Fasin blong Yu blong Sakem Sin I No Hevi long Jisas Kraes blong Karem; I Mekem Hem I Glad Bigwan

Sam yia i pas, long wan trip i go long Florida, mi stap sidaon aotsaed mo ridim wan buk. Taetol blong hem i talem se yumi save mekem yet blong go long heven, iven sapos yumi no stret gud evriwan naoia. Wan woman i wokbaot pas mo askem mi, “Yu ting se hemia i posibol?”

Mi lukluk i go long hem, wetem konfius, mo afta mi luksave se hem i stap tokbaot buk ia we mi stap ridim. Mi talem long hem wan samting we i fani olsem, “Ok, mi no kasem en yet, be bae mi letem yu save hao i en.”

!O sapos mi save gobak nomo long taem ia! Bae mi talem long hem se, “Yes, hem i posibol! From heven i no blong ol pipol we oli bin stret evriwan; hem i blong ol pipol we oli bin fogivim olgeta, mo oli bin jusum Kraes bakegen mo bakegen.”

Tedei mi wantem blong toktok long olgeta long yumi we samtaem oli filim, “olsem se fasin blong sakem sin mo fogivnes i wok blong evriwan be i no long hem [mi].” Olgeta we oli stap tingting olgetawan nomo, “From se mi gohed blong mekem semmak mistek, ating from mi olsem ia nao.” Olgeta we oli olsem mi, oli gat ol dei we samtaem kavenan rod i hae tumas, olsem wan kavenan hil blong klaem.

Wan gudfala misinari long Ostrelia, Elda QaQa blong Fiji, i bin serem wan semmak filing taem hem i stap serem las testemoni blong hem bifo hem i go long haos: “Mi save se God i lavem mi, be samtaem mi stap tingting se, ‘?God i save se mi mi lavem Hem?’ From se mi no stret evriwan, mo mi gohed blong stap mekem mistek.”

Wetem wan wari kwestin olsem ia, Elda QaQa i talem long sot, stret samting we i stap mekem mi wari plante taem. Ating yu stap tingting tu se, “Mi bin traem bes blong mi bigwan, be God i save se mi stap traehad? Taem mi gohed blong mekem nogud, ?God i save se mi lavem Hem yet?”

Mi sore blong talemaot hemia, be mi stap jekem rilesensip blong mi wetem Sevya long hao mi laef long stret fasin. Mi bin tingting se taem mi obei long laef blong mi bae mi neva sakem sin. Mo taem mi mekem mistek, evri dei, mi stap go longwe long God, wetem tingting ia se, “Hem i no glad long mi.”

Hemia i no tru.

Mi bin lanem se sapos yu wet kasem we yu klin inaf o stret gud inaf blong go long Sevya, !yu mestem rod ia nao!

?Wanem i hapen sapos yumi tingting long ol komanmen mo fasin blong obei long wan defren wei?

Mi testifae se long taem we God i kea abaot ol mistek blong yumi, Hem i kea moa abaot wanem bae i hapen afta we yumi mekem mistek. ?Bae yumi tanem yumi i go long Hem bakegen mo bakegen? ?Bae yumi gohed blong stap long kavenan rilesensip ia?

Ating yu harem finis ol toktok blong Lod “Spos [yu] lavem mi, kipim ol komanmen blong mi” mo yu filim se yu lus from yu no bin kipim ol komanmen. !Bae mi mas rimaenem yu se hem i wan komanmen tu blong sakem sin! I tru se hem i wan komanmen we oli ripitim plante taem insaed long ol skripja.

Alma long toktok blong hemwan “O mi wantem kam wan enjel, mo save gat hop blong hat blong [mi] … mo taltalemaot fasin blong sakem sin,” hem i no stap traem blong mekem yumi sem, taem hem i stap soem ol mistek blong yumi. Hem i wantem singaotem yumi blong sakem sin blong mekem se yu mo mi yumitu no save stap safa long wol. Wan risen we Alma i no laekem sin, hem i from i mekem yumi harem nogud.

Samtaem mi mas tingbaot, olsem wan not we oli putum long fored blong hed blong mi, se ol komanmen oli rod ia aot long harem nogud. Mo fasin blong sakem sin tu. Profet blong yumi i se, “Sevya i lavem yumi oltaem speseli nao taem yumi sakem sin.”

Mekem se taem Lod i se, “Yufala i sakem sin, Yufala i sakem sin,” traem tingbaot sapos Hem i se, “Mi lavem yufala. Mi lavem yufala.” Pikjarem Hem, i no tok strong, be i stap krae wetem yu, blong stap longwe long ol fasin we i mekem yu harem nogud, i stap invaetem yu blong kamaot long tudak mo tanem yu go long laet blong Hem.

Long wod blong gel blong mi Carly, wan niu pris i nildaon blong blesem sakramen, be afta blong prea se, “Blong oli kakae blong tingbaot blad blong Pikinini blong Yu,” hem i mestem mo talem, “Blong oli kakae blong tingbaot lav blong Pikinini blong Yu.” Ol ae blong Carly i fulap long wota taem ol trutok blong ol toktok ia i draon insaed long hem.

Sevya blong yumi i wiling blong safa long ol soa blong Atonmen ia from Hem i lavem yu. I tru, yu yu “glad ia we i stap long fored blong Hem” taem Hem i stap safa.

Invitesen ia blong sakem sin i fasin ia blong soem lav blong God.

Taem yu talem yes long invitesen ia, hemia nao i soem lav blong yumi long Hem.

Pikjarem wan pikja blong Kraes we yu laekem. Nao traem tingbaot Hem i stap smael wetem glad evri taem we yu yusum presen blong Hem, from hem i “hop ia we i stret mo i klia.”

Yes, fasin blong sakem sin blong yu i no wan hevi samting long Jisas Kraes, be i mekem Hem i glad !

Bae yumi tijim hemia!

!From se fasin blong sakem sin i bes nius blong yumi!

Taem yumi stap long kavenan rod i no minim se bae yumi neva mekem wan mistek. Yumi stap long rod ia blong stap sakem sin evri dei.

Mo taem yumi stap sakem sin, God i fogivim yumi long wan wei blong no mekem yumi sem, blong komperem yumi long narafala man, o tok strong from hem i semmak samting we yumi bin sakem sin from las wik finis.

Hem i glad tumas evri taem we Hem i luk yumi nildaon. Hem i glad blong fogivim yumi from long Hem, yumi fulap long glad.

?Yu no filim se hemia i tru?

?Afta from wanem i had tumas long yumi blong bilivim?!

Setan, bigfala man blong agens mo man blong giaman, i yusum fasin blong stap sem blong mekem yumi stap longwe long God. Fasin blong stap sem i wan hevi samting tumas we i mekem yumi filim daon mo stap long tudak, mo sapos yu karemaot long bodi blong yu, bae yu filim nomol.

Fasin blong stap sem i paoa ia we i mekem yu filim nogud from mistek blong narawan, mo talem “?Yu stap tingting long wanem?” “Yu bin mekem wan samting i gud finis?”

Fasin blong sem i no talem long yumi se yumi mekem wan mistek; be i talem long yumi se yumi nao yumi mistek. Bae yu save harem tu, “Haed.” Enemi i mekem evri samting long paoa blong hem blong mekem yumi sem tumas, talem long yumi se i tumas blong sakem sin, se bae i moa isi blong stap long tudak, mo lusum evri hop.

Setan i stilman blong hop.

Mo yu nidim blong harem hemia, so bae mi talem ol toktok ia long wan laod voes: Yu yu no voes ia long hed blong yu o ol mistek we yu bin mekem. Bae yu nidim blong talem toktok ia laod tu. Talem long Setan, “No, i no tedei.” Putum hem biaen long yu.

Filim paoa ia we i stap pulum yu, harem nogud ia we i tanem yu i go long Sevya, mo wajem gladhat blong Hem we i go insaed long laef blong yu mo long laef blong olgeta we yu lavem. Mi promes se long minit we yu karem i kam wan hat we i fulap wetem sore long Hem, kwiktaem Hem i stap.

Sapos yu luk wan man we i draon, ?bae yu no givim han blong yu blong sevem hem? ?Yu save tingting long Sevya we i no wantem givim han blong sevem yu? Mi save pikjarem, Hem bae i daeva i go insaed long wota, mo go andanit gud bitim evri samting !blong leftemap yumi aot long wota blong yumi save pulum gud win! I nogat wan we i save draon i go daon bitim laet blong Kraes we i stap saen.

Oltaem Sevya i saen moa bitim tudak blong sem. Bae Hem i neva mekem wan man i filim se hem i no klin inaf. Wajem gud.

• Traem tingting olsem se han ia i ripresentem praes.

• Han ia i ripresentem fasin blong stap obei. Ating yu wekap long moning ia, mekem wan prea wetem mining, mo stadi ol skripja blong harem voes blong God. Yu bin mekem wan gud desisen mo stap tritim ol pipol raon long yu olsem we Kraes bae i mekem. !Yu stap lisin long jeneral konfrens! !Fasin blong yu blong obei i stap ia!

• O ating ol samting oli no wok gud tumas. I no longtaem i pas yu bin traehad blong mekem ol smol, simpol samting ia blong konektem yu long heven. Yu bin mekem sam desisen we yu no praod long hem.

• ?Wea nao praes blong yu? ?Han ia i bin muv o no?

Praes blong yu i no go wetem fasin blong obei. Praes blong yu i stap oltaem; i neva jenis. God i givim long yu, mo i nogat wan samting o wan man i save mekem blong jenisim hemia. Fasin blong obei i givim blesing; hemia i tru. Be praes i no wan long ol samting ia. Praes blong yu oltaem i “bigwan long ae blong God,” nomata ol risal blong ol desisen blong yu.

Taem mi stap mekem ol mistek, mi wantem blong stap long kavenan rilesensip wetem Kraes, mo bae mi talem long yu from wanem.

Taem mi stap gro, mi stap tekem daeving lesen mo lanem se taem ol jaj oli givim poen long daeving, oli wajem man i daeva. ?Taem wan i daeva i go long wota, bodi blong hem i stret gud i go long wota? Afta oli mekem wan gudfala samting. Oli mekem ol aksen we i defren mo i had.

Evriwan i stap daeva wetem ol pat we i defren mo i had long olgeta. Sevya blong yu Hemwan nomo i save gud ol had taem blong yu blong stap daeva. !Mi wantem wan rilesensip wetem wan man we i save mi, we i save hat blong mi mo hamas mi stap traehad!

Hem i save ol klaod blong tudak we i stap kamdaon long yumi evriwan ol man blong travel mo se wokbaot blong yumi i blong pas long saed blong wota we i doti—mekem se nomata yumi hang long rel blong aean, bae ol rabis fasin i stap raon long yumi.

Blong kam long Kraes, “Bae yu save helpem mi?” wetem hop, i soem tru se ol han blong Hem i oltaem open long yu. Mi bilivim niu wei ia abaot fasin blong sakem sin, we i minim se nomata yumi no obei long stret fasin yet, yumi traem obei from lav blong yumi long God naoia, yumi jusum blong stap, bakegen mo bakegen, from yumi lavem Hem.

?Tingbaot ol pipol blong King Benjamin we oli nomo wantem mekem rabis fasin be blong gohed mo mekem gud? ?Yu ting se oli bin pikimap ol tenet blong olgeta mo go hom mo neva mekem wan mistek bakegen? !Yumi save se no!. Wanem i defren i we oli nomo wantem blong sin bakegen. Oli gat fasin ia blong obei wetem lav mo respek. Oli bin tanem ol hat blong olgeta i go long God long taem we oli traehad!

Wantaem long solwota, mi bin luk wan pijin i stap flae long win, mo stap muvum strong ol wing blong hem, i muvmuv strong tumas, be i stap long sem ples nomo. Afta mi luk wan nara pijin we i stap antap moa. Hem i flae stret i go antap mo i letem win i blo long hem isi nomo. Hemia nao wanem we i defren bitwin fasin blong mekem samting yumiwan mo tanem yumi i go long Sevya blong yumi, mo letem Hem i leftemap yumi, wetem ol “hiling long ol wing blong hem.”

Olsem ol misin lida long Ostrelia, long taem blong las visit blong mifala wetem ol misinari, mifala i tokbaot 3 Nifae 17, taem we ol pipol oli bin stap kolosap long Sevya mo save harem Hem i prea from olgeta. Mifala i askem, “?Sapos yu save harem Sevya i prea from yu, yu ting se bae Hem i talem wanem?”

Blong harem ol ansa blong olgeta, i bin wan long ol bigfala eksperiens long laef blong mi we i fulap long saed blong Spirit. Evri misinari bae i stop smol, mo wota i fulap long ae blong olgeta, taem mifala i rimaenem olgeta, “Sevya blong yu i save ol eria we i had we yu stap fesem. “!Hem i filim tu!”

Hemia wanem we ol misinari ia oli serem long wan kwaet mo sopsop fasin: Wan sista i talem: “Jisas bae i talem long Papa, ‘hem i stap mekem bes we hem i save mekem. Mi save olsem wanem hem i stap traehad.’” Wan Elda i talem, “Wetem evri samting we i stap hapen long laef blong hem, mi praod tumas long hem.”

Bae yumi traem hemia. Tunaet, bifo yu prea, tingbaot se Jisas Kraes i stap kolosap. Hem i loya blong yufala long fored blong Papa. Askem yuwan “?Wanem nao Sevya bae i talem long Papa abaot mi?”

Mo afta kam stap kwaet.

Lisin long voes ia we i talem gud samting abaot yu—voes blong Sevya, beswan long ol fren blong yu, mo papa blong yu long Heven, we i stap. Tingbaot, lav blong Tufala mo praes blong yu i oltaem bigwan, nomata wanem.

Mi stanap ia blong witnes se Jisas Kraes i givim laet long olgeta we oli sidaon long tudak. So long ol dei ia, taem yu filim se voes ia i talem long yu blong haed, se bae yu mas haed long wan dak rum yu wan nomo, mi invaetem yu blong stap smat mo bilivim Kraes! Wokbaot i go long Sevya—Wan Stret mo Klin Hop blong yumi.

Wetem paoa blong Hop we i kavremap yumi, bae yu luk ol pipol raon long yu we oli bin filim se oli stap olgetawan nomo, be naoia wetem laet ia long yu mo olgeta i gat tingting ia, “?From wanem yumi stap fraet tumas long tudak? ?Mo from wanem yumi stap longtaem long tudak?

“Bae Lod blong ol Laet i kavremap yu raon long ol han blong Hem, mo gohed blong kamfotem mo lavem yu.” Bae yumi lavem Hem mo jusum Hem bakegen mo bakegen. Long nem blong Jisas Kraes, amen.