Tekpat Stap Rere from Taem We Kraes Bae i Kambak

Long ol taem blong hae paoa ia” taem we kingdom blong God i stap kam bigwan mo ol tempol i raonem wol, bambae i gat wan bigfala nid blong olgeta sol we oli wantem blong tekpat long wok blong God. Fogetem yuwan mo givim seves i stamba blong stap olsem wan disaepol blong Kraes. Be blong givim seves i help long fulap wei. Hemia i from wanem mi laekem yufala ol disaepol we yufala i stap kipim ol kavenan blong yufala mo tu ol dia misinari we oli putum ol tingting blong hat mo jalenj blong yufala long saed, mo blong givim seves long God taem yufala i stap givim seves long ol pikinini blong Hem. God i “glad tumas blong givim ona long [yu we yu wok blong Hem] wetem stret mo gud fasin.” Hem i promes se, “Praes blong [yu] bae i bigwan, mo glori blong [yu] bae i no save finis.” Taem yumi talem yes blong givim seves, yumi stap talem yes long Jisas Kraes. Mo taem yumi talem yes long Jisas Kraes, yumi stap talem yes long wan laef we i fulap long planet blesing.

Mi bin lanem lesen ia taem mi bin stap wok mo stadi kemikol enjinia long kolej. Oli bin askem mi blong stap olsem man blong planem ol aktiviti blong wan wod blong ol yangfala we oli singgel. Mi no bin wantem koling ia nating. Be, mi akseptem, mo long stat mi no bin interes tumas long hem. Long wan aktiviti, i bin gat wan naesfala gel we i laekem tumas olsem wanem mi stap kasem aeskrim. Gel ia i kambak tri taem wetem hop ia se bae mi luksave hem. Mitufala i lavlavem mitufala, mo hem i askem mared long mi tu wik afta. Ating i no bin hariap tumas olsem, mo mi nao mi bin askem blong maredem hem, be trutok i we, taem mi luklukbak mi bin tingbaot se sapos mi no bin akseptem koling ia bambae mi neva save Heidi.

Yumi tekpat long wok blong God i no from Hem i nidim yumi be from se yumi nidim God mo ol bigfala blesing blong Hem. Hem i promesem se, “bambae mi blesem olgeta evriwan we oli wok long plantesen blong grep blong mi wetem wan bigfala blesing,” Letem mi serem tri prinsipol we i tijim olsem wanem olgeta seves blong yumi i blesem mo helpem yumi blong rere blong mitim Sevya.

Faswan, taem yumi tekpat long wok blong God, yumi stap kam kolosap long “mak blong kriesen blong yumiwan.”

Yumi lanem ol semmak samting ia insaed long histri blong Kriesen. Afta long evri dei blong wok, God i luk save ol progres we oli mekem mo talem “I gud tumas.” Hem i no talem se wok ia i finis o i stret evriwan. Be Hem i talem se i gat progres, mo long ae blong God, hemia i gud!

Ol koling i no mekem huia yumi o mekem wan man i gud inaf o klin evriwan. Be, taem yumi wok wetem God long evri wei we Hem i askem, yumi stap gro i kam long mak blong kriesen blong yumiwan.

God i glad long ol progres blong yumi, mekem se yumi tu i mas glad, iven sapos yumi gat plante wok blong mekem yet. Samtaem, yumi filim se yumi nogat inaf paoa o wei blong givim seves insaed long wan koling. Be yet, yumi save tekpat long wok mo protektem testemoni blong yumi tru long ol wei we i gat mining, olsem blong stap prea mo stadi ol skripja. Papa blong yumi long Heven we i gat lav i no putum daon yumi taem yumi wantem tekpat long wok ia be yumi no save mekem.

Seken, blong stap givim seves i leftemap ol hom mo jos blong yumi i kam ol tabu ples we yumi save stap laef folem ol kavenan long hem.

Olsem wan eksampol, yumi wanwan i mekem kavenan blong oltaem tingbaot Kraes, be yumi laef folem kavenan ia taem yumi stap givim seves long ol narawan. Ol koling i givim yumi janis ia blong “stap givgivhan long [yumi] long ol trabol blong [yumi]. Long fasin ya, bambae [yumi] save mekem ol samting we loa blong Kraes i talem.” Taem yumi givim seves from lav blong yumi long God mo wantem laef folem kavenan blong yumi, seves we yumi bin luk se i hadwok mo i mekem yumi taed, bae i jenisim yumi mo i fulap long glad.

Ol odinens i no sevem yumi from hem i komplitim wan jeklis blong heven. Be, taem yumi laef folem olgeta kavenan ia we i joenem yumi wetem ol odinens ia, yumi kam ol man we oli wantem stap wetem God. Andastaning ia i winim ol tu tingting blong stap givim seves o taem yumi jusum blong no givim seves. Fasin blong yumi blong rere blong luk Jisas Kraes i kam hariap, taem yumi stop blong askem wanem bae God i letem mo stat askem wanem nao God i wantem.

Nambatri, tekpat long wok blong God i helpem yumi blong kasem presen ia blong God we i gladhat mo filim bigfala lav blong Hem.

Yumi no kasem eni mane taem yumi givim seves. Nomata long hemia, ol skripja i tijim se from ol “wok blong [yumi stap] kasem gladhat blong God, blong [yumi] kam strong long spirit, [gat] save blong God , [mo]… [bae i] mekem se oli save tij wetem paoa mo atoriti we i kam long God.” !Hemia i wan gudfala dil!

From gladhat blong God, ol samting we yumi save mekem o no save mekem i no wan ples blong stanap long hem blong save stap givim o akseptem wan koling. God Hem i no lukaotem wan we i save wok stret mo gud evriwan o wan we talen blong hem i gud tumas blong save mekem wok blong Hem. Sapos i olsem, Kwin Esta bambae i no bin save sevem nesen blong hem, Pita bae i no bin save lidim jos long eli taem blong jos, mo Josef Smit bambae i no bin stap olsem profet blong restoresen.

Taem yumi mekem samting wetem fet blong mekem wan samting we i bigwan bitim paoa blong yumi, ol wiknes blong yumi i kam klia. Hemia i neva givim kamfot, be hem i tru long gladhat blong [God], … [yumi] gat paoa blong mekem ol samting ia.”

Bae yumi foldaon plante taem, taem yumi tekpat long wok blong God. Be long ol hadwok blong yumi, Jisas Kraes bae i lukaotgud long yumi. Hem i sevem yumi mo oltaem leftemap yumi blong eksperiensem fasin blong sevem man from ol ting we yumi mekem i no gud, fraet mo ol filing we i mekem yumi filim se bae yumi no inaf. Taem we yumi konsekretem ol bes hadwok blong yumi, God bae i mekem moa bigwan. Taem yumi mekem sakrifaes from Kraes, Hem i mekem yumi kam tabu. Hemia i paoa blong gladhat blong God we i save jenisim yumi. Taem we yumi givim seves, God bae i glad moa long yumi kasem taem yumi rere blong “Papa i leftemap [yumi], blong stanap long fored blong [Jisas Kraes].”

Mi no save evri samting we Sevya bae i askem long mi taem bae mi stanap long fored blong Hem, be ating wan kwestin bae Hem i askem i, “?Huia nao yu karem i kam wetem yu?” Ol koling oli ol tabu presen we i kam long Papa blong yumi long Heven blong karem yumi mo ol narawan i kam long Jisas Kraes. Mi invaetem ol lida mo wanwan long yumi blong lukaotem olgeta we oli no gat koling, wetem tru tingting. Leftemap tingting mo helpem olgeta blong tekpat long wok blong God mo rere from kambak blong Kraes

Jon i no bin aktiv long jos taem bisop blong hem i go visitim hem mo talem long hem se Lod i gat wan wok blong hem i mekem. Hem i invaetem Jon blong stop smok. Nomata we Jon i bin traem plante taem blong stop, long taem ia hem i bin filim wan paoa blong help we hem i neva kasem.

Tri wik afta nomo, stek presiden i bin go visitim Jon. Hem i bin singaotem hem blong wok insaed long bisoprik. Jon i bin sek. Hem i talem long stek presiden se hem i jes stop blong smok nomo. Mo sapos hemia i minim blong hem i stopem ol fasin blong go wajem ol profesonol futbol maj blong hem long evri Sandei, hemia i tumas. Insperesen ansa blong stek presiden hem i bin simpol: “Jon, mi no askem yu; Lod i stap askem yu.”

Mo Jon i talem, “Sapos i olsem, bae mi givim seves.”

Jon i talem long mi se ol sakrifaes blong givim seves ia i bin jenisim hem mo famli blong hem plante long saed blong spirit.

Mi stap askem miwan sapos yumi no luksave, mo no givim koling long olgeta we long lukluk blong yumi, i luk olsem oli no gud o klin inaf. O yumi wari se bae wan i mekem gud moa bitim olgeta, be yumi foget se bae sloslo oli progres. O yumi no luksave se Sevya i stap givim ol janis blong givim seves long olgeta, blong bae oli save kam moa strong.

Elda David A. Bednar i tijim instraksen we i kam long skripja, blong “[letem] evri [woman mo] man i mas lanem diuti blong hem, mo i mas lanem blong wok.” ?Yumi stap mekem hemia? Taem ol lida mo ol papa wetem mama i letem ol narafala man i lan mo mekem samting olgetawan, bae oli gro. Nomata se rod we i moa isi i blong givim wan seken koling long ol fetful memba, wei we i moa gud i blong invaetem olgeta we i luk olsem oli no inaf, blong givim seves mo letem olgeta oli lan mo gro.

Sapos Kraes i stap ia, bambae Hem i go visitim olgeta we oli sik, tijim Sandei Skul klas, sidaon wetem wan yang woman we hat blong hem i brok, mo blesem ol pikinini. Hem i save mekem bak wok blong Hemwan. Be Hem i laef folem prinsipol ia blong lego yumi mekem samting mo lan, mekem se Hem i sendem yumi long ples blong Hem.

I gat “atoriti mo paoa blong koling blong yu blong ripresentem Lod Jisas Kraes” taem yu tekpat long wok blong God. Taem yumi givim seves blong givim ona long Kraes mo no long yumiwan, seves blong yumi i kam fulap wetem glad. Taem ol narafala man i lego klas, miting, wok blong givhan, o aktiviti mo tingbaot Kraes moa bitim yumi, wok bae i fulap wetem paoa.

Taem yumi tingting strong blong lukaotem mo stap olsem Sevya, yumi stap kam moa olsem Hem. Hemia i fasin blong rere gud long yuwan long tabu taem ia taem wanwan long yumi i nil daon mo konfes se Jisas i Kraes, mi witnes se Hem i Kraes, mo Presiden Russell M. Nelson i Voes blong Hem “[we] i stap go aot long evri en blong wol,” blong helpem yumi “rere… long saed blong ol samting we bae oli kam.” Long tabu nem blong Jisas Kraes, amen.