Ol Blesing We Oli Givim Riwod

Blong stap givim seves insaed long Prisaeding Bisoprik, mi bin gat ol janis blong mitim ol Lata-dei Sent raon wol long ol defren ples mo ol kalja. Mi gohed blong kasem insperesen tru long strong fet mo divosen blong yufala i go long Lod Jisas Kraes. Bakegen mi bin go tru tu plante taem long ol defren, ol had situesen we fulap long yufala i stap fesem— ol jalenj olsem sik, disabiliti, ol risos we i limit, smol janis blong mared o skul, abiusum ol narawan, mo ol nara samting we i blong stopem yumi. Samtaem, ol tes ia bae i mekem i had long progres blong yu mo jalenjem ol tru efot blong yu blong laef folem gospel fulwan, mo mekem i moa had blong givim seves, wosip, mo fulfilim ol tabu diuti blong yu.

Ol dia fren blong mi, sapos yu stap filim se i gat limit o wari from ol situesen blong laef blong yu, mi wantem yu blong save hemia: Lod i lavem yufala wanwan. Hem i save ol situesen blong yu, mo doa blong ol blesing blong Hem i stap open bigwan long yu nomata ol jalenj we yu stap fesem.

Mi bin lanem trutok ia tru long wan eksperiens blong miwan se, nomata se hem i no impoten blong fastaem, hem i putum wan filing we i stap oltaem long mi. Taem mi gat 22 yia, mi stap givim seves long Franis Ea Fos long Paris, mo mi sapraes blong lanem se Elda Neal A. Maxwell, wan Aposol blong Lod, bae i toktok long wan konfrens long Champs‑Élysées. Be, bifo long taem ia, mi kasem oda blong draevem wan senia ofisa blong go long eapot long semmak taem we bae konfrens i stat.

Mi bin filim nogud. Be wetem strong tingting blong go, mi dropem ofisa long eapot mo hariap blong gobak long konfrens. Afta we mi faenem wan ples blong paking, mi ron hariap i go daon kasem long Champs-Elysées long ples blong miting, taem mi stap pulum nogud win blong mi we i gat faef minit nomo i stap bifo we miting ia bae i finis. Taem we mi go insaed nomo, mi harem Elda Maxwell i talem, “naoia bae mi givim long yufala wan blesing blong wan aposol.” Long taem ia, mi gat wan naes naesfala eksperiens long saed blong spirit, we bae mi no save fogetem. Long taem ia, mi bin fulap long Spirit, mo ol toktok blong blesing ia i go insaed long evri pat blong sol blong mi olsem se mesej ia i blong mi.

Wanem mi bin eksperiensem long dei ia i wan smol be paoa we i soem kamfot long plan blong God blong ol pikinini blong Hem: Taem ol situesen oli ova long kontrol blong yumi mo blokem yumi blong mekem i hapen ol stret tingting blong hat blong yumi, Lod bae i givimbak long ol wei we i letem yumi blong kasem ol promes blesing blong Hem.

Trutok blong leftemap tingting ia oli stap insaed long tri ki prinsipol we bae yu faenem insaed long gospel blong Jisas Kraes we i kambak:

1. God i lavem wanwan long yumi i stret gud evriwan. “Hem i askem [yumi] evriwan blong kam long hem mo tekem pat blong gud fasin blong hem.” Plan blong Hem blong fasin blong pemaot man i givim hop se evriwan, i nogat eskius, bae oli givim wan janis we i stret blong wan dei oli kasem ol blesing blong fasin blong sevem man mo kam olsem god.

2. From we God, Hem i tugeta, stret mo gat sore, mo plan blong Hem i stret gud evriwan, bae Hem i no mekem yumi akaontebol from ol samting we i moa long kontrol blong yumi. Elda Neal A. Maxwell i bin eksplenem se “God … i no tekem ol tingting blong hat mo aksen blong yumi nomo wetem sore, be tu, ol level blong hadtaem we defdefren situesen i fosem long yumi.”

3. Tru long Jisas Kraes mo Atonmen blong Hem, yumi save faenem paoa blong stap strong mo long en winim evri jalenj blong laef ia. Olsem Alma i bin tijim, Sevya i no tekem long Hemwan nomo ol sin blong olgeta we oli sakem sin be tu “ol soa blong bodi mo ol sik blong ol pipol blong hem” mo “ol samting blong olgeta we oli no strong long olgeta.” Hemia i go moa bitim fasin blong pemaot yumi from ol mistek blong yumi, sore mo gladhat blong Lod i helpem yumi tru long ol samting we i nogat jastis, i no inaf, mo i gat limit long eksperiens we oli fosem long laef blong yumi long wol ia.

Blong kasem ol blesing ia we oli givim riwod oli kam wetem sam kondisen. Lod i askem yumi blong mekem “evri samting we yumi save mekem” mo blong “givim ol ful sol blong [yumi] olsem wan ofring long hem.” Hemia i nidim wan tingting blong hat we i dip, wan tru mo fetful hat, mo hadwok blong yumi we i moa hae blong kipim ol komanmen blong Hem mo stretem tingting blong yumi wetem tingting blong Hem.

Taem ol series efot blong yumi i no hapen folem wanem we yumi tingting long hem folem ol situesen we i moa long kontrol blong yumi, Lod i save akseptem ol tru tingting blong hat blong yumi olsem wan klin ofring. Presiden Dallin H. Oaks i tijim, “Bae yumi kasem blesing from ol stret mo gud tingting blong hat blong yumi nomata se sam situesen aotsaed i bin mekem i no posibol long yumi blong putum long aksen ol tru tingting blong hat ia.”

Taem we Profet Josef Smit i stap wari long brata blong hem Alvin, we i bin ded mo no kasem ol impoten gospel odinens, hem i kasem revelesen ia we i givim kamfot: “Mo evriwan we bae oli ded, stat long naoia i go, mo oli no kasem save long gospel ia, bae oli akseptem nomo wetem ful hat blong olgeta, bae oli gat ples [long selestial kingdom blong God].” Mo Lod i ademap, “From we mi, Lod, bae mi jajem evri man folem wok blong olgeta, folem wanem we hat blong olgeta i wantem.”

Wanem we i impoten long Lod i no se bae yumi save be sapos bae yumi wiling blong mekem evri samting we yumi save mekem blong folem Hem olsem Sevya blong yumi.

Wantaem wan fren i givim kamfot long wan yang misinari we i stap harem nogud from hem i rilis eli folem ol risen blong helt blong hem, nomata ol tru prea blong hat blong hem mo strong tingting blong wantem blong givim seves. Fren ia i bin serem wan skripja we Lod i talemaot se taem ol pikinini blong hem oli “go wetem evri strongfala paoa blong olgeta” mo “no stop blong wok strong wetem strong tingting” blong mekem i hapen ol komanmen blong Hem, “mo taem ol enemi blong olgeta [we i gat ol situesen long laef blong yumi] oli kam agensem olgeta mo blokem olgeta blong mekem wok ia, luk, hem i stap long tingting blong mi, blong nomo askem wok ia long ol han blong olgeta [pipol], be blong akseptem ofring blong olgeta.”

Fren blong mi i testifae long yang man ia se God i save se hem i bin givim bes blong hem blong ansa long kol blong givim seves. Hem i leftemap tingting blong hem se Lod i akseptem ofring blong yang man ia mo se ol blesing we oli promesem long evri fetful misinari bae Lod i no holembak long hem.

Ol blesing blong Lod we oli givim riwod plante taem oli kam tru long fasin blong stap kaen mo seves blong ol narawan we oli helpem yumi blong mekem i hapen wanem we yumi no save mekem yumiwan. Mi tingbaot wan taem we mitufala i stap longwe long wan long pikinini gel blong mitufala long Franis, mitufala i filim se i nogat help blong sapotem hem afta we hem i bin gat hadtaem blong bonem wan bebi. Long semmak wik, wod blong mifala long Yuta i lukaotem help from wan mama we i jes bonem twin bebi. Waef blong mi Valérie, i volontia blong stap givim kaekae long hem—wetem wan prea long hat blong hem long, tugeta blong, niu mama ia mo gel blong mitufala we i stap long nid. Kwiktaem afta, mifala i lanem se ol sista long wod blong mifala long Franis oli luksave blong givim kaekae long famli blong hem [gel blong tufala]. Long mitufala, God i ansarem prea blong mitufala, i sendem ol enjel blong Hem blong givim kamfot taem mitufala i no save mekem.

Taem yu fesem ol mak we i gat limit mo ol jalenj, bae yumi luksave ol blesing blong yumiwan —ol presen, risos, mo taem blong yumi—mo yusum olgeta blong givim seves long olgeta we oli gat nid. Taem yumi mekem olsem, bae yumi no blesem ol narawan nomo be blong invaetem hiling mo riwod i kam long laef blong yumiwan.

Wan long ol wei we i gat moa paoa we yumi save kontribiut long ol blesing blong God we oli givim riwod hem i tru long ol defren wok we yumi mekem blong ol bubu blong yumi blong bifo insaed long haos blong Lod. Taem yumi mekem ol odinens long bihaf blong olgeta, yumi stap tekpat gud long bigfala wok blong Lod long fasin blong sevem man, stap yusum ol presen mo paoa blong yumi blong givim blesing i go long olgeta we oli no bin gat janis blong kasem olgeta long taem we oli bin stap laef long wol ia.

Seves we yumi stap givim wetem lav insaed long tabu tempol i rimaenem yumi se gladhat blong Sevya hem i go moa bitim laef ia. Long laef we bae kam, bae oli givim janis long yumi blong mekem i hapen wanem we yumi no save mekem long laef ia. Toktok i go long ol sista we oli no faenem yet ol kompanion blong olgeta blong taem we i no save finis, Presiden Lorenso Snow i talemaot wetem lav: “I nogat wan Lata Dei Sent we fet blong hem i strong bae i lusum ol janis blong hem from hem i no bin mekem sam samting we hem i no fit blong mekem . … Bae oli kasem evri blesing, blong kam olsem god mo kasem glori we eni man o woman we i bin gat janis ia.”

Mesej ia blong hop mo kamfot i blong yumi evriwan ol pikinini blong God. I no gat wan long yumi i save ronwe long ol jalenj mo mak blong limit blong laef long wol ia. Long en, yumi evriwan i bon wetem wan paoa we i blong sevem yumiwan. Be yet yumi gat wan Sevya we i gat lav, mo “yumi save se tru long gladhat blong [Hem] we yumi save sef, afta long evri samting we yumi save mekem.”

Mi testifae se taem plante situesen long laef maet bae i ova long kontrol blong yumi, bae i nogat wan long yumi i ova long mak blong kasem ol blesing blong Lod we i no save finis. Tru long atonmen mo sakrifaes blong Hem, Sevya bae i givim riwod blong evri samting we yumi no save mekem mo i bin nogat jastis long hem sapos yumi givim ful sol blong yumi i go long Hem. Long nem blong Jisas Kraes, amen.