Lav blong God

Long sesen blong sama, taem mifala i stap travel long wan ples longwe long taon, famli blong mitufala i bin spenem wan naet blong slip aotsaed andanit long skae we i nogat tumas klaod. Mifala i save luk gud laet blong grup blong ol sta we i fas tugeta, mo laet blong sta we i foldaon. Taem mifala i stap sapraes long naesfala kriesen blong God, mifala i filim fasin blong respek i joenem mifala long Hem. Ol smosmol pikinini blong mitufala, we oli bin gro ap long Hong Kong, oli neva eksperiensem wan samting olsem bifo. Oli askem blong save sapos hemia i semmak skae ia nomo we mifala i gat long ples we mifala i stap long hem. Mi traem blong eksplenem long olgeta se i semmak skae ia nomo, be ea mo ol polusen blong laet long ples we mifala i stap laef long hem, i blokem mifala blong no save luk ol sta ia nomata se ol sta ia i stap.

Ol skripja i tijim yumi se “[fet] i givim yumi hop mo hem i soemaot long yumi ol samting ya we yumi no save luk, be oli stap.” Taem ol samting blong wol oli traem blong blokem lukluk blong yumi long saed blong spirit, taem yumi eksasaesem fet long God mo Pikinini blong Hem Jisas Kraes, yumi kasem strong filing se Tufala i ril mo filim sore blong Tufala long yumi.

Long Buk blong Momon, profet Lihae i bin luk “wan tri, we frut blong hem i gud tumas blong i save mekem man i hapi” mo i “moa swit bitim evri frut.” Taem we hem i bin tekem mo kakae long frut blong tri ia, hem i fulumap sol blong hem wetem bigfala glad we i bigwan tumas; taswe, hem i stat blong wantem tumas se famli blong hem bae i tekem mo kakae long frut ia tu. Yumi lanem se tri ia i ripresentem “lav blong God,” mo olsem Lihae, yumi save kasem tu witnes blong glad blong God taem yumi invaetem Hem i kam long laef blong yumi.

Jisas Kraes i ripresentem lav ia blong Papa long Heven long yumi. Tru long atonmen mo sakrifaes blong Hem, Jisas Kraes i tekem long Hemwan ol sin blong yumi mo skin blong bodi blong hem i bin kasem ol mak blong kil from ol rabis fasin blong yumi. Hem i bin tekem long Hemwan ol soa long hat blong yumi, i tekem ol harem nogud blong yumi; mo i tekem long Hem ol soa blong bodi mo ol sik blong [yumi]. Hem i sendem Tabu Spirit blong kamfotem yumi, mo ol frut blong Spirit we i glad, pis, mo fet we i fulumap yumi wetem hop mo lav.

Lav blong God i stap blong evri man, plante oli lukaotem wetem tru tingting, taem ol nara man oli wantem blong filim lav blong God be oli no bilivim se oli save kasem. Sam long olgeta oli gohed blong traem blong filim lav blong God. Ol skripja mo ol profet blong Lod i tijim yumi se yumi save eksperiensem lav blong God oltaem, tru long gladhat blong Jisas Kraes, yumi sakem sin evri taem, fogivim gud ol nara man, traehad blong kipim ol komanmen, putum nid blong ol narawan i kam faswan mo givim seves long olgeta. Yumi filim lav blong God taem yumi mekem ol samting we i karem yumi kam kolosap long Hem, olsem blong toktok wetem Hem tru long prea evri dei mo stadi long skripja, mo stop blong mekem ol samting we i mekem yumi stap longwe long Hem, olsem fasin blong gat hae tingting, fasin blong raorao, mo fasin blong no stap obei.

Presiden Russell M. Nelson i invaetem yumi blong “karemaot, wetem help blong Sevya, ol olfala toti long laef blong yumi” mo blong “putum long saed ol rabis fasin.” Hem i leftemap tingting blong yumi blong “sapotem fandesen blong yumi long saed blong spirit” tru long fasin blong “stap mekem laef blong yumi i lukluk nomo long Sevya mo long ol odinens mo kavenan blong tempol blong Hem.” Hem i promes se “taem yumi kipim ol tempol kavenan blong yumi, yumi kasem moa paoa ia long Lod blong mekem yumi kam strong moa. Yumi eksperiensem klin lav blong Jisas Kraes mo Papa long Heven fulwan!”

Mi gat wan fren we i kasem blesing ia blong gat wan naesfala famli mo wan gudfala wok. Ol samting oli jenis taem hem i kasem wan sik mo i mekem hem i nomo save wok mo afta i folem wetem wan divos. Ol yia long taem ia i bin had tumas, be lav blong hem long ol pikinini blong hem mo ol kavenan we hem i bin mekem wetem God i bin helpem hem. Wan dei hem i harem se fas waef blong hem, i mared bakegen mo i bin mekem wan rikwes blong kanselem tempol siling blong tufala. Hem i harem nogud mo i konfius. Hem i lukaotem pis mo andastaning long haos blong Lod. Long dei afta long visit blong hem long tempol, mi kasem wan mesej we i kam long hem, hem i raetem:

“Mi bin gat wan gudfala eksperiens long tempol las naet. Mi ting se i klia se mi gat wan filing blong kros i stap yet wetem mi. Mi luksave se mi mas jenis, mo mi bin stap prea ful wik blong mi mekem samting ia. Las naet long tempol mi filim Spirit i karemaot filing blong kros ia long hat blong mi. Hem i wan gudfala filing blong kam fri aot long samting ia. Filing ia we i hevi tumas we i stap long mi, i bin kamaot.

Taem hem i gohed blong gat ol jalenj blong hem, fren blong mi i tingbaot eksperiens ia long haos blong Lod we paoa blong lav blong God i bin helpem hem blong kam moa kolosap long God, i mekem hem i gat moa hop abaot laef mo i no wari tumas abaot fiuja.

Taem yumi eksperiensem lav blong God, ol wok blong Lod we i hevi i kam isi, wetem bigfala glad mo fasin blong save wet longtaem. Yumi gat tras ia se God bae i tingbaot ol kavenan we Hem i mekem wetem yumi, Hem i visitim [yumi] long ol hadtaem blong [yumi], mo mekem [yumi] i go fri, aot long fasin blong stap slef. Bae yumi wantem tu blong serem glad ia wetem famli blong yumi mo wetem olgeta we yumi lavem. Olsem wetem famli blong Lihae, wanwan man i gat fridom blong jus, sapos i wantem kakae frut ia o no, be janis blong yumi i blong lavem, serem mo invaetem long wan wei se olgeta we yumi lavem i save filim lav blong God.

Blong helpem ol narawan i filim lav blong God, yumi nidim blong wok long ol fasin blong yumiwan olsem hemia blong Kraes, olsem fasin blong gat tingting we i stap daon, bigfala lav, filing blong sore, mo fasin blong save wet longtaem, mo helpem ol narawan i tanem olgeta i go long Sevya taem oli folem tufala mo bigfala komanmen ia blong lavem God mo ol man we oli stap raonabaot long yumi.

Wan long ol boe blong mi i faenem i had blong stap insaed long wan grup, taem we hem i yang. Mi mo waef blong mi i bin prea blong save olsem wanem blong helpem hem, mo mitufala i glad blong mekem wanem we Lod i wantem mitufala blong mekem. Wan dei mi gat wan filing blong askem presiden blong kworom blong ol elda sapos hem i save wan we i stap long nid we mi mo boe blong mi i save go mo visitim hem. Afta sam tingting, hem i askem mitufala blong go mo visitim wan woman wetem wan bigfala sik, mo wetem raet we branj presiden i givim, blong karem sakramen i go long hem evri wik. Mi hapi tumas be mi wari tu se olsem wanem bae boe blong mi i ansa long komitmen blong mitufala ia blong evri wik.

Long fas visit blong mitufala hat blong mitufala i sore bigwan long gudfala woman ia, taem hem i stap gohed blong filim soa long bodi blong hem. Hem i glad tumas from sakramen, mo mitufala i glad blong stap visitim hem mo hasban blong hem. Afta long sam visit, wan Sandei mi bin aot mo mi no save folem boe blong mi, be mi rimaenem hem long asaenmen blong mitufala. Taem mi kasem haos, mi no save wet blong harem wanem i bin hapen long visit ia. Boe blong mi i ansa se hem i no ting se ol yang man long klas blong hem oli save mekem ol gudfala samting olsem. Mo i gohed blong talem se hem i karem brata blong hem blong i help, mo se sakramen i go gud, be sista ia i bin harem nogud long ful wik ia from hem i bin invaetem ol fren blong hem blong kam long hom blong hem blong wajem ol muvi, be vidio plea i no bin wok. Boe blong mi i talem se hem i lukaotem onlaen, i faenem problem, mo fiksim vidio plea hariap nomo. Hem i filim se hem i save mekem wan samting, hem i hapi, mo i trastem se hem i bin mekem wan samting we i mekem woman ia i harem gud. Hem i filim lav blong God blong hem.

Nomata ol gudfala hadwok we yu mekem, laef i fulap long ol hadtaem, sapos yu filim se ol prea blong yu oli no bin harem, o yu no save filim lav blong God, plis save se evri hadwok we yu mekem i impoten mo, olsem ol sta we i stap antap long yumi, Papa long Heven mo Jisas Kraes i save, i harem mo i lavem yumi.

Long wan taem, taem ol disaepol blong Hem oli stap insaed long wan bot, “wef [i stap] sakem bot ia olbaot,” Sevya i wokbaot i kam kolosap long olgeta long wota mo talem gud long olgeta, se “Yufala i no harem nogud. Mi nomo ya. Yufala i no fraet.” Taem Pita i wantem blong wokbaot i go long Sevya long wota, Jisas i mekem saen long hem i talem, “Kam.” Taem Pita i gat tu tingting hem i stat blong draon, Sevya i pusum han blong Hem kwiktaem blong kasem hem mo karem hem i kam long sefples taem i talem “?Man, from wanem yu gat tu tingting olsem? !Bilif blong yu i smol tumas!”

?Taem ol hadtaem mo jalenj i kam long laef blong yumi, bae yumi wantem blong stap hapi mo gat strong tingting?? ?Olsem wanem yumi save tingbaot se Sevya i no save lego yumi mo se Hem i stap kolosap long yumi samtaem long ol wei we yumi no luksave? ?Yumi glad blong go long Hem wetem fet speseli taem yumi luk rod we i stap long fored blong yumi i no isi? ?Mo long wanem wei Hem i leftemap yumi i go long sefples taem yumi stap traehad? ?Olsem wanem yumi save stap fetful blong lukluk long Hem long evri tingting, mo nogat tu tingting o fraet?

Sapos yu wantem blong filim moa lav blong God i fulap long laef blong yu, mi invaetem yu blong tingting long olgeta ia:

• Nambawan, oltaem stop smol blong tingbaot se yu yu wan pikinini blong God mo tingting long ol samting we yu stap glad from.

• Nambatu, prea evri dei, askem Papa long Heven blong i helpem yu save huia raon long yu i nidim blong filim lav blong Hem.

• Nambatri, askem wetem tru tingting wanem yu save mekem blong helpem man ia blong save filim lav blong God.

• Nambafo, folem smol voes blong Tabu Spirit long ol insperesen we yu kasem.

Sapos yumi prea evri taem mo askem long bihaf blong ol narawan, God bae i soem long yumi ol pipol we yumi save helpem olgeta. Mo sapos yumi folem smol voes ia, yumi save kam ol ansa blong prea blong olgeta. Taem yumi mekem olsem, bae yumi kasem ol ansa long ol prea blong yumi, mo bae yumi filim lav blong God long laef blong yumiwan.

Sam manis i pas taem mi mo waef blong mi i stap travel i go long Vietnam, mitufala i stap long wan flaet we i tekem ples long taem blong wan strong win. Win i bin strong mo nogud, mo ol klaod oli tudak, hevi ren, mo mitufala i save luk laetning long windo blong mitufala. Afta wan longfala mo rabis weta ia, plen blong mifala i save flae aot i go antap long klaod blong strong win ia mo i go long wan gudfala ples we hem i save flae gud long hem. Mifala i bin tingbaot bakegen Papa long Heven mo Jisas Kraes mo filim bigfala lav blong Tufala long yumi.

Ol dia fren, olsem wan we i bin eksperiensem lav blong God, mi glad blong talem witnes blong mi se Sevya Jisas Kraes i lav blong God. Lav blong Hem long yumi i stret evriwan, blong yumiwan, mo i stap oltaem. Taem yumi fetful blong stap folem Hem, bae yumi fulap wetem lav blong Hem mo bae yumi stap olsem wan laet haos we i lidim ol narawan i kam long lav blong Hem. Long nem blong Jisas Kraes, amen.