“Kam Kolosap long Mi”

Ol dia brata mo sista blong mi. Mi glad tumas blong stap wetem yufala long jeneral konfrens ia blong Jos Ia blong Jisas Kraes blong Ol Lata-dei Sent. Hemia i Jos blong Hem. Yumi kam tugeta long ol bilding mo hom raon long wol, long nem blong Hem.

Yumi tekem nem blong Hem long yumi taem yumi go insaed long kingdom blong Hem tru long kavenan. Hem i Pikinini blong God we i laef bakegen long glori. Yumi ol man blong wol we yumi mas testem sin mo ded. Be yet, from lav blong Hem long wanwan long yumi, Sevya i stap invaetem yumi blong kam moa kolosap long Hem.

Hemia i invitesen blong Hem i kam long yumi: “Kam kolosap long mi mo bambae mi kam kolosap long yufala; lukaotem mi wetem strong tingting mo bambae yufala i faenem mi; askem mo bambae yufala i kasem; noknok, mo bae i open long yufala.”

I gat ol taem we yumi filim se yumi stap kolosap long Sevya Jisas Kraes. Be yet, samtaem long ol hadtaem blong yumi long wol ia, bae yumi filim se yumi longwe long Hem mo wantem tumas blong save stret se Hem i save wanem i stap long hat blong yumi mo i lavem yumi wanwan.

Hop blong Hem i wan wei blong Hem i invaetem yumi. Kam kolosap moa long Hem taem yu stap tingbaot Hem oltaem. Lukaotem Hem wetem strong tingting tru long skripja stadi. Askem tru long wan prea we i kam long hat i go long Papa long Heven blong filim moa kolosap long Pikinini blong Hem we Hem i lavem tumas.

I gat wan simpol wei blong tingbaot hemia. Bae yu mekem folem wei ia sapos yu stap longwe long ol dia fren blong sam taem. Bae yu faenem wan wei blong toktok wetem olgeta, bae yu hapi tumas long eni mesej we yu kasem long olgeta, mo bae yu mekem evri samting yu save mekem blong helpem olgeta.

Taem yu traem blong faenem ol wei mo gohed blong mekem, lav we i fasem yutufala bae i kam moa strong, mo bae yu filim se yu stap kam moa kolosap. Sapos fulap taem i pas mo yutufala i no toktok mo i nogat janis blong yutufala i helhelpem yutufala, bae rilesensip ia i kam slak.

Jisas Kraes i lavem wanwan long yumi. Hem i givim janis ia blong kam moa kolosap long Hem. Olsem we yu stap mekem wetem wan fren we yu lavem bae yu mekem semmak fasin; taem yu toktok tru long prea long Papa long Heven tru long nem blong Jisas Kraes, lisin blong Tabu Spirit i lidim yu, mo givim seves long ol narawan wetem glad long bihaf blong Sevya. I no longtaem bae yu filim blesing ia blong kam moa kolosap long Hem.

Taem mi yangfala, mi bin eksperiensem glad ia blong stap kam moa kolosap long Sevya—mo Hem i kam kolosap moa long mi—tru long ol simpol aksen blong stap obei long ol komanmen. Taem we mi yang, oli pasem sakramen long wan sakramen miting we i stap long naet. Mi save tingbaot yet naet ia, moa long 75 yia i pas. Taem ples i tudak mo kolkol aotsaed. Mi tingbaot wan filing blong laet mo wom insaed taem mi bin luksave se mi bin kipim komanmen ia blong kam tugeta wetem Ol Sent blong tekpat long sakramen, mo mekem kavenan wetem Papa blong yumi long Heven blong oltaem tingbaot Pikinini blong Hem mo obei ol komanmen blong Hem.

Long en blong miting long naet ia, mifala i singsing hym ia, “Abide with Me; ’Tis Eventide,” (Stap wetem Mi; Tudak I Kam Kolosap) wetem ol toktok blong hym ia, “O Savior, stay this night with me” (O Sevya, stap long naet ia wetem mi.)”

Ol toktok ia oli bin fulumap mi wetem Spirit, nomata se mi bin wan yang boe nomo. Mi bin filim lav blong Sevya mo filim Hem kolosap long naet ia tru long kamfot blong Tabu Spirit.

Plante yia afta, mi disaed blong traem blong filim semmak filing ia blong lav blong Sevya mo olsem wanem mi bin filim kolosap long Lod long taem blong sakramen miting ia, taem mi yangfala. Mekem se mi kipim wan nara simpol komanmen blong stadi long ol skripja.

Long buk blong Luk, mi bin ridim abaot nambatri dei afta we oli kilim Kraes long kros mo berem Hem. Taem we ol fetful wokman oli bin kam blong putum oel long bodi blong Sevya from oli lavem Hem. Taem oli kam, oli faenem se oli bin pusumaot ston we i blokem ston blong gref mo oli luk se bodi blong Hem i nomo stap.

Tu enjel i stanap long saed mo askem from wanem oli fraet mo talem:

“?From wanem yufala i stap lukaot man we i laef long ples blong ol ded man?

“Hem i no stap long ples ya. Hem i laef bakegen. Yufala i mas tingbaot tok ya we hem i talem long yufala, taem hem i stap long Galili yet.

Hem i talem se: ‘Mi mi Pikinini blong Man, bambae olgeta oli putum mi long han blong ol man nogud, mo bambae ol man nogud ya oli nilim mi long kros blong kilim mi mi ded. Be long namba tri dei, bambae mi mi laef bakegen.”

Long aftenun ia taem san i stap draon, tufala disaepol i wokbaot long Jerusalem i go long Emeas, mo Lod we i laef bakegen long ded i bin kamkamaot long tufala mo wokbaot wetem tufala.

Buk blong Luk i helpem yumi blong pikjarem wokbaot blong olgeta long naet ia:

“Nao taem tufala i stap storian olsem, Jisas i kam klosap long tufala, nao i stap wokbaot i go wetem tufala.

“Be i gat samting i blokem tingting blong tufala, we i mekem se tufala i no save luksave Jisas.

“Nao Jisas i askem long tufala se: ‘Tufala. ?Wanem samting ya we yutufala i stap storian long hem i kam?’

“Nao wan long tufala we, nem blong hem Kleopas, hem i talem long hem se, ‘?Ating yu nomo yu wan strenja long Jerusalem, we yu no save ol samting ya we i hapen long ol dei ya we i jes pas.?”

Tufala i talem long Hem, harem nogud blong tufala se Jisas i ded finis, taem oli bin trastem se Hem nao bae i Ridima blong Isrel.

I mas gat filing blong lav we i stap long voes blong Lod we i laef bakegen, taem Hem i stap toktok long tufala disaepol ia we i harem nogud tumas mo stap krae.

Taem mi stap gohed blong rid, ol toktok ia oli tajem hat blong mi, semmak olsem we mi bin filim taem mi wan smol boe:

“Nao trifala i kam kolosap long vilej ya we tufala i stap go long hem. Mo Jisas i mekem olsem we bambae hem i lego tufala, i wokbaot i go.

“Be tufala i talem long hem se ‘Ei, i gud yu stap wetem mitufala fastaem. Naoia i let finis ya. Bae i no longtaem san i godaon.’ Nao hem i go insaed, i stap wetem tufala.”

Long naet ia, Sevya i bin akseptem invitesen blong go insaed long haos blong ol disaepol blong Hem. Hem i sidaon mo kakae wetem tufala. Hem i tekem bred, i blesem, i brekem mo givim long tufala. Ol ae blong tufala i open, mo tufala i luksave se Hem i Jisas. Afta Hem i lus long fes blong tufala.

Luk i raetemdaon ol filing blong ol disaepol ia we oli kasem blesing ia se: “Nao tufala i taltalem long tufala se, ‘?Man taem hem i stap toktok long yumitu long rod, i stap talemaot ol tok ia blong Baebol, tok blong hem i nambawan, i mekem yumi harem gud tumas?”

Tufala disaepol i hariap i gobak long Jerusalem blong talem wanem i bin hapen, long ol leven Aposol. Taem tufala i stap serem eksperiens blong tufala, Sevya i kamkamaot bakegen.

Mo Hem i stanap long medel blong olgeta, “mo i talem long olgeta se “Pis i stap wetem yufala.” Afta Hem i talem bakegen ol profesi blong misin blong Hem blong Hem i pemaot ol sin blong evri pikinini blong Papa blong Hem, mo blong brekem ol rop blong ded.

“Mo hem i talem long olgeta se: ‘Tok we i stap long Baebol i talem se bambae ol man oli mekem Mesaea i harem nogud long bodi blong hem, gogo i ded. Mo long nambatri dei blong hem, bambae hem i laef bakegen.

“Mo long nem blong Mesaea ya, se man i mas tanem tingting blong hem from sin blong hem, nao bambae God i fogivim hem. Tok ya i mas go long olgeta man, i stat long Jerusalem ya, gogo i finisim wol.

“Yufala i luk ol samting ya.””

Semmak olsem ol disaepol blong Hem, evri pikinini blong Papa long Heven i bin jusum blong gotru long get blong baptaes, mo yumi mekem kavenan blong stap olsem witnes blong Sevya mo blong kea from olgeta we oli stap long nid truaot long laef blong yumi long wol ia. Wan profet blong Buk blong Momon, Alma, i bin mekem komitmen ia i klia, plante handred yia i pas, long Ol Wota blong Momon se:

“From yufala i wantem blong kam long yad blong God, mo se oli singaotem yufala ol pipol blong hem, mo yufala i glad blong karem ol hevi samting blong wanwan long yufala, blong mekem se oli nomo hevi;

“Yes, mo yufala i glad blong krae sore wetem olgeta we oli krae sore, yes, mo leftemap tingting blong olgeta we oli nidim fasin blong leftemap tingting, mo blong stanap olsem ol witnes blong God long evri taem mo long evri samting, mo long evri ples … kasem ded, mekem se God i save pemaot yufala, … yufala i save kasem laef we i no save finis.”

Taem yu stap fetful long ol promes ia, bae yu luk Lod i kipim promes blong Hem blong stap wan wetem yu taem yu givim seves mo i mekem ol harem nogud blong yu i kam laet. Bae yu kam blong save Sevya, mo wetem taem, bae yu kam olsem Hem mo “kam stret evriwan tru long Hem.” Taem yu stap helpem ol narawan long bihaf blong Sevya, bae yu luk se yu stap kam moa kolosap long Hem.

Plante long yufala i gat olgeta we yufala i lavem, we oli nomo stap laef folem ol tijing blong gospel we i tekem olgeta i go long laef we i no save finis. Yu stap tingting se, ?wanem moa yu save mekem blong karembak olgeta? Yu save dipen long Lod blong kam moa kolosap long olgeta taem yu stap givim seves long Hem wetem fet.

Ating bae yufala i tingbaot promes blong Lod i go long Josef Smit mo Sidni Rigdon taem tufala i aot long famle blong tufala blong mekem wok blong Hem. Lod i talem long Sidni mo Josef, se ol famle blong tufala oli stap gud; oli stap long han blong Hem, mo bae Hem i lukluk long olgeta olsem we i stret long Hem; from we Hem i gat evri paoa.”

Taem yu stap helpem olgeta long nid, bae paoa blong Lod i sapotem yu. Bae ol han blong Hem mo ol han blong yu i helpem mo blesem ol pikinini blong Papa blong yumi long Heven.

Evri kavenan wokman blong Jisas Kraes, bae oli kasem daereksen we i kam long Spirit taem oli blesem mo givim seves long ol narawan long bihaf blong Hem. Afta, bae oli filim lav blong Sevya mo faenem glad taem oli stap go moa kolosap long Hem.

Mi mi wan witnes blong Resureksen blong Lod semmak olsem se mi tu bin stap wetem tufala disaepol insaed long haos long rod blong Emeas. Mi save se Hem i stap laef.

Hemia i tru Jos blong Hem—Jos Ia blong Jisas Kraes. Bae yumi stanap long fored blong Sevya fes tu fes long Dei blong Jajmen. Bae i wan taem blong bigfala glad, long olgeta we oli bin kam moa kolosap long Hem mo seves blong Hem long laef ia, mo oli wantem tumas blong harem ol toktok blong Hem: “Yu yu wan gudfala man we yu lukaot gud long ol wok blong mi.”

Mi testifae olsem wan witnes blong Sevya mo Ridima blong yumi we i bin girap bakegen, long nem blong Jisas Kraes, amen.