Fasin blong Stap Revren long Ol Tabu Samting

Insaed long buk blong Eksodas, yumi wokbaot wetem Moses i go long hae Hil Horeb taem hem i putum evri dei wok blong hem long saed—wan samting we yumi evriwan i mas wantem blong mekem—blong luk tri ia we faea i stap laet long hem be i no kakae ol lif blong hem. Taem hem i stap go kolosap, “God i singaot long hem, we tok blong hem i kamaot long medel blong tri ya, i talem se, !Moses! !Moses! Mo Moses i talem se, Yes. Nao [God] i talem long hem se, … Yu tekemaot sandel blong yu! !Graon ya we yu stap stanap long hem i tabu ya.” Wetem fasin blong stap revren, tingting i stap daon, mo sapraes, Moses i tekemaot sandel blong hem mo rere long hemwan blong harem toktok blong Lod mo blong gat tabu eksperiens ia blong stap wetem Hem.

Tabu hil ia we Lod i kamaot long hem i wan eksperiens we i fulap wetem sapraes mo fasin blong stap revren, i soem long Moses se God i save huia hem mo i wan stret taem we i jenisim laef blong hem olsem wan simpol man blong lukaotem sipsip i kam wan bigfala profet, i lidim hem blong wokbaot long wan niu rod blong laef. Long semmak wei, wanwan long yumi i save jenisim fasin blong yumi blong stap olsem wan disaepol long wan fasin we i moa hae long saed blong spirit, taem yumi mekem fasin blong stap revren i kam wan tabu long saed blong spirit blong yumi.

Toktok ia reveren yumi save faenem long Latin veb we hem i revereri, we i minim blong “stap sapraes.” Long wei blong gospel, mining ia i miks wetem wan filing o fasin blong bigfala respek, lav, mo fasin blong talem tangkyu. Olgeta we oli gat wan hat we i wantem blong sakem sin mo gat dip divosen long God mo Jisas Kraes, taem oli soem kaen reveren ia, i helpem olgeta blong filim moa glad long sol blong olgeta.

Blong stap revren long ol tabu samting i stap soemaot wan kwaliti long saed blong spirit we i impoten tumas; hemia risal blong koneksen blong yumi long tabu fasin mo i ripresentem lav blong yumi mo hamas yumi stap kolosap wetem Papa blong yumi long Heven mo Sevya blong yumi Jisas Kraes. Hemia i wan long ol bigfala eksperiens we i impoten long sol. Klin fasin olsem i lidim ol tingting, hat, mo laef blong yumi i go long Godhed. I tru, blong stap revren i no wan pat nomo long saed blong spirit; be hemia i impoten pat blong hem—fandesen ia we ol samting long saed blong spirit i stanap long hem, i krietem wan koneksen blong wan man o woman i go long God, olsem we ol pikinini blong yumi oli tijim yumi long hem taem oli singsing: “Taem mi revren, mi save long hat blong mi / Papa long Heven mo Jisas Tufala i stap kolosap.”

Olsem ol disaepol blong Jisas Kraes, oli invaetem yumi blong krietem presen blong stap revren long laef blong yumi blong mekem se yumiwan yumi save wantem blong toktok wetem God mo Pikinini blong Hem Jisas Kraes, mo semmak taem mekem fasin blong yumi long saed spirit i kam strong. Sapos yumi stap gat moa filing olsem long hat blong yumi, bae yumi oltaem gat bigfala glad long laef blong yumi, mo bae i nogat tumas ples blong harem nogud mo sore. Yumi mas tingbaot se blong soem fasin blong stap revren long ol tabu samting i givim mining long fulap samting we yumi stap mekem evri dei mo i mekem filing blong talem tangkyu i kam strong—i givim insperesen, respek, mo lav from ol samting we oli moa hae mo tabu.

Sore tumas, yumi laef long wan wol we fasin blong stap revren i stap lus bigwan. I tru, wol i stap selebretem ol samting we i nogat tumas respek, olsem eni magasin we i popula, televisen program, o ol seves blong intanet. Blong nogat respek long ol tabu samting, hemia i leftemap fasin blong no wantem blong save mo no kea, we i save mekem wan jeneresen i lusum intres mo mekem nekis jeneresen oli harem nogud.

Fasin blong no stap revren i save lidim yumi tu i go longwe long rilesensip we kavenan blong yumi wetem God i givim long yumi mo i mekem yumi no gat strong tingting blong mekem wok we God i givim long yumi. Taem hemia i hapen, i mekem yumi tingting nomo abaot kamfot blong yumiwan; harem gud nomo long wanem we yumi wantem harem gud long hem; mo hemia i develop i go long poen we yumi tekem ol tabu samting i kam nating nomo, iven God, mo tekem i nating tabu fasin blong yumi olsem ol pikinini blong Papa long Heven. Taem yumi nogat respek long ol tabu samting, hemia i helpem wok blong enemi blong spolem ol janel blong yumi blong kasem revelesen we oli impoten tumas long dei blong yumi tedei long saed blong spirit.

Impoten mo mining blong fasin blong gat reveren long wanem we i tabu oli talemaot klia truaot long ol skripja. Wan eksampol long Doktrin mo Ol Kavenan i save talemaot se fasin blong stap revren i go long Papa long Heven mo Pikinini blong Hem Jisas Kraes i wan impoten klin fasin blong olgeta we oli go long selestial kingdom.

Olsem wan jos, yumi stap traehad blong gat bigfala respek long Papa mo Pikinini long evri wei blong laef, hemia i tekem tu olsem wanem yumi ripresentem Tufala long ol pikja. Gaed blong Tabu Spirit i wan impoten pat blong talemaot olsem wanem ol pikja ia oli mas soem tabu fasin blong Papa mo Pikinini. Yumi mas lukaot gud blong no pat long fasin blong soem ol samting we i save konfiusum stamba lukluk blong yumi long Papa long Heven mo Pikinini blong Hem Jisas Kraes mo ol tijing blong Tufala, hemia i tekem tu olsem wanem yumi yusum ol advans tul we teknoloji i stap givim, olsem blong stap yusum atifisol intelijen (AI) blong krietem ol pikja mo ol samting we i stap insaed.

Semmak prinsipol ia i aplae long eni sos blong infomesen we i stap tru long ofisol komunikesen janel blong Jos. Wetem kea, jos i krietem evri lesen, buk, lesenbuk, mo mesej wetem daereksen blong Spirit oli apruvum blong mekemsua se yumi mentenem tabu fasin, ol valiu, mo ol standet blong gospel blong Jisas Kraes. Long wan mesej we i jes pas blong ol yang adalt blong Jos, Elda David A. Bednar i tijim, “Blong luksave sistem we i stap wok blong krosem laef long saed blong spirit mo teknoloji, Ol Lata-dei Sent oli mas putum tingting i stap daon mo prea (1) faenemaot ol gospel prinsipol we i save givim daereksen long olgeta blong yusum paoa blong kompiuta blong tingting mo lan(2) mas gat nid blong traehad wetem tru hat blong gat kampani blong Tabu Spirit mo presen blong revelesen long saed blong spirit.”

Ol dia brata mo sista blong mi, olsem yumi eksperiensem teknoloji blong tedei we i stap kam antap, bae teknoloji ia i no save mekem semmak wok blong gat bigfala respek ia we i kam tru nomo long paoa blong Tabu Spirit. Olsem ol disaepol blong Jisas Kraes, yumi mas lukaot gud blong no mekem koneksen blong yumi wetem God mo Pikinini blong Hem i kam slak taem yumi yusum ol samting we Atifisol intelijens i putumaot long wan fasin we i no stret. Yumi mas tingbaot se blong stap dipen long teknoloji blong tedei “han blong bodi blong mit mo bun” hem i no inaf mo nogat respek blong folem insperesen, edukesen, mo witnes we i save kam nomo tru long paoa blong Tabu Spirit. Olsem we Nifae i talemaot: “O Lod, mi bin trastem yu, mo bae mi trastem yu blong oltaem. Bae mi no putum tras blong mi long han blong bodi blong mit mo bun.”

Long wan nara revelesen, Profet Josef Smit i kasem instraksen se ol tempol we oli bildimap long Lod oli mas stap olsem wan ples blong stap revren i go long Hem. Truaot long ministri blong hem, dia profet blong yumi Presiden Russell M. Nelson, i talem long yumi plante taem blong wosip wetem fasin blong stap revren insaed long tabu tempol. Insaed long haos blong Lod, oli tijim yumi se yumi stap go insaed long tabu ples we Papa mo Pikinini i stap long hem. Oltaem mi faenem se i gud tumas mo iven i gat insperesen se fas samting we yumi mekem taem yumi go insaed long tempol mo rere long yumiwan from ol tabu odinens long tempol i blong karemaot sandel blong yumi mo jenis i go long waet klos. Olsem Moses, sapos yumi wantem, bae yumi save luksave se blong tekemaot sandel blong wol blong yumi, hemia i stat ia blong go insaed long tabu graon mo jenis i kam long ol wei we i moa hae mo moa tabu.

Ol brata mo sista, yumi no nid blong klaem i go long top blong hil olsem Moses i bin mekem, blong faenemaot fasin blong stap revren long ol tabu samting mo jenisim fasin blong yumi blong stap olsem disaepol i go long wan level we i moa dip long saed blong spirit mo divosen. Eksampol, yumi save faenem taem yumi traehad blong protektem envaeromen blong hom blong yumi aot long paoa blong wol. Hemia i save hapen tru long prea we i gat tru tingting mo respek long fored blong Papa blong yumi long Heven long nem blong Jisas Kraes mo stap lukaotem blong save gud Sevya blong yumi tru long fasin blong yumi blong stadi had ol toktok blong God we i stap insaed long ol skripja mo long ol tijing blong ol profet blong yumi. Mo tu, jenis ia i save kam taem yumi traehad blong ona long ol kavenan we yumi mekem wetem Lod taem yumi stap obei ol komanmen. Ol traehad ia i save givim pis long hat blong yumi. Taem yumi traehad blong kipim ol komanmen ia oltaem bae i jenisim ol hom blong yumi i kam ol ples blong haed long saed blong spirit—ol tabu ples blong fet blong yuwan we Spirit i save stap long hem, semmak olsem eksperiensem blong Moses long hil.

Yumi save eksperiensem tu, kaen jenis ia long saed blong spirit taem yumi fetful blong tekpat long Jos wosip seves, we hem i, blong stap tanem hat blong yumi i go long Lod tru long wei we yumi singsing wetem tru hat long ol tabu hym. Taem yumi tanem yumi i gowe—olsem Moses—aot long ol samting blong pulum tingting blong wol, speseli ol fon o eni samting blong yumi we i no go wetem tabu taem ia, hemia i letem yumi blong lukluk nomo blong tekem sakramen, wetem ol maen mo hat blong yumi we i lukluk nomo long Sevya mo bigfala sakrifaes blong Hem we i go wetem ol kavenan blong yumiwan. Blong lukluk nomo long sakramen i save helpem yumi blong eksperiensem fasin blong stap revren long taem we yumi stap riniu ol kavenan blong yumi wetem Sevya mo bae i mekem Sabat i gat valiu mo jenisim laef blong yumi.

Long en, yumi save eksperiensem jenis long saed blong spirit long fasin blong disaepol blong yumi taem yumi wosip long hil blong haos blong Lod—ol tabu tempol blong yumi—mo traehad blong laef wetem strong tingting blong kavenan, speseli taem yumi go tru ol tes blong laef ia.

Mi mo waef blong mi, i gat eksperiens blong mitufalawan abaot sam tabu hil wetem respek taem mitufala i stap traehad blong yusum ol prinsipol ia long laef blong mitufala, we i mekem wan jenis we i gat mining long fasin blong stap olsem disaepol blong mitufala. Mi tingbaot olsem se hem i yestedei nomo we mi stap wokbaot tru long beri graon bifo mifala i berem seken bon pikinini blong mitufala, we i bin bon eli mo i no save laef, taem waef blong mi i stap kam oraet yet long hospital. Mi tingbaot we mi stap prea wetem bigfala respek mo fasin blong stap revren i go long God, mi stap askem blong helpem mitufala long bigfala tes blong jalenj ia. Long taem ia, mi bin kasem wan klia mo hop we i gat paoa long saed blong spirit long hat blong mi: Evri samting bae i oraet long laef blong mifala sapos mi mo waef blong mi i stap strong, stap hang long glad we i kam tru long fasin blong stap laef folem gospel blong Jisas Kraes. Wanem we i luk olsem wan bigfala jalenj blong sore long taem ia i kam wan tabu eksperiens blong respek mo wan impoten eksperiens we i help blong sapotem fet blong mitufala mo i givim strong tingting long mitufala long ol kavenan we mitufala i bin mekem wetem Lod mo long ol promes blong Hem long mi mo famli blong mi.

Ol brata mo sista blong mi, fasin blong stap revren long ol tabu samting i leftemap fasin blong talem tangkyu, i mekem tru hapines i kam bigwan, i lidim maen blong yumi i go long revelesen, mo i givim bigfala glad long laef blong yumi. Hem i putum leg blong yumi long tabu graon mo leftemap hat blong yumi i go long God.

Mi testifae long yufala se taem yumi stap traehad blong gat klin fasin ia long evri dei laef blong yumi, bae yumi save gat tingting i stap daon, andastaning blong yumi long tingting blong God long yumi bae i kam bigwan, mo strong tingting blong yumi bae i kam strong long ol promes blong ol kavenan we yumi bin mekem wetem Lod. Mi witnes se taem yumi akseptem presen ia blong fasin blong stap revren long ol tabu samting—nomata long hil blong haos blong Lod, long wan miting haos, o long hom blong yumiwan—bambae yumi fulap wetem sapraes mo bigfala respek taem yumi konek i go long lav blong Papa blong yumi long Heven mo Jisas Kraes we i stret gud evriwan. Mi witnes wetem fasin blong stap reven long ol trutok ia long tabu nem blong Sevya mo Ridima blong yumi Jisas Kraes, amen.