Plan Ia blong Sore

Las yia long Epril konfrens, kwiktaem afta long gudfala nius ia se Jos i pemaot graon long Ketlan Tempol, Presiden Russell M. Nelson i invaetem yumi blong stadi long dedikesen prea blong Ketlan Tempol, we oli raetemdaon i stap long seksen 109 blong Doktrin mo Ol Kavenan Prea blong dedikesen, Presiden Nelson i talem, “hem i wan tijing blong olsem wanem tempol i givim paoa long saed blong spirit long yu mo mi blong fesem ol jalenj blong laef long ol las dei ia.”

Mi sua se stadi blong yu long seksen 109 i givim ol niu tingting we i blesem yu. Long naet ia, bae mi serem sam samting we mi bin lanem taem mi folem invitesen blong profet blong yumi. Pis we i kam tru stadi blong mi i lidim mo rimaenem mi se Lod i gat bigfala sore mo we plan ia blong Papa blong yumi long Heven blong sevem man, i tru se i wan plan blong sore.

Olsem we yu save, “oli leftemap tingting blong ol misinari we oli jes singaotem olgeta blong kasem tempol endaomen blong olgeta kwik taem olsem we i posibol mo blong go long tempol plante taem olsem we situesen blong olgeta i save letem olgeta.” Taem oli endao, olgeta tu “oli save stap olsem ol wokman blong tempol bifo oli statem misinari seves blong olgeta.”

Taem we i yu spendem insaed long tempol bifo yu go long misinari trening senta (MTS) i save kam wan naesfala blesing blong ol niufala misinari, taem oli lanem moa abaot ol tempol kavenan, bifo oli stap serem ol blesing blong ol kavenan ia wetem wol.

Be blong stap stadi long seksen 109, mi lanem se, insaed long tempol, God i givim paoa long ol niu misinari—yes, long yumi evriwan—long wan moa wei we i tabu. Long prea blong dedikesen, we i kam tru long revelesen, profet Josef Smit i prea se, “taem ol wokman blong yu oli go aot long haos blong yu … blong oli testifae long nem blong yu,” ol “hat” blong “evri pipol bae i kam sofsof”—tugeta “ol bigfala man blong wol ia” mo “evri pua man, evriwan we oli stap long nid, mo olgeta we oli gat hadtaem … bae hat blong olgeta i kam sofsof.” Hem i prea se “ol kwik tingting blong olgeta [bae] i go lus long fored blong trutok, mo ol pipol blong yu oli gat gud ples long ae blong evriwan; blong mekem se evri en blong wol i save se mifala, ol wokman blong yu, i bin harem voes blong yu, mo se yu yu sendem mifala i go.”

Hemia i wan naesfala promes blong wan misinari we oli jes singaotem hem—blong gat “ol kwik tingting blong olgeta “i go lus long fored blong trutok,” blong “ol pipol blong yu oli gat gud ples long ae blong evriwan,” mo blong wol i save se Lod i sendem olgeta. I tru, yumi wanwan i nidim ol semmak blesing ia. Hem i wan blesing blong mekem ol hat i kam sofsof taem yumi mit mo joen tugeta wetem ol neba mo olgeta we yumi wok wetem. Prea blong dedikesen i no eksplenem stret olsem wanem taem we yumi spendem insaed long tempol bae i mekem hat blong ol narawan i kam sofsof, be mi save se hemia i joen wetem hamas taem we yumi gat insaed long haos blong Lod, i mekem hat blong yumiwan i kam sofsof taem yumi stap putum tingting blong yumi stap nomo long Jisas Kraes mo sore blong Hem.

Taem mi stap stadi long dedikesen prea blong Ketlan, mi bin sek se Josef i prea blong kasem sore blong Lod, bakegen mo bakegen—from ol memba blong Jos, from ol enemi blong Jos, from ol lida blong kantri,from ol nesen blong wol, mo, blong hemwan nomo, hem i prea long Lod blong tingbaot hem mo blong gat sore long Ema blong hem we hem i lavem tumas mo ol pikinini blong tufala. Mo blong hemwan, hem i askem long Lod blong tingbaot hem mo blong gat sore long Ema we hem i lavem tumas mo ol pikinini blong tufala.

Josef i sud filim olsem wanem afta long wan wik, long dei blong Ista, 3 Epril, 1836, long Ketlan Tempol, taem we Sevya i bin kamkamaot long hem mo Oliva Kaodri mo, olsem we i stap long seksen seksen 110 blong Doktrin mo Ol Kavenan, “Mi akseptem haos ia, mo nem blong mi bae i stap long ples ia; mo bae mi kamaot long ol pipol blong mi wetem sore insaed long haos ia.” Promes blong sore ia i mas gat wan spesel mining long Josef. Mo olsem we Presiden Nelson i bin tijim long las Epril, promes ia tu, “i go long evri tempol we oli dediketem tedei.”

I gat plante wei tumas we yumi wanwan i save faenem sore ia insaed long haos blong Lod. Hemia i tru stat long taem we Lod i komandem blong fastaem, Ol Man Isrel blong bildim wan tabenakol mo blong putum long medel blong hem, “ples [ia] we Hae God i stap tekem sin blong ol man long hem.” Insaed long tempol, yumi faenem sore blong Lod tru ol kavenan we yumi mekem. Ol kavenan ia, wetem baptaes kavenan, oli fasem yumi i go long Papa mo Pikinini mo givim long yumi bigfala akses long wanem we Presiden Nelson i bin tijim long yumi we i “wan spesel fasin blong lav mo sore … we oli singaotem se hesedlong Hibru lanwis.

Yumi faenem sore blong Lod tru long janis ia blong stap sil wetem ol famli blong yumi blong taem we i no save finis. Insaed long tempol, yumi kam blong andastanem tu wetem bigfala klia tingting se Kriesen, Foldaon, atonmen mo sakrifaes blong Sevya, mo wanem yumi save mekem blong go insaed bakegen long ples blong Papa blong yumi long Heven—evri pat blong plan ia blong sevem man—i wan wei blong soemaot fasin blong sore. Yumi save talem se plan ia blong sevem man i wan plan blong hapines we i stret, from se hem i wan “plan blong fasin blong sore.”

Mi talem tangkyu from naesfala promes insaed long seksen 110 we Lod bae i soemaot Hemwan tru long fasin blong sore blong Hem insaed long ol tempol blong Hem. Mi talem tangkyu tu from wanem we seksen ia i talemaot abaot olsem wanem Lod bae i soemaot fasin blong sore blong Hem long enitaem we yumi, olsem Josef, i askem fasin blong sore long Lod.

Prea blong Josef Smit blong kasem fasin blong sore blong Lod insaed long seksen 109 i no bin fastaem blong hem blong i prea mo i kasem revelesen tru long insperesen. Long Tabu Bus, yang Josef i bin prea, i no blong save nomo wijwan Jos i tru, be hem i talem tu se hem i “singaot i go long Lod blong kasem sore, from i no gat wan we mi save go long hem blong kasem sore.” Long sam wei, hem i luksave se hem i nidim sore we Lod nomo i save givim blong i help blong openem ol windo blong heven. Tri yia i pas, enjel Moronae i kamkamaot, folem wanem we Josef i bin talem long prea blong hem se “askem strong long God we I Gat Olgeta Paoa blong kasem fogivnes from ol sin mo ol rong blong [hem].”

Wei ia blong kasem revelesen we i folem wetem wan prea blong kasem sore i wan we ol skripja oli stap tokbaot plante. Inos i bin harem voes blong Lod nomo afta we hem i stap prea from fogivnes. Papa blong king Lamonae i jenisim laef blong hem, i stat wetem prea blong hem: “Bae mi sakem evri sin blong mi blong save yu.” Maet yumi no kasem blesing blong gat eksperiens long ol situesen olsem, be long olgeta we samtaem oli stap traehad blong filim ol ansa blong prea blong olgeta, blong lukaotem sore blong Lod i wan long ol wei we i gat moa paoa blong filim witnes blong Tabu Spirit.

Wan semmak prinsipol we oli bin tijim we i naes tumas insaed long Moronae 10:3–5. Plante taem yumi mekem ol ves ia i sot mo tijim se, tru long prea we i kam wetem tru hat, yumi save lanem sapos Buk blong Momon i tru o no. Be ol sot ves ia oli save sakemaot impoten wok blong sore. Lisin long olsem wanem Moronae i stat wetem fasin blong askem strong se: “mi wantem askem strong long yufala se, taem we bae yufala i ridim ol samting ia, … se bae yufala i save tingbaot hamas sore Lod i bin gat long ol pikinini blong ol man, stat long taem we hem i mekem Adam we i kam daon kasem taem we bae yufala i kasem ol samting ia, mo tingting hevi long hem insaed long hat blong yufala.”

Moronae i no askem strong nomo long yumi blong ridim ol samting ia—ol histri we bae hem i silim—be tu, blong tingting hevi insaed long hat blong yumi, wanem Buk long Momon i talem abaot “hamas sore Lod i bin gat long ol pikinini blong ol man.” Hem i blong stap tingting hevi nao long sore blong Lod we bae i mekem yumi rere blong “askem God, Papa we i no Save Finis, long nem blong Kraes, sapos ol samting ia oli no tru.”

Taem yumi tingting hevi long Buk blong Momon, yumi save askem: ?Hem i tru tumas, taem Alma i bin tijim, se plan ia blong sore blong God i givim hop se evri wan we oli stap laef long wol ia bae oli girap bakegen long ded mo se evri pat blong pat blong bodi blong olgeta bae oli kam stret evriwan bakegen”? ?Amulek i talem tru—se sore blong Sevya bae i sevem yumi aot long evri risal blong jastis we i no gud be i no blong yumi fesem yumiwan, be i no olsem from Hem i “[raonem yumi] wetem ol han blong seft”?

Hem i tru se, olsem we Alma i testifae, se Kraes i no safa nomo from ol sin blong yumi, be tu from “ol soa long bodi mo fulap hadtaem” blong yumi, mekem se hem i save “olsem wanem blong helpem ol man blong hem long saed blong ol samting we oli no strong long hem? Hem i tru se Lod i gat fulap sore olsem we King Benjamin i bin tijim, se, olsem wan presen we i fri, Hem i ded “i pem praes from ol sin blong olgeta we oli bin foldaon tru long loa we Adam i bin brekem, we oli bin ded be oli no bin save wanem nao God i wantem olgeta blong mekem, o olgeta we oli bin mekem sin be oli no bin luksave se samting we oli stap mekem i rong”?

Hem i tru se, olsem we Lihae i talem se, “Adam i bin foldaon blong mekem se man i save stap; mo ol man oli stap, blong oli save gat glad”? I tru se, olsem we Abinadae i testifae, taem i stap kwotem toktok blong Aesea, se Jisas Kraes i bin “karekil from ol sin ya blong yumi; Panis ya we hem i kasem, i mekem we yumi gat pis; Nao ol sobodi ya we hem i karem, i mekem yumi i gud bakegen”?

Long evri samting ia, plan ia blong Papa olsem we oli tijim insaed long Buk blong Momon, ?hem i tru se i gat bigfala sore olsem ia? Mi testifae se hemia i tru mo se pis we i kam mo ol tijing blong sore we i fulap long hop insaed long Buk blong Momon, oli tru.

Mi save pikjarem yet long maen se sam oli stap traehad, nomata ol prea mo hamas yu stap fetful, blong luksave promes blong Moronae se Papa long Heven “bae hem i soemaot trutok blong ol samting ia long yufala, tru long paoa blong Tabu Spirit.” Mi save traehad ia from se mi bin filim, plante yia i pas, taem miwan mi bin rid blong fastaem insaed long Buk blong Momon, i no bin givim wan kwik o klia ansa long ol prea blong mi.

Sapos yu stap traehad, mi invaetem yu blong folem kaonsel blong Moronae blong tingting hevi long plante wei we Buk blong Momon i stap tijim abaot “hamas sore Lod i bin gat long ol pikinini blong ol man”? Folem eksperiens blong mi, mi hop se taem yu mekem olsem, pis blong Tabu Spirit i save kam insaed long hat blong yu mo bae yu save save, bilivim mo filim se Buk blong Momon mo plan ia blong sore we oli stap tijim oli tru.

Mi talemaot tangkyu blong mi from bigfala plan ia blong sore mo tingting we Sevya i gat blong wantem mekem hemia i hapen. Mi save se Hem bae i soemaot sore blong Hem insaed long tabu tempol blong Hem mo long evri pat blong laef blong yumi, sapos yumi lukaotem Hem. Long nem blong Jisas Kraes, amen.