Glad Tru long Kavenan Fasin blong Stap wan Disaepol

Wan dei long 2023, Uyanga Altansukh i bin stap long wok long not blong Mongolia siti blong Darkhan, taem misin presiden blong Mongolia i kam insaed long wokples blong hem. Long ol toktok blong hem, hem i talem:

“Mi bin luk hem mo ting se hem i gat wan laet we i saen long fes blong hem. Hem i kaen tumas mo gat gud taem wetem olgeta raon long hem, mo mi filim i naes. Bifo hem i aot, mi askem sam kwestin long hem. Sam dei i pas, hem i bin kam long wok blong mi bakegen mo askem sapos mi save kam long jos blong hem. Mi tingting se maet hemia i save help. Mi bin stap wari from fiuja blong ol pikinini blong mi, from we, sosaeti i fulap long wari mo tudak. Mi wantem ol pikinini blong mi blong kam olsem man ia wetem laet long fes blong hem, we i stap serem glad long olgeta raon long hem.

“Wan dei ol misinari oli bin tijim mifala loa blong taeting. Ol pikinini blong mi oli talem wetem bigfala glad se, ‘Yumi mas pem taeting blong yumi, mama.’ Mi save luk fet blong ol pikinini blong mi long sot taem ia. Bifo mi joenem Jos, Mi bin wajem jeneral konfrens mo lisin long Presiden Russell M. Nelson i toktok. Hem i bin anaonsem ol niu tempol raon long wol mo talem se bae i gat wan niu tempol long Ulaanbaatar, Mongolia. Mi glad tumas mo wota blong ae i foldaon, iven mi no andastanem from wanem i olsem. Wetem glad ia, mi save talem se fet mo testemoni blong mi i bin stap gro.”

Uyanga, olsem milian long ol narawan, i pat blong bigfala kam tugeta blong Isrel blong stap rere from Seken Kaming blong Jisas Kraes. Hem i statem wokbaot blong hem folem rod blong kavenan mo kam wan disaepol blong Kraes. ?Wanem nao i minim blong stap olsem wan disaepol blong Kraes? Mi laekem Japanis toktok ia blong disaepol—deshi—de we i minim smol brata, mo shi i minim pikinini.

Jisas Kraes i talemaot, “Mi talem long yufala, mi bin stap long stat wetem Papa, mo mi mi Fasbon.” From huia Hem mo from wanem we Hem i bin mekem, yumi wosipim, respektem mo givim glori i go long Hem, mo yumi folem Hem. Kraes i bin pemaot yumi, mo yumi talem tangkyu oltaem from atonmen mo sakrifaes blong Hem we i no gat en.

Yumi gat wan Papa long Heven we i lavem yumi olsem ol pikinini blong Hem. Lav blong Hem long yumi i stret evriwan. Jisas Kraes mo misin blong Hem i soemaot lav blong God long yumi. Olsem we Jon i bin raetem, “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”

Long stadi blong yumi blong andastanem wanem yumi no save, maet samtaem yumi dipen long ol eksperiens we yumi go tru long hem finis long wol ia, o ol samting we yumi bin save. Eksampol, yumi save lanem tu abaot God, Papa tru long parenhud [fasin blong stap olsem papa mo mama] mo ol famli rilesensip blong yumiwan. Be, yumi mas lukaot gud blong no stap yusum olgeta fasin ia blong komperem samting tumas, taem yumi traem blong andastanem Papa blong yumi long Heven. Ol fasin blong Papa God i stap antap bitim eni fasin blong man blong wol we i no stret gud evriwan mo i smol. God i Papa we i stret gud evriwan. Hem i lavem evriwan i stret gud evriwan, Hem i kaen, gat longfala tingting, andastaning mo glori we i stret gud evriwan. Yumi gat tras we i stret gud evriwan long Hem. Lav blong Kraes i soemaot lav blong God, Papa mo hem i wanem we i ripresentem lav ia.

Jisas Kraes, Hem i tugeta eksampol mo wei blong soem hemia. Long Kraes, yumi save andastanem moa gud ol fasin olsem hemia blong Papa mo plan blong Hem. Tru long Kraes, yumi kasem paoa ia blong save winim ol fasin blong ol man mo woman blong wol mekem se yumi save kam moa olsem Papa.

Olsem Papa blong Heven, Jisas Kraes, Hem i gat sore we i stret evriwan mo i fea. Ol tabu fasin ia blong jastis mo sore oli no stap insaed long fasin blong stap go agens. Tufala i mas stap tugeta blong mekem samting i wok. Tugeta jastis mo sore, tufala i soemaot lav blong God we i stret evriwan long ol pikinini blong Hem. Yumi save trastem God, Papa mo Jisas Kraes from se, Tufala i mekem samting i stret long yumi evriwan.

God, Papa mo Pikinini blong Hem, Jisas Kraes, Tufala i gat stamba tingting mo lav we i stret gud evriwan. From se God mo Jisas Kraes, Tufala i lavem yumi, Oli givim janis mo spesel janis long yumi blong stap olsem ol tru disaepol blong mekem ol kavenan wetem Tufala. Taem yumi mekem hemia, i bildim rilesensip blong yumi wetem Kraes: “Mo nao, from kavenan ia we yufala i bin mekem, bae oli singaotem yufala ol pikinini blong Kraes, ol boe blong hem, mo ol gel blong hem; from luk, long dei ia, hem i bin bonem yufala i kam long saed blong spirit; from yufala i talem se hat blong yufala i bin jenis tru long fet we yufala i gat long nem blong hem; from hemia, yufala i bon long hem mo bin kam ol boe blong hem mo ol gel blong hem.”

Olsem ol disaepol, taem yumi mekem mo kipim ol tabu kavenan, yumi kasem blesing blong gat paoa long saed blong spirit. Yumi joen wetem Kraes mo God, Papa long wan spesel rilesensip mo save filim lav mo glad blong Tufala we i speseli blong olgeta we oli bin mekem mo kipim ol kavenan. Paoa blong yumi blong filim save lav blong God we i fulwan, o blong gohed blong filim lav blong Hem, hem i dipen long ol tingting blong hat mo ol aksen blong yumi we oli stret mo gud.

Insaed long Jon japta 15, ves 9, yumi rid se, “Papa blong mi i lavem mi tumas, mo long sem fasin, mi mi lavem yufala.” Mo afta oli givim wan invitesen long yumi, “Oltaem yufala i mas [gohed wetem lav blong mi].”

Insaed long nekis ves, oli givim wei blong gohed long lav long Hem: “Sipos yufala i stap obei long ol tok blong mi, bambae mi mi lavem yufala olwe, stret olsem we mi mi stap obei long ol tok blong papa blong mi, nao oltaem Hem i stap lavem mi.”

Afta, yumi luk stamba tingting blong stap obei ol komanmen long ves 11: “Mi stap talemaot ol tok ya long yufala, blong yufala i save gat glad oltaem, mo olsem we oltaem mi mi glad nao bambae yufala i glad we i glad.”

Tru long fasin blong stap wan tru disaepol, yumi save stat blong andastanem moa gud fasin blong God mo glad we Hem i wantem evri pikinini blong Hem blong oli eksperiensem. Mo tu, yumi save stat blong andastanem sam prinsipol we maet long stat, yumi no klia long olgeta. Eksampol, ?olsem wanem nao God i gat wan glad we i fulwan taem sam long ol pikinini blong Hem oli stap safa tumas? Ansa i stap long wanem we God i lukluk long hem mo plan blong Hem we i stret gud evriwan. Hem i luk yumi long stat i go kasem wanem we yumi save kasem long fiuja we i fulap long glori. Hem i bin givim wan wei, tru long Pikinini blong Hem, Jisas Kraes, from yumi evriwan, ol pikinini blong Hem, blong winim ol soa blong bodi, safaring, ol sin, sem mo fasin blong stap yuwan long wol ia. God i givim rod ia mo joes ia long yumi.

Ol eksampol blong olgeta we oli bin eksperiensem glad tru long fasin blong stap wan disaepol, maet i helpem yumi blong andastanem moa gud aedia ia. Maet yu bin harem toktok ia se glad blong wan papa mo mama i no fulwan sapos wan pikinini i no glad. Mi bin luk se hemia i no nid blong stap olsem ia. Olfala mama blong mi we i gat 94 yia i gat wan laen blong ova 200 pikinini we i stap laef. Long eni spesel taem, bae oltaem i gat wan aot long 200 ia we bae i no stap hapi. Sapos stetmen ia i tru, mama blong mi bae i gohed blong stap long situesen ia blong no stap glad, be hem i no olsem. Olgeta we oli save hem, oli save hamas hem i stap glad.

Naoia, mi wantem blong serem wan nara eksperiens. Long Jenuware blong 2019, mi mo waef blong mi Debbie, oli bin invaetem mitufala i go long ofis blong Presiden Nelson. Hem i putum jea blong hem kolosap long mitufala, mo mifala i fesfesem mifala. Afta we hem i talemaot koling blong mitufala blong naoia, Presiden Nelson i tanem hem i go long Debbie mo toktok nomo long hem. Hem i kaen, gat lav, mo toktok slo, mo i fulap long glad, olsem wan papa mo bubuman we i stret gud evriwan. Hem i holem han blong Debbie mo talem bakegen se, bae evri samting i Oraet mo se famli blong mitufala bae oli kasem blesing. I olsem se, long taem ia, mitufala nao i tufala pipol we i moa impoten long hem mo se hem i gat evri taem long wol ia blong stap wetem mitufala. Mitufala i lego ofis blong hem long Fraedei aftenun ia, filim hop, lav mo glad.

Long Mandei mitufala i wajem ol nius. Long semmak dei ia we Presiden Nelson i bin spendem wetem mitufala, wan long ol gel blong hem i bin ded from kansa. Mitufala i bin sek. Hat blong mitufala i fulap sore taem mitufala i stap krae from hem mo famli blong hem. Hat blong mitufala i fulap tu long tangkyu from hem i lisin mo tingting long mitufala olsem hemia blong Kraes, long taem we hem i stap krae from pikinini gel blong hem we i bin stap safa.

Taem yumi tingting hevi long eksperiens ia, yumi askem yumiwan “?Olsem wanem nao hem i save stap kaen, gat lav mo iven stap glad long wan taem we i had tumas?” Ansa hem i we, hem i save. Hem i bin save se Kraes i bin win. Hem i save se bae hem i stap wetem pikinini gel blong hem bakegen mo bae i spenem wan taem we i no save finis wetem hem. Glad mo lukluk blong taem we i no save finis, i kam tru taem yumi stap wokbaot i go long Sevya, taem yumi mekem mo kipim ol kavenan mo tru long fasin blong stap wan disaepol.

Presiden Nelson i bin tijim se, “Sevya i no givim nomo, pis ia we i ‘bitim evri andastaning blong yumi’ [Filipae 4:7], Hem i givim tu, glad ia we i bigwan tumas, i dip, mo man long wol ia i no save andastanem. Eksampol, i no luk olsem i posibol blong filim glad taem pikinini blong yu i stap safa long wan sik we i no gat meresin blong hem o taem yu lusum wok blong yu o taem waef o hasban blong yu i giaman long yu. Be yet, hem i stret glad ia nao we Sevya i stap givim.”

Taem yumi mekem mo kipim ol kavenan, bae hem i nomol blong yumi tanem yumiwan i go long ol narawan mo gat hat blong wantem blong helpem ol narawan oli filim pat blong glad mo lav ia we yumi filim insaed long ol kavenan rilesensip blong yumi. Yumi save stap pat long bigfala wok long wol ia tedei—kam tugeta blong Isrel. Yumi save help blong tekem i kam tugeta ol pikinini blong God i go long Kraes. Olsem we profet Jekob i bin tijim , “Mo yufala i kasem blesing; from we yufala i bin wok had oltaem wetem mi long plantesen blong mi mo bin holem ol komanmen blong mi, mo yufala i bin karem i kam long mi bakegen ol stret frut, … bae yufala i gat glad wetem mi from ol frut blong plantesen blong mi.”

Taem yumi fasem yumi wetem aksen blong stap ol kavenan disaepol, long wanem kaen level blong paoa blong yumi, rilesensip blong yumi wetem Papa mo Pikinini i kam moa bigwan, glad blong yumi i kam bigwan mo lukluk blong yumi blong taem we i no save finis i kam moa bigwan. Afta, yumi endao wetem paoa mo save filim glad long wan wei we God i sevem i stap blong ol tru kavenan disaepol blong God. Long tabu nem blong Jisas Kraes, amen.