Long Fored blong Yumi

Ol dia brata mo sista. Mi glad tumas blong stap ia wetem yufala. Mifala i lavem yufala, mifala i talem tangkyu from yufala, mo mifala i kasem blesing from ol prea blong yufala.

Presiden Russell M. Nelson i talem long las konfrens blong yumi se: “?Yu stap luk wanem i stap hapen long fored blong yumi? Mi prea se !bae yumi no mestem [glori] blong taem ia! Lod i stap muvum wok blong Hem i go hariap.”

Stap Muvum wok blong Hem I Go Hariap. “Muvum hariap” i wan toktok we i gat mining. Hem i minim blong stap muv hariap, stap spid, mo i impoten tumas. Jos i stap gro hariap, mo plan blong Kraes i stap hapen hariap tu. Mo yumi evriwan i pat blong hem.

Long Epril 1834, long Ketlan Ohaeo, Profet Josef Smit i karem tugeta evriwan we oli holem prishud, insaed long wan smol skul haos we i samples 14 skwea mita. Yumi save fulumap fulap long ol skul haos ia long ol grup blong twelef insaed long Konfrens Senta ia, mo bae i gat spes yet i stap. Josef Smit i bin talem, “hem i wan smol namba blong Prishud man nomo we yu luk long ples ia tedei long naet, be Jos ia bae i fulumap Not mo Saot Amerika—bae i fulumap wol.”

Profesi ia i stap kam tru “long fored blong [yumi].” Namba blong Jos Ia blong Jisas Kraes blong Ol Lata-dei Sent i stap gro long memba mo famli, ol misin mo misinari, ol mitinghaos mo tempol, mo long ol enrolmen blong yumi long seminari, institiut, mo yunivesiti raon long ful wol.

Yumi glad tumas blong stap long wol taem namba mo paoa blong Jos i stap kam bigwan, be moa impoten, i stap bigwan insaed long hat mo laef blong ol memba blong hem. Oli save yumi olsem ol disaepol blong Jisas Kraes. Yumi serem ol testemoni blong yumi abaot Hem, Jos blong Hem, ol fasin blong Hem, mo kavenan rod blong Hem. Yumi ol pipol blong Hem, mo Hem i Sevya blong yumi.

Mi laekem tumas wanem we Presiden Nelson i singaotem se “[glori] blong taem ia” mo talemaot bigfala tangkyu tumas long Lod from wok blong Hem. Mi leftemap tingting blong yumi blong stanap strong olsem ol disaepol blong Hem, olsem ol ae witnes blong profesi we i stap kam tru long ol taem bifo mo naoia.

Bae i gat olgeta blong agens we bae oli singaot se, “!Luk gud long ples ia! [mo] !Luk gud long [we]!,” semmak olsem we oli mekem long taem blong Profet Josef Smit. Be bae ol toktok blong olgeta i nating nomo long hae wok ia. Tingbaot ol toktok blong Josef Smit: “I no gat wan han we i no klin i save stopem wok ia blong stap gro; fasin blong givim hadtaem bae i bigwan, … be trutok blong God bae i gohed i go nomo, i klia, i stanap stret, i independen, kasem taem we bae i gotru long evri graon, i visitim evri kaen weta, i swipim evri kantri, mo i ring long evri sora, kasem taem ol stamba tingting blong God oli kamtru, mo Hae Jehova bae i talem se wok ia i finis.”

Long ol asaenmen blong mi long yia ia, mi bin luk long ae blong mi we Lod i stap muvum wok blong Hem i go hariap. Jos i stap bildim ol tempol long wan spid we i hariap tumas, mo hemia i givim wan janis long moa memba blong wosip insaed long haos blong Lod. Nambatu, misinari wok i stap karem ol bigfala namba blong sipsip i kam long yad blong gudfala man blong lukaot long sipsip, Jisas Kraes. Mo nambatri, Jos edukesen i stap long fulap ples naoia mo long plante defren wei, blong tijim olgeta we oli “lukaotem Jisas ia.”

Tedei, Jos i gat 367 tempol we oli stap long ol defren level blong stap disaenem mo bildim olgeta, o we oli stap wok finis. ?Hemia from wanem? Ansa ia oli talemaot long evri tempol: “Stap Tabu long Lod.” Tempol i openem rod blong ol blesing we oli moa hae we i blong wanwan long yumi, we i kam long Papa blong yumi long Heven. Ol brata mo sista, yumi stap muvum tabu fasin blong yumi hariap taem yumi stap laef klin inaf blong go long tempol, taem yumi stap wosip insaed long haos blong Lod, mo taem yumi mekem ol kavenan wetem God, blong yumiwan, mo long bihaf blong olgeta long narasaed vel.

Presiden Nelson i talem: “Ol atak blong enemi oli stap kam antap bigwan, oli strong moa, mo i gat fulap defren kaen. Nid blong yumi blong go long tempol oltaem, i bigwan moa bitim bifo. Mi askem yufala blong prea mo lukluk gud olsem wanem yufala i stap spendem taem blong yufala.” Long haos blong Hem, yumi save filim Hem we i tabu i stap, mo tabu pis.

Las yia mi bin gat spesel janis ia blong prisaed long dedikesen blong Mendosa Ajentina Tempol. Long mesej blong mi, mi bin tokbaot profesi blong Elda Melvin J. Ballard we hem i bin mekem long 1926, se wok blong Lod bae i gro slo blong wan taem long Saot Amerika, “semmak olsem wan ok tri i gro slo stat long nat [sid] blong hem. Bae i no hapen evriwan wantaem,” be taosen bae oli joenem Jos, mo ol kantri blong Saot Amerika bae oli kam “wan paoa insaed long Jos.” Mi bin luk profesi ia i kam tru long fored blong mi.

Wantaem, Mendosa ia we i smol olsem wan nat[sid], naoia i kam wan ok tri we i strong olgeta. Gro ia i stap hapen bakegen mo bakegen long evri graon mo aelan blong solwota.

Yumi luk Lod i stap muvum wok blong Hem i go hariap long ol misin. Long 2024, 80,000 misinari oli stap givim seves long 450 misin. Tetisikis long ol misin ia oli ol niu misin. Las yia, misinari wok i bin karem ova long 308,000 niu memba i kam insaed long Jos. Moa impoten long ol namba ia, hem i spirit blong kam tugeta we i stap karem ol sol i kam long Jisas Kraes mo gospel blong Hem.

Mi tingbaot tufala Aposol Brigham Yang mo Hiba C. Kimbol, we long 1839, tufala i go aot olsem ol misinari long ol Britis Aelan. Tufala i sik; mo tufala i lego ol famli blong tufala we oli sik mo pua. Nomata long hemia, tufala i klaem long wan wagun, mo taem oli save luk yet olgeta we oli lavem, Hiba i talem: “Bae yumitu stanap mo singaot wetem glad long olgeta.” Tufala i traehad blong stanap mo singaot “Hura, hura blong Isrel.”

Mi luk semmak glad ia blong wok blong Lod long Lima, Peru, taem mi bin mitim ol misinari long misinari trening senta mo ol misin long Lima. !Wan naes samting tumas blong luk! Mi bin luk wok i stap muv hariap long fored blong mi. Naoia i gat seven misin long siti blong Lima nomo.

Long en blong miting blong mifala, ol misinari oli bin gat wan spesel sapraes blong mi. Oli bin stanap mo singaot wetem glad, “Hura blong Isrel.” Bae mi neva fogetem taem ia; Mi wantem tumas blong yufala evriwan i stap long taem ia. Long fored blong mi, i gat ol misinari we oli putum “ol samting blong wol ia” long saed blong givim seves long Lod mo help blong muvum taem blong Hem we bae Hem i kam, i go hariap.

Yumi luk Lod i stap muvum hariap ol janis blong edukesen blong ol memba blong yumi mo olgeta we oli we oli no serem semmak bilif, raon long wol. Wan long ol samting we i mekem yumi defren olsem wan jos, hem i hamas yumi tokbaot edukesen. Lod i givim komanmen long ol fas dei blong Restoresen blong “lukaotem blong lanem samting, tru long stadi, mo tu, tru long fet.” Hemia i stap hapen tedei mo hemia tu i inaf blong yumi singaot wetem glad se “hura.”

Naoia, moa long 800,000 studen raon long wol oli enrol long seminari mo institiut, mo hemia i namba we i moa hae blong ol enrolmen insaed long histri blong Jos. Ol yut blong yumi oli kam tugeta long ol defdefren wei, long ol klas we i stat long eli moning , truaot long dei, mo long naet. Hemia fes tu fes onlaen o stadi long hom. Oli wan strong mo stret ami, we oli stap kasem paoa tru long wanwan long olgeta taem oli lanem abaot Jisas Kraes, folem Hem, mo testifae abaot Hem olsem Pikinini blong God.

Samples long Septemba las yia, mi bin toktok long wan divosen long wan stadiom we i fulap long ol studen blong seminari mo institiut, mo ol papa mo mama blong olgeta, long Yunivesiti blong Yuta. Atendens blong olgeta i talem fulap samting abaot hamas oli wantem blong save mo folem Jisas Kraes. Mesej blong mi long ol studen ia i klia: Givim semmak taem long Lod. Mi givim kaonsel long olgeta blong balensem stadi blong olgeta wetem fasin blong lan we i tru mo i moa hae, semmak long stadi abaot “Pikinini blong God ya we i laef.”

Mi askem semmak samting long yufala evriwan tedei: Nomata wanem i stap long lis blong yu blong “ol samting blong mekem,” givim semmak taem ia long Lod, be i no fri taem, blong mekem skripja stadi blong yuwan, famli stadi long Kam Folem Mi, prea, ol koling blong Jos, wok blong givhan, stap tekpat long sakramen, stap wosip long tempol, mo blong stap tingting hevi long ol samting blong God. Lod mo Sevya blong yumi i talem: “Lan long mi, nao bambae yufala i save faenem pis long laef blong yufala.” Mekem tok blong Hem. Mo givim semmak taem long Hem.

Presiden Nelson i talem: “Mi plis long yu blong letem God i stap win insaed long laef blong yu. Givim Hem wan gudfala pat blong taem blong yu. Taem yu mekem olsem, tekem not long wanem i hapen long gud paoa blong faea blong spirit blong yu.”

Yumi luk faea ia i stap gro long ol seminari, institiut, mo yunivesiti blong Jos. Long ol ples olsem, Lod i kam faswan. Mo Hem i mas faswan long laef blong yumi wanwan.

Wan nara ples we i soem hamas edukesen i stap gro insaed long Jos hem i BYU–Pathway Raon long Wol. Raon long wol, enrolmen hem i bin kasem kolosap 75,000 mo hem i gohed blong stap gro hariap. Plante oli ol memba, mo moa long 24,000 oli stap long Afrika. Stamba tingting blong Pathway hem i blong gat akses long edukesen. Blong finisim ol klas ia, i minim blong gat akses blong save wok, akses long wok i minim blong gat wan laef we i moa gud blong ol famli, mo moa janis blong givim seves long Lod.

Taem mi stap long wan miting wetem ol stek lida long Yuganda, mi lanem se ful stek presidensi i enrol long BYU–Pathway. Moa yumi rere long laef ia mo long saed blong spirit,—moa yumi stap longwe long ol trik blong enemi. Tingbaot ol toktok blong Pita: “[Devel] i olsem wan laeon we i stap singaot bigwan, i stap lukaot man blong i kakae.”

Mi luksave se long medel blong ol gud nius blong gospel, i gat olgeta we oli traehad, we oli gat ol jalenj blong fet, ol tu tingting, mo ol kwestin we i luk olsem i nogat ol ansa blong hem. Ol brata mo sista, Jisas Kraes hem i ansa. Stat wetem Hem. Lukaotem han blong Hem insaed long laef blong yu. Lisin long Hem. “Yufala i no letem tingting blong yufala i trabol.” Hemia Hem i talem bifo Getsemane, bifo Hem i karem kros blong Hem krosem ol rod blong Jerusalem, bifo long Golgota, long ples we Hem i finisim sakrifaes blong Atonmen blong Hem—wanem we Hem nomo, stret Pikinini blong God, i save mekem.

Save se Hem i andastanem. Hem i tekem evri sin blong yumi long Hemwan, evri mistek, harem nogud, hadtaem mo temtesen, blong mekem se yumi save laef wetem Papa blong yumi long Heven blong taem we i no save finis. Hem i talem, “Lukluk long mi long evri tingting blong [yufala]; no gat tu tingting, no fraet.” Fet long Jisas Kraes i save leftemap yu mo mekem sol blong yu we i gat soa i kam oraet bakegen. Trastem Hem mo bae yu muvum taem blong yu blong gobak long “ol han blong lav blong hem” hariap.

Mi talem bakegen ol toktok blong profet blong yumi we i stap laef: “?Yu stap luk wanem i stap hapen long fored blong yumi? Mi prea se !bae yumi no mestem [glori] blong taem ia! Lod i stap [muvum wok blong Hem i go hariap].” Letem yumi singaot olsem ol disaepol blong taem blong yumi, “Hura blong Isrel” taem yumi stap rere from Lod mo Sevya blong yumi we bae i kambak. Long nem blong Jisas Kraes, amen.