Ol Tabu Help blong Laef long Wol Ia

Tru long Profet Josef Smit, Lod i bin soem sam samting abaot laef blong yumi bifo wol ia. Long ples ia, yumi bin stap olsem ol spirit pikinini blong God. From se God i wantem helpem ol pikinini blong Hem blong progres, Hem i disaed blong krietem wan wol we bae yumi save kasem wan bodi, lan tru long eksperiens, developem ol tabu fasin, mo blong pruvum sapos bae yumi save kipim ol komanmen blong God. Olgeta we oli kwalifae, bae oli “givim moa glori antap long hed blong olgeta blong oltaem mo oltaem” (Ebraham 3:26).

Blong stanemap ol kondisen blong tabu plan ia, God i bin jusum Pikinini Ia Nomo blong Hem blong stap olsem Sevya blong yumi. Lusifa i kam olsem Setan taem hem i jusum wan nara joes blong spolem fridom blong joes blong man, mo oli “sakemaot hem.” Afta we oli sakemaot hem long heven i kam long wol, hem i nogat spesel janis ia blong gat bodi blong mit mo bun, be oli letem hem blong traem blong “trikim mo mekem evri man oli blaen, mo blong lidim olgeta oli kam prisena folem tingting blong hem, yes, evriwan we bae oli no wantem folem voes blong [God]” (Moses 4:4).

Hem i impoten long bigfala plan blong God, se blong ol pikinini blong Hem oli save gro long laef ia, bae oli mas eksperiensem “fasin blong go agens long evri samting” (2 Nifae 2:11). Olsem ol masel blong bodi blong yumi i no save develop o stap strong, sapos oli no traehad blong holemtaet man i go long graon agensem fos blong graviti. Semmak long laef long wol i nidim blong traehad agensem ol temtesen blong Setan mo ol nara fasin blong stap agens blong wol ia. Samting we i moa impoten blong gro long saed blong spirit, hem i nid ia blong jusum gud mo nogud. Olgeta we oli jusum gud, bae oli progres i go fored long laef we i no save finis. Olgeta we oli jusum nogud—olsem we evriwan bae i mekem taem oli go tru ol defren temtesen blong laef ia—bae oli nidim blong wan i sevem olgeta. Mo wan God we i gat lav, i rere long wan rod.

Bigfala help blong God we i moa strong, i we Hem i bin givim wan Sevya, Jisas Kraes, we bae i safa blong pem praes mo givim fogivnes from ol sin we oli sakem. Atonmen ia we i fulap long sore mo glori, i eksplenem from wanem fet long Lod Jisas Kraes, hem i fas prinsipol blong gospel. Atonmen blong Hem “i mekem laef bakegen long ded blong ol dedman i hapen” (Alma 42:23), mo i “pem praes blong ol sin blong wol” (Alma 34:8), hemia i karemaot evri sin blong yumi we yumi sakem mo i givim paoa long Sevya blong helpem ol man long ol samting we oli no strong long hem long wol ia.

Antap long tabu rod ia blong karemaot ol sin we oli mekem mo kasem fogivnes, plan blong wan Papa we i gat lav, i givim plante nara presen blong protektem yumi, hemia i tekem tu blong stap protektem yumi long sin taem yumi no bin save wanem i raet mo wanem i rong. Laef blong yumi long wol ia i oltaem stat wetem wan papa mo wan mama. Tufala tugeta i stap mo gat ol defren talen mo paoa blong lidim yumi blong gro. Sapos wan o tugeta i no stap, hemia i pat blong fasin blong agens we yumi mas winim.

Plan blong Papa blong Yumi long Heven i givim ol nara help blong lidim yumi long wokbaot blong yumi long wol ia. Bae mi tokbaot fo long ol help ia. Bae hem i no fo stret, from sam long ol help ia oli joen. Antap long hemia, i gat ol nara proteksen we i kam wetem olgeta.

Faswan, mi tokbaot Laet, o Spirit blong Kraes. Long tijing blong hem insaed long buk blong Moronae, Moronae i kwotem papa blong hem se “Spirit blong Kraes, God i givim long evri man, blong hem i save gat save long samting we i gud aot long samting we i nogud” (Moronae 7:16). Yumi ridim semmak tijing ia long ol revelesen blong tedei:

“Mo Spirit i givim laet long evri man we i kam long wol; mo Spirit i givim moa laet long evri man long evri ples long wol, we i lisin gud long voes blong Spirit” (Doktrin mo Ol Kavenan 84:46).

Bakegen: “From mi sendem Spirit blong mi i go long wol blong givim moa laet long olgeta we oli gat tingting i stap daon mo wantem sakem sin, mo blong panisim olgeta we oli no obei long God” (Doktrin mo Ol Kavenan 136:33).

Presiden Joseph Fielding Smith i bin eksplenem ol skripja ia: “Lod i no lego man (taem oli bon i kam long wol) mo no helpem olgeta, i no lego olgeta oli lukaotem laet mo trutok olbaot, be evri man … oli bon wetem raet ia blong kasem gaed, instraksen, mo kaonsel blong Spirit blong Kraes o Laet blong Trutok.”

Nambatu long ol bigfala help we Lod i givim blong helpem yumi blong jusum wanem i raet, hem ol tabu daereksen insaed long ol skripja olsem pat blong wan plan blong sevem man (plan blong stap glad). Ol daereksen ia oli ol komanmen, odinens, mo kavenan.

Ol komanmen oli soem rod we Papa blong yumi long Heven i bin mekem blong yumi, blong progres i go from laef we i no save finis. Ol pipol we oli lukluk ol komanmen blong God se hem i wan wei blong God i panisim yumi, oli no andastanem stamba tingting ia blong plan blong God blong stap glad. Long rod ia, sloslo bae yumi save kasem rilesensip ia wetem Sevya blong yumi mo kwalifae blong gat moa paoa blong Hem blong helpem yumi long ples we yumi stap go long hem we God i wantem tumas blong yumi evriwan. Papa blong yumi long Heven i wantem evri pikinini blong Hem blong gobak long selestial kingdom, long ples we God mo Sevya blong yumi i stap long hem, mo blong gat kaen laef we olgeta long selestial glori oli stap laef long hem.

Ol odinens mo ol kavenan oli pat blong loa we i soem rod we i go long laef we i no save finis. Yumi nidim blong mekem ol odinens mo tabu kavenan wetem God, blong oli save protektem yumi folem kavenan rod ia. Mi laekem blong tingting long ol wok blong ol kavenan se oli stap soem se folem plan blong God, Hem i givim ol blesing blong Hem we oli moa hae, long olgeta we oli promes long laef bifo wol ia, se bae oli kipim sam komanmen, mo oli kipim ol promes ia.

Ol nara help we God i givim long yumi oli ol samting we Tabu Spirit i stap soemaot. Tabu Spirit i nambatri memba blong Godhed. Wok blong Hem olsem we oli talem long skripja, i blong testifae abaot Papa mo Pikinini; blong tijim yumi, blong mekem yumi tingbaot evri samting, mo lidim yumi i go long evri trutok. Ol skripja i gat plante storian abaot ol samting we Tabu Spirit i stap soemaot, olsem blong witnes long saed blong spirit taem i gat wan kwestin abaot trutok blong Buk blong Momon. Yumi no mas konfius long wan samting we Tabu Spirit i soem, wetem presen we i Tabu Spirit. Presen we i Tabu Spirit, oli stap givim afta long baptaes.

Wan long ol help blong God we i impoten bigwan long ol fetful pikinini blong Hem, hem i presen ia we i Tabu Spirit. Hamas trutok ia i impoten, i klia long trutok ia se oli stap givim afta we wan i sakem sin mo baptaes andanit long wota, “mo afta [skripja i eksplenem se] yufala i kam klin aot long ol sin blong yufala tru long faea mo tru long Tabu Spirit” (2 Nifae 31:17). Olgeta we oli kam klin aot long ol sin—mo afta oltaem oli kam klin bakegen taem oli stap sakem sin evri dei mo laef folem kavenan we oli mekem tru long odinens blong sakramen—oli kwalifae from promes ia se Tabu Spirit, Spirit blong Lod, “oltaem … [bae] i stap wetem olgeta” (Doktrin mo Ol Kavenan 20:77).

From hemia, Presiden Joseph F. Smith i tijim se bae Tabu Spirit i “mekem ol pipol oli andastanem ol samting blong God, blong winim tingting blong olgeta long taem we oli jenisim laef blong olgeta se oli bin mekem wanem we Papa i wantem, mo blong stap insaed long olgeta olsem wan testemoni mo kompanion truaot long laef; blong stap olsem wan sua mo sef gaed abaot evri trutok mo fulumap olgeta evri dei wetem glad, wetem wan tingting blong mekem gud fasin long evri man; blong safa from rong bitim blong mekem rong; blong stap kaen mo gat sore, blong wet longtaem mo gat klin lav. Evriwan we i gat hae presen ia, perel we i gat bigfala praes, oli oltaem tosta from stret mo gud fasin. Sapos i no gat help blong Tabu Spirit, no gat wan long wol ia i save wokbaot long rod ia we i stret mo no isi” Presiden Smit i talem long en.

Wetem plante help we i gat paoa blong gaedem yumi long wokbaot blong yumi long wol ia, hem i nogud blong luk se plante oli gohed blong no stap rere blong luk Sevya mo Ridima blong yumi, Jisas Kraes. Parabol blong Hem blong ol ten yangfala gel, we oli tokbaot plante long konfrens ia, hem i talem se aot long olgeta we oli invaetem blong luk Hem, haf long olgeta nomo bae oli rere.

Yumi evriwan i save ol eksampol blong no stap rere: ol riten misinari we oli nomo gro long saed blong spirit from oli no stap mekem wan samting long laef blong olgeta; ol yut we oli putum gro blong olgeta long saed blong spirit, long denja taem oli aot long ol tijing mo aktiviti blong Jos; ol man we oli wokem pusum taem blong kasem odinesen blong Melkesedek Prishud; ol man mo woman we—samtaem oli kamaot long laen blong ol gudfala paeonia o paren—oli bin kamaot long kavenan rod bifo oli mekem mo kipim ol kavenan insaed long tabu tempol.

Plante long ol rong daereksen ia oli hapen taem ol memba oli no folem ol evri dei fasin long saed blong spirit olsem blong stap mekem prea blong yuwan, stadi skripja, mo sakem sin oltaem. Long wan saed, sam oli no lukaotgud blong stap riniu ol kavenan blong olgeta evri wik taem oli tekem sakramen. Sam oli talem se Jos i no stap givim wanem we oli nidim; olgeta ia oli stap putum wanem oli ting se hem i ol fiuja nid blong olgeta, i kam faswan long wanem we Lod i bin givim tru long ol plante tijing blong Hem, mo ol janis blong yumi givim seves long ol narawan.

Fasin blong gat tingting we i stap daon, mo tras long Lod, oli ol meresin blong ol rong daereksen olsem. Olsem we Buk blong Momon i tijim, Lod “i blesem mo mekem i kam antap gud olgeta we oli putum tras blong olgeta long hem” (Hileman 12:1). Blong stap trastem Lod hem i wan nid blong evriwan we oli stap rong blong komperem ol komanmen blong God mo ol tijing blong ol profet blong Hem, wetem ol waes blong man.

Mi bin tokbaot plante help long wol ia we Papa blong yumi long Heven we i lavem yumi, i bin givim long ol pikinini blong Hem blong gobak long Hem. Pat blong yumi long tabu plan ia i blong trastem God mo lukaotem mo yusum ol tabu help ia, speseli Atonmen blong Pikinini blong Hem we Hem i lavem, Sevya mo Ridima blong yumi, Jisas Kraes. Mi prea se bae yumi tijim mo laef folem ol prinsipol ia, long nem blong Jisas Kraes, amen.