala i invaetem wan gud fren, we i no wan memba blong Jos, blong joenem mitufala blong wosip long Sandei seves. Mitufala i lavem dia fren ia, yes hem i nomol nomo blong serem wetem hem, olsem wanem mitufala filim abaot Sevya mo Jos Ia blong Hem mo blong !invaetem hem blong i kam mo luk! Hem i akseptem invitesen mo i bin joenem mifala long ol miting blong branj we i kolosap.
Sapos yu karem wan fren i kam long jos blong fastaem, bae yu save wanem we mi bin filim long Sandei moning ia. Mi wantem evri samting blong i go stret gud evriwan. Fren blong mitufala ia i skul gud, mo hem i gat ol bilif. Mi hop strong se ol miting blong branj ia bae oli givim wan gudfala filing mo tingting long hem mo bae oli ripresentem gud Jos.
Branj ia i mit long sam rum we oli rentem long nambatu flo blong wan supa maket. Blong kasem ples ia, mifala i mas go antap long lada biaen long bilding ia, krosem ol strong smel blong ol kaekae we oli storem long ples ia.
Taem sakramen miting i stat, mi tingbaot fren blong mi we i fastaem blong hem blong eksperiensem hemia, mo mi no save stop blong luksave ol samting we i mekem mi sem smol. Eksampol, singsing, i no saon semmak nomo olsem Tabenakol kwaea. Ol pikinini oli mekem noes mo no save stap kwaet long taem blong sakramen. Ol spika oli mekem bes blong olgeta, be oli no gat skil ia blong toktok long pablik. Mi sidaon mo no filim gud nomo truaot long miting ia, mo stap hop se, maet Sandei Skul nao bae i moa gud.
Be no gat nomo.
Ful moning ia mi wari abaot tingting blong fren blong mitufala abaot jos ia we mitufala i bin tekem hem i kam long hem.
Afta long hemia, taem mifala i draev i go hom, mi tanem mi blong toktok long fren blong mitufala. Mi wantem blong eksplenem se hemia i wan smol branj nomo mo hem i no ripresentem stret mo ful Jos. Be bifo mi talem wan toktok, hem i toktok faswan.
“Hemia i naes tumas,” hem i talem.
Mi nomo toktok.
Hem i gohed, “mi laekem tumas blong luk olsem wanem ol pipol oli tritim olgeta wanwan insaed long jos blong yufala. Mi luk olsem oli kamaot long ol defdefren bakgraon, be yet, i klia se oli gat bigfala lav long wanwan long olgeta. Hemia i wanem we mi ting se Kraes i wantem long Jos blong Hem.”
Yes, kwiktaem mi sakem sin from fasin blong mi blong jajem samting. Mi wantem wan miting bae soem wan pikja we i stret gud evriwan blong mekem fren blong mi i laekem. Be wanem we ol memba blong branj ia oli gat i bin wan spirit blong tru lav we i stret gud evriwan, i kaen, i gat longfala tingting, mo sore.
Blong Fet I Save Kam Antap long Wol
Ol dia brata mo sista, ol dia fren blong mi, mi lavem Jos Ia blong Jisas Kraes blong Ol Lata-dei Sent. Hem i Jos blong Sevya we i tru mo stap laef, mo i tijim gospel blong Jisas Kraes we i bin kambak mo i fulwan. Prishud paoa mo atoriti blong Hem i stap insaed long ples ia. Jisas Kraes i lidim Jos ia Hemwan, tru ol wokman we Hem i singaotem mo givim atoriti long olgeta, mo tru long wan profet nomo we i stap laef, Presiden Russell M. Nelson. Sevya i bin givim wan spesel misin long Ol Lata-dei Sent blong karem i kam tugeta ol pikinini blong God mo mekem rere wol from Seken Kaming blong Sevya. Mi serem witnes blong mi se evri samting ia i tru.
Be hem i impoten blong tingbaot se taem plante long ol pipol oli eksperiensem Jos Ia blong Jisas Kraes blong fastaem, oli no stap tingting long prishud atoriti o ol odinens o kam tugeta blong Isrel. Wanem we oli save luksave faswan, bitim eni samting, i wanem we oli filim taem oli stap wetem yumi mo olsem wanem yumi tritim wanwan long yumi.
“Lavlavem wanwan long yufala,” Jisas i talem. “Nao from we yufala i stap lavlavem yufala, bambae olgeta man oli luksave se yufala i man blong Mi.” Oltaem mo oltaem, wan man o woman bae i talem testemoni blong hem abaot Jisas Kraes, i kam tru taem hem i filim lav long medel blong ol disaepol blong Jisas Kraes.
Sevya i talemaot se Hem i putumbak Jos blong Hem blong mekem se “fet i save kam antap long wol.” From hemia, taem ol pipol oli visitim ol Jos miting blong yumi, !Sevya i wantem olgeta blong aot wetem strong fet long Hem! !Lav ia we ol fren blong yumi oli filim long medel blong yumi bae i leftemap olgeta i kam moa kolosap long Jisas Kraes! Hemia nao i simpol gol blong yumi taem yumi kam tugeta.
Eniwan we i stap lukaotem blong gat bigfala fet long Kraes o gat wan koneksen we i kolosap long Papa long Heven, i mas filim se hem i stap stret long hom insaed long Jos Ia blong Jisas Kraes blong Ol Lata-dei Sent. Blong stap invaetem olgeta i kam long ol miting blong yumi, olsem we i nomol blong yumi stap invaetem olgeta i kam insaed long ol hom blong yumi.
Samting We I Stret Gud Evriwan mo Samting We I Tru
Naoia mi luksave se mi stap tokbaot samting we i stret gud evriwan. Mo long laef long wol ia, i had blong eksperiensem samting we i stret gud evriwan. Mo “kasem dei we i stret gud evriwan i kam,” oltaem bae i gat wan spes bitwin samting we i stret gud evriwan mo hemia we i tru. Yes, ?wanem nao yumi mas mekem taem we Jos i no filim olsem dei we i gud evriwan? ?Long wanem taem mo from wanem kaen risen, wod blong yumi i no filim yet fet we i stret gud evriwan o lav insaed long wod? ?O taem yumi filim se yumi no pat?
!Wan samting we yumi no mas mekem i blong givap long wanem we i stret gud evriwan!
Long taetol pej blong Buk blong Momon i gat tu impoten toktok ia: “sapos i gat sam samting we i no stret,” i talem se, “oli ol mistek blong ol man; from samting ia, no toktok agensem ol samting blong God.”
?Wan buk—o jos o wan man o woman—i gat “ol samting we oli no stret” mo “ol mistek” mo yet, oli save stap olsem wok blong God?
Bigfala ansa blong mi i, !yes!
So, oltaem taem yumi stap traehad blong laef folem ol hae standet blong Lod, letem yumi gat longfala tingting wetem wanwan long yumi. Yumi wanwan i stap wok yet blong progres, mo yumi evriwan i dipen long help blong Sevya. Hemia i tru blong yumi wanwan, mo i tru blong kingdom blong God long wol ia.
Lod i invaetem yumi i no blong joenem kingdom blong Hem nomo be, blong wok wetem strong tingting long wan gud wok blong stap bildim kingdom. God i wantem ol pipol we oli “gat wan hat mo wan maen.” Mo blong stap gat wan hat, yumi mas lukaotem blong gat klin hat, mo hemia i nidim wan bigfala jenis blong hat.
Be hemia i no minim se blong jenisim hat blong mi folem tingting blong hat blong yu. O i no minim blong stap jenisim hat blong yu folem tingting blong hat blong mi. Hemia i minim se yumi evriwan i jenisim hat blong yumi folem tingting blong Sevya.
Sapos yu no kasem ples ia yet, tingbaot se, wetem help blong Lod, evri samting i posibol.
Joen Gud mo Fasin blong Stap Pat
Mo sapos yu eva filim se yu no pat, plis save se yu no stap yuwan. ?I tru se, i gat ol situesen blong laef we i mekem yumi filim olsem wan strenja long wan ples? Mi bin gat eksperiens long hemia plante taem. Taem mi gat 11 yia, oli fosem famli blong mi blong aot long hom mo muv i go long wan eria we i no gat man i save. Evri samting i defren long wanem we mi stap mekem. Mo saon blong toktok blong mi i klia long ol nara pikinini se mi mi defren long wanem we oli stap mekem. Long wan taem we mi nidim tumas wan frensip mo filing blong stap pat, mi filim se mi stap miwan mo rong ples.
Long ples ia long wol, plante long ol samting we yumi luksave se oli defdefren i—ol samting we sam long yumi i yusum blong mekem wan i defren long ol narawan—i mas ol samting blong wol: long saed blong bodi, hem blong wanem kantri, i toktok long wanem lanwis, klos we i werem, kastom mo sam moa. Be “God i no lukluk ol samting long wei we yumi ol pipol i luk. Ol pipol oli lukluk long aotsaed, be Lod i stap lukluk long hat.”
Long lukluk blong Hem, i gat wan grup blong ol pipol we i kam bifo long evri narawan: pikinini blong God. Mo yumi evriwan i joen gud long grup ia.
Hem i nomol blong wantem stap raon long ol pipol we oli luk, toktok, mekem samting mo tingting olsem yumi. I gat wan ples blong hemia.
Be insaed long Jos Ia blong Sevya, yumi karem i kam tugeta evri pikinini blong God we oli wantem blong kam tugeta mo lukaotem trutok. Hem i no abaot, lukluk blong yumi, ol lukluk blong yumi long saed blong politik, kalja o bakgraon blong yumi we i tekem yumi kam tugeta. Hem i no ol semmak bakgraon we i karem yumi i kam wan. Hem i semmak gol blong yumi, lav blong yumi long God mo lav blong yumi long neba blong yumi, komitmen blong yumi long Jisas Kraes mo gospel blong Hem we i bin kambak. Yumi, yumi “wan long Kraes.”
Yuniti we yumi lukaotem i no blong gat evriwan i stanap long semmak ples; i blong mekem evriwan i fesem semmak daereksen—i go long Jisas Kraes. Yumi i wan i no from weaples yumi stap long hem bifo, be from ples we yumi stap traehad blong kasem; i no from huia yumi be from huia yumi lukaotem blong kam olsem.
Hemia nao i wanem we i tru abaot Jos Ia blong Kraes.
Wan Bodi
Sapos yu lavem God, sapos yu wantem blong save Hem moa gud i taem yumi stap folem Pikinini blong Hem, afta nao, bae yu kam pat long ples ia. Sapos yu wantem blong stap lukaotem blong obei long ol komanmen blong Sevya wetem tru hat—nomata yu no stret gud evriwan long hemia—afta, yu yu joen gud blong kam pat blong Jos Ia blong Jisas Kraes blong Ol Lata-dei Sent.
?Mo bae i olsem wanem sapos yu yu defren long ol pipol we oli raonem yu? Hemia i no mekem se oli no save akseptem yu—i mekem yu kam wan pat ia we oli nidim insaed long bodi blong Kraes. Oli nidim evriwan insaed long bodi blong Kraes. Ol sora oli harem save ol samting we ol ae i neva save luk. Leg i blong mekem ol samting we ol han bae oli no save mekem gud.
Hemia i no minim se wok blong yu i blong jenisim evriwan blong kam olsem yu. Be i minim nomo se yu gat wan impoten samting blong kontribiut—!mo we yu gat wan impoten samting blong lanem!
Wan Voes
Long evri sisen blong jeneral konfrens, yumi gat blesing blong gat ol insperesen miusik we i kam long ol kwaea we oli gat talen. Taem yu lisin, bae yu save luksave se ol singga ia, evriwan oli no singsing ol semmak not. Samtaem wan seksen i singsing melodi nomo, samtaem narawan. Be olgeta evriwan oli kontribiut long naesfala saon, mo evriwan oli kam wan. Wanwan memba blong kwaea oli gat semmak gol: blong presem God mo leftemap ol hat blong yumi i go long Hem. Wanwan i mas putum maen mo hat blong hem i stap nomo long semmak tabu gol tingting ia. Mo taem hemia i hapen, i tru, evriwan bae oli kam wan voes.
Sapos yu no wan memba yet blong Jos Ia blong Jisas Kraes blong Ol Lata-dei Sent, mifala i invaetem yu blong joenem mifala taem yumi glad tugeta long “singsing blong lav blong Sevya we i pemaot yumi.” Mifala i nidim yufala. Mifala i lavem yufala Jos bae i kam moa gud tru ol hadwok blong yufala blong givim seves long Lod mo ol pikinini blong Hem.
Sapos yu bin soem finis, tru long baptaes, taem yu stap mekem ol kavenan wetem God, tingting blong hat blong yu blong “wantem blong kam long yad blong God, mo blong oli singaotem yufala ol pipol blong hem,” tangkyu blong stap pat long bigfala mo tabu wok mo blong stap help mekem Jos Ia blong Jisas Kraes i kam wanem we Sevya i wantem blong i kam.
Olsem we mi bin lanem long fren blong mi long Jemani, lav blong yumi long God mo ol pikinini blong Hem i wan testemoni we i gat paoa i go long wol se i tru, se, hemia i Jos blong Sevya.
Bae God i blesem yumi wetem longfala tingting, blong wok strong evri dei blong lukaotem blong stap laef folem Sevya olsem Man we i sevem yumi, Ridima mo Masta we i bin mekem blong yumi—mekem se evriwan bae oli save se yumi ol disaepol blong Hem. Long tabu nem blong Jisas Kraes, amen.