Wosip

Wan long ol impoten wei blong wosip we plante long yumi oli stap folem i blong kam tugeta long wan tabu spes blong mekem ol aksen blong wosip. Lod i talem, “Mo blong yu save lukaot gud blong ol samting blong wol oli no spolem yu, yu mas go long haos blong prea mo mekem ol tabu seremoni long tabu dei blong mi.” Yes, hemia i stamba tingting blong yumi blong stap bildim ol japel. Be sapos i posibol, bae i oraet blong yusum wan ples we oli no dediketem sapos yumi save mekem i kam wan tabu ples.

Wanem we i moa impoten i wanem yumi mekem taem yumi kam tugeta long dei blong Lod. Yes, yumi werem ol gudfala klos we yumi gat folem hamas we yumi save pem—i no ol klos we oli sas be folem standet blong Jos long wan wei we i soem respek long Godhed. Ol aksen blong yumi oli soem semmak revren mo respek. Yumi wosip taem yumi prea tugeta; yumi stap wosip taem yumi stap singsing ol hym (i no blong stap lisin nomo be blong singsing ol hym); yumi wosip taem yumi stap givim instraksen mo stap lan tru ol narawan. Jisas i talem, “Tingbaot se long dei ia, we i dei blong Lod, bae yu mas givim ol ofring [stap minim ol ‘ofring blong yu … blong [givim] taem, ol talen, o ol wei blong givim seves long God mo ol narawan’mo mekem ol tabu seremoni long Hae God we I Hae Olgeta, mo talemaot ol sin blong yu long ol jos lida blong yu, mo long fes blong Lod.” Yumi kam tugeta i no blong mekem wan so o wajem wan so—olsem wan miusik ban—be blong tingbaot Hem mo stap “kasem moa instraksen we oli stret gud evriwan” insaed long gospel blong Hem.

Long taem blong jeneral konfrens we jes pas, Elda Patrick Kearon i bin rimaenem yumi se “yumi no kam tugeta long Sabat nomo blong atendem sakramen miting mo tikim long wan lis. Yumi kam tugeta blong wosip. I gat wan impoten samting we i mekem tufala i defren. Blong atendem jos i minim blong stap long jos. Be blong wosip hem i blong wantem presem, mo wosipim God blong yumi, !long wan wei we i jenisim yumi!”

Blong stap givim taem blong yumi fulwan long ol Sabat mo ol stamba tingting blong Lod i wan aksen blong wosip. Sam yia i pas Elda Russell M. Nelson i talem:“?Olsem wanem nao yumi save mekem Sabat dei hem i tabu ? Taem mi mi bin yangfala, mi bin stadi long wok blong ol narafala pipol we oli bin putum tugeta wan lis blong ol samting blong mekem, mo ol samting blong no mekem long Sabat. Afta nao bae mi bin lanem aot long ol skripja se wanem samting mi mekem, mo tingting mo filing blong mi long Sabat, i saen ia nao bitwin mi mo Papa blong mi long Heven [luk long Eksodas 31:13; Esikel 20:12, 20]. Wetem samting ia we mi andastanem, mi nomo nidim ol lis blong ol samting blong mekem mo blong no mekem. Taem mi mas mekem desisen se wan aktiviti i stret o no stret long Sabat dei, mi stap askem miwan nomo: ‘?Wanem saen mi wantem givim long God?’”

Wan spesel pat blong wosip long dei blong Lod hem i blong lukluk nomo long Atonmen mo sakrifaes blong Jisas Kraes. Long stret fasin yumi selebretem Laef Bakegen long Ded, speseli long taem blong Ista, be long evri wik tu, taem yumi tekpat long Sakramen we i simbol blong Atonmen blong Hem we tekem tu, Laef Bakegen long Ded. Blong stap tekpat long sakramen i wan impoten samting long olgeta we oli sakem sin, long taem blong wosip long Sabat.

Blong stap wosip tugeta olsem bodi blong Kraes” i gat wan spesel paoa mo i gat gud ol samting we oli kam, taem yumi tij, givim seves mo sapotem wanwan long yumi. Wetem intres, wan i niufala stadi i soem se olgeta we oli tingting long laef blong olgeta long saed blong spirit olsem se i praevet oli no tingting hevi tumas blong mekem laef blong olgeta long saed blong spirit i kam antap, o blong talem se fet blong olgeta i impoten tumas, o blong gat divosen evri dei wetem God. Olsem wan komuniti blong Ol Sent, yumi mekem wanwan long yumi i kam strong tru long wosip mo fet.

Nomata hemia, yumi no save fogetem ol evri dei aksen blong wosip we yumi tekpat long hem yumiwan mo long hom. Sevya i rimaenem yumi se, “Be yu mas mekem ol tabu promes blong yu long Lod, long stret mo gud fasin long evri dei mo long evri taem.” Wan sista i talem wetem waes se, “Mi no save tingbaot wan wei we i moa impotem blong wosipim God bitim blong welkamem ol smol pikinini blong Hem i kam insaed long laef blong mitufala mo tijim plan ia blong Hem long olgeta .”

Alma mo Amulek, tufala i bin tijim Ol Man blong Soram we oli bin stopem olgeta blong wosipim God insaed long ol haos blong prea, i no blong wan wik nomo be blong oltaem, mo “long eni ples we [oli] i stap long hem.” Tufala i tokbaot prea olsem wosip:

“Yufala i mas kapsaetem sol blong yufala long prea taem yufala i stap insaed long rum blong yufala, mo insaed long ol sikret ples blong yufala, mo long waelples blong yufala.

Yes, mo taem we yufala i no prea long Lod, letem hat blong yufala i stap fulap, we oltaem i stap prea long hem from gudlaef blong yufala.”

Tufala i tokbaot tu, stap stadi long ol skripja, serem testemoni abaot Kraes, soem aksen blong lav mo seves, kasem Tabu Spirit, mo fasin blong talem tangkyu evri dei wetem gladhat. Tingting long toktok ia: “fasin blong talem tangkyu evri dei wetem gladhat.” Hem i talemaot nambatu aedia blong mi:

Blong stap filim mo soem fasin blong tangkyu i go long God hem i samting ia nao we i fulumap wosip wetem wan filing blong glad mo blong riniu be i no blong luk olsem wan moa wok mekem.

Tru wosip i minim blong stap lavem God mo givim tingting blong yumi i go long Hem—presen we gud tumas we yumi save givim. Taem oli askem se, wanem i bigfala komanmen aot long evri loa, Jisas i ansa, “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.” Hem i singaotem hemia tu, fasfala komanmen.

Hemia i wei blong Jisas Hemwan, blong wosipim Papa. Hem i givim fulwan, laef, atonmen mo sakrifaes blong Hem i go from glori blong Papa. Yumi tingting gud dip insaed long hat blong yumi abaot prea we Jisas i mekem taem Hem i stap safa long bodi, se: “Papa sapos yu save mekem, plis yu tekemaot ol samting ia we i stap mekem mi mi harem nogud tumas. Be yu no mekem olsem we mi mi wantem, yu mekem olsem we yu nomo yu wantem.”

Wosip, hem i blong traehad blong folem stret evriwan, eksampol ia. Bae yumi no kasem hemia kwiktaem, be sapos evri dei yumi “mekem olsem wan sakrifaes long [Hem], wan hat we i fulap wetem sore mo wan spirit we i wantem blong sakem sin,” Hem bae i baptaesem yumi bakegen wetem Spirit blong Hem mo fulumap yumi wetem gladhat blong Hem.

Long fas seksen blong Doktrin mo Ol Kavenan, Lod i tok agensem fasin nogud blong man long wol ia:

“From se oli bin aot long ol odinens blong mi, mo oli bin brekem kavenan blong mi we i no gat en;

“Oli no stap lukaotem Lod blong stanemap stret mo gud fasin blong hem, be evri man i wokbaot folem rod blong hemwan, mo folem fasin blong god blong hemwan, we fasin blong god ia i semmak long hemia blong wol.”

Hem i gud long yumi blong tingbaot eksampol blong tri yang Man Jiu, Hanania, Misael, mo Asaria, we oli kam prisena long Babilon i no longtaem afta we Lihae mo famli blong hem oli aot long Jerusalem. Wan ofisa blong Babilon i jenisim nem blong olgeta i go long Sadrak, Mesak, mo Abednego. Biaen taem ol trifala ia oli no akseptem blong wosipim wan aedol we King Nebukadnesa putum, hem i komandem se oli sakem olgeta i go long bigfala faea we i laet we i laet mo stap talem long olgeta, “?Yutrifala i ting se i gat wan god we i save sevem yutrifala?”

Bae yu tingbaot we oli nogat fraet mo ansa se:

“Be God ya we mitrifala i wok blong hem, hem i save sevem mitrifala, mo i save tekemaot mitrifala long paoa blong yu.

“Be sipos hem i no sevem mitrifala, nating nomo … bambae mitrifala i no save mekem wosip long ol god blong yu, mo bambae mitrifala i no save bodaon long aedol ya we yu stanemap.”

Bigfala faea ia i hot tumas mekem se i kilimded ol wokman we oli sakem olgeta i go long hem, be Sedrak, Mesak, mo Abednego, oli no ded. “Nao king i talem se, “!Yumi presem God blong Sadrak, mo Mesak mo Abednego! Hem … nao hem i sevem trifala ya we trifala i man blong wok blong hem, mo trifala i trastem hem, … mo trifala i no save bodaon blong mekem wosip long ol narafala god, trifala i mekem wosip long God blong trifala nomo.” Trifala ia, oli bin trastem Jehova blong mekem oli kam fri, “be sipos hem i no sevem mitrifala, nating nomo,” toktok blong olgeta ia se sapos God i no sevem olgeta, bae oli gohed blong stap tru long Hem.

Eni samting we i kam faswan long taem blong wosipim Papa mo Pikinini, i kam wan aedol. Olgeta we oli no akseptem God olsem stamba blong trutok, tanem baksaed long fasin blong stap akaontebol i go long Hem mo olsem wan risal, oli mekem olgetawan oli kam god blong olgeta. Wan we i stap fetful long wan pati o no lukaotem daereksen we i kam God, i stap wosipim wan giaman god. Iven olgeta we oli filim blong wosipim God be oli no obei ol komanmen blong Hem, oli stap wokbaot long rod blong olgetawan: “Oli stap kam kolosap long mi wetem maot blong olgeta, be oli tekemaot hat blong olgeta i go longwe long mi.” Gol blong yumi blong wosip i wan ia nomo se, “[God i wan tru God ia nomo mo Jisas Kraes, we Hem i bin saenem i kam].”

Long en, maet ol wei blong yumi blong stap laef, hem i nambawan mo ones wei ia nao blong soem wosip blong yumi. Blong soem divosen blong yumi i minim blong traehad blong kam olsem Papa mo Pikinini—developem ol wei mo fasin blong Tufala long yumiwan. Olsem toktok we oli stap talem se, blong stap mekem samting folem wan narawan i wan wei blong stap spolem man, be i difren wetem Godhed, from fasin blong folem God i wan wei blong wosip. Hemia soem se yumi mas traehad long pat blong yumi blong lukaotem fasin blong kam tabu. Be blong stap kam moa olsem Kraes hem i evri dei risal blong ol aksen blong wosip blong yumi. Long toktok blong Elda Kearon, hem i kwotem, abaot stap wosip “long wan wei we i jenisim yumi,” i gud tumas. Tru wosip i save jenisim man.

Hemia i naesfala samting abaot rod blong kavenan—rod blong wosip, lavem mo stap fetful long God. Yumi kam insaed long rod blong baptaes, promes blong tekem long yumi nem blong Kraes mo blong obei ol komanmen blong Hem. Yumi kasem presen ia blong Tabu Spirit, mesenja blong gladhat blong Sevya we i pemaot mo mekem yumi kam klin aot long ol sin blong yumi, taem yumi sakem sin. Yumi save talem se taem yumi sakem sin, yumi stap wosipim Hem.

Long ples ia, yumi folem ol odinens blong prishud we oli ademap mo ol kavenan we oli bin mekem insaed long haos blong Lod we i gohed blong mekem yumi kam tabu. Ol seremoni mo ol odinens blong tempol oli pat ia we i leftemap wei blong wosip.

Presiden Nelson i bin tokbaot plante se, “evri man mo evri woman, we i tekpat long ol odinens blong prishud, mo oli mekem mo kipim ol kavenan wetem God, oli save yusum paoa ia blong God.” Hemia i no wan paoa ia nomo we yumi yusum blong givim seves mo blesing. Hem i paoa ia tu we i wok insaed long yumi blong mekem yumi kam klin evriwan. Taem yumi wokbaot long kavenan rod ia, tabu “paoa we i olsem hemia blong God,” i kamaot tru long yumi.

Letem yumi olsem Ol Man blong Nifae mo Ol Man blong Leman, [yumi] “foldaon long ol leg blong Jisas, mo [yumi] wosipim hem.” Bae yumi, olsem we Jisas i komandem, “foldaon mo wosipim Papa long nem blong [Pikinini blong God].” Bae yumi kasem Tabu Spirit mo singaot wetem hat blong yumi i go long God, mo no mas gat eni nara God bifo long Hem, mo olsem ol disaepol blong Jisas Kraes, kopi fasin blong Hem insaed long laef blong yumiwan. Mi testifae se taem yumi mekem, bae yumi eksperiensem glad tru long wosip. Long nem blong Jisas Kraes, amen.