Olsem wan Smol Pikinini
Mi testifae se ol bebi mo ol pikinini mo ol yut oli ol pikja blong kingdom blong God we oli naes tumas mo gat paoa long wol ia.
Jisas i statem las yia blong laef blong Hem long wol ia taem hem i stap trenem gud moa ol disaepol blong Hem. Sapos mesej mo Jos we Hem i stanemap bae i mas gohed long wol ia, Hem i mas tijim plante samting long ol 12 nomol man ia we oli save Hem blong samples 24 manis nomo.
Wan dei Jisas i luk Ol Twelef oli stap rao mo afta Hem i askem: “?Wanem samting ya we yufala i stap rao from?” Oli sem from raorao blong olgeta mo “oli no save ansa,” olsem we Baebol i talem. Be tija ia we i hae bitim evri tija, i luksave ol tingting blong hat blong olgeta mo filim save hae tingting we wanwan i gat. Mekem se Hem i “singaot wan pikinini i kam long hem, …
“Mo i talem se, tru Mi talem long yufala, Sipos yufala i no jenisim fasin blong yufala,blong kam olsem pikinini, bambae yufala i no save kam samtaem we God i King blong yufala.
“Be man we i mekem tingting blong hem i stap daon olsem pikinini ya, hem i hae moa, i winim olgeta narafala man we God i king blong olgeta.”
Iven bifo we Kraes i bon, las toktok blong King Benjamin i tokbaot tu bigfala tijing ia abaot fasin blong wan pikinini blong gat tingting we i stap daon. Hem i talem, “From man we i folem fasin blong wol i wan enemi blong God, … mo bae i stap olsem, blong oltaem mo oltaem, be sapos nomo hem i … kam wan sent tru long atonmen blong Kraes we i Lod, mo i kam olsem wan pikinini, we i stap lisin … i putum tingting blong hem i stap daon, … i gat plante lav, … semmak olsem wan pikinini i stap [ansa] long papa blong hem.”
Yes, i gat ol tingting we i blong ol pikinini we yumi no stap akseptem. Twantefaef yia i pas, long taem we apu boe blong mi i gat tri yia, i kakae han blong apu gel blong mi we i gat faef yia long taem ia. Kwiktaem man blong gel blong mi we i stap lukaotem ol pikinini long naet ia, i traem blong tijim evri lesen we hem i save abaot fogivnes long gel blong hem, mo afta hem i talem se, maet smol brata ia i no save tu se i filim olsem wanem sapos wan i kakae hem. Toktok blong papa ia i wok gud be i blong samples wan minit, ating wan minit haf olsem, kasem taem wan strong krae i kamaot long rum blong ol pikinini mo apu gel blong mi i singaot kwaet se, “Naoia hem i save nao.”
?So wanem ol gudfala fasin blong laef we yumi save lanem aot long ol pikinini? ?Wanem nao i bin mekem Kraes Hemwan i krae long wan naesfala storian insaed long ful Buk blong Momon? ?Wanem nao Jisas i stap tijim taem Hem i singaotem ol enjel oli kamdaon aot long heven long faea mo oli raonem ol pikinini ia, mo i talem long ol pipol ia blong “luk ol smol pikinini blong [olgeta]”?
Yumi no save wanem nao i bin mekem Hem i singaot ol enjel, be mi ting se hem i mas wan samting abaot klin fasin blong olgeta, tingting blong olgeta we i oltaem stap daon, mo wanem nao ol samting ia i save karem i kam long laef blong yumi
?From wanem wan i singaotem ol dei ia se “olgeta samting blong [wol ia] i blong nating nomo!”? ?Olsem wanem nao “ol flas tingting, mo hae tingting blong ol pikinini blong ol man” oli ol toktok we i ripresentem bigfala haos we i gat fulap spes long drim blong Lihae, i save ronemaot spirit? ?Mo ol man blong Soram? ?Grup ia we oli stap prea long olgetawan be i no from ol narawan? Alma i talem hemia abaot olgeta: “O God; oli prea long yu wetem maot blong olgeta nomo, mo semtaem oli solap … wetem ol samting nating blong wol.”
Be defren long hemia, ?i nogat wan samting we i moa naes, moa klin, o gat moa tingting we i stap daon bitim prea blong wan pikinini? I olsem se heven i stap ia long rum blong yumi. God mo Kraes oli tru tumas, be long sam narawan, bae i hadwok lelebet blong bilivim afta.
Olsem we Elda Richard L. Evans i kwotem samples 60 yia i pas: “Plante long yumi oli talem se yumi ol Kristin man, be yet … yumi no tekem Hem i series. … Yumi respektem Hem, be yumi no folem Hem. … Yumi kwotem ol toktok blong Hem, be yumi no laef folem olgeta.” “Yumi laekem Hem tumas, be yumi no wosipim Hem.”
Bae laef i defren bigwan sapos wol i stat blong respektem nem blong Jisas bitim we oli stap yusum nem blong Hem blong stap swea samtaem.
Be ol pikinini oli rili lavem Hem, mo lav ia i kamaot long ol nara rilesensip blong olgeta long laef mo wetem ol nara pikinini. Plante taem, iven taem oli smosmol nomo, i isi blong ol pikinini i lavem ol man, oli oltaem redi blong fogiv, mo laf blong olgeta i save mekem ol hat we oli strong tumas, i kam sopsop.
Mo lis i gohed mo i gohed. ?Stap Klin Evriwan? ?Tras? ?Strong paoa long tingting? ?Fasin?
Kam mo luk olsem wanem wan dia yang fren blong mi i soem fasin blong tingting we i stap daon long fored blong God.
Long 5 Jenuware, 2025—91 dei pas—oli pasem Aronik Prishud long hed blong Easton Darrin Jolley, mo odenem hem olsem wan dikon insaed long Jos Ia blong Jisas Kraes blong Ol Lata-dei Sent.
Stat longtaem i kam, oltaem Easton i bin wantem tumas blong pasem sakramen blong Kaekae blong Masta. Be tabu janis ia i kam wetem bigfala fraet ia se bae hem i no save mekem, se bae hem i foldaon, se bae oli jikim hem o bae hem i mekem hemwan mo famli blong hem i sem.
Easton, hem i gat wan sik we i save spolem hem bigwan, wan sik blong ol masel mo joen blong bodi (Ullrich congenital muscular dystrophy). Sik ia i fulumap yangfala laef blong hem wetem ol had jalenj we i spolem ol hop mo drim blong hem blong fiuja. I no longtaem bae hem i stap nomo long wiljea fogud. Famli blong hem i no stap tokbaot wanem bae i hapen long hem afta long hemia.
Long Sandei afta long odinesen blong hem, bae hem i fastaem blong Easton blong pasem sakramen. Mo strong tingting we hem i holemtaet blong hemwan, i we bae hem i save pasem tabu sakramen ia long papa blong hem, we i bisop blong wod. Taem hem i stap lukluk fored long wok ia, hem i askem strong mo plis, mo i krae mo askem strong, se fo sua bae i nogat wan, nogat wan, we bae i traem blong helpem hem. From plante risen, long hemwan, hem i nidim blong mekem hemia hemwan mo nogat help.
Afta we pris i brekem mo blesem bred—wan saen we i ripresentem bodi blong Kraes we i safa—Easton, i traehad blong wokbaot wetem bodi blong hem we i safa blong karem trei blong hem. Be i gat tri bigfala step aot long floa i go antap long ples blong pulpit. Mekem se afta we hem i karem trei blong hem, hem i putum trei blong hem i go antap long wan flat ples antap long rel blong go antap. Afta hem i sidaon long wan step, mo i pulum raet leg wetem tugeta han blong hem i go long fas step. Afta hem i pulum lef leg i go long semmak step ia. Hem i traehad olsem kasem taem hem i stap antap. Hem i winim ol tri jalenj blong gol blong hemwan.
Afta sloslo, hem i lukaotgud blong girap mo stanap bakegen. Hem i wokbaot i gobak from trei. Hem i wokbaot sam moa step mo naoia hem i stanap long fored blong bisop, papa blong hem, we ol wota blong ae blong hem oli fulap mo stap foldaon long fes blong hem, mo i stap traehad blong no haggem boe ia we i gat plante fet mo paoa long tingting. Mo Easton, wetem glad mo wan bigfala smael long fes blong hem, hem i save talem: “Mi mi leftemap nem blong [papa blong mi], mo mi finisim ol wok ya we [hem i] givim long mi blong mi mekem.”
Fet, stap tru, stap klin, tras, ona, mo long en, lav long wan papa we hem i wantem tumas blong mekem i hapi. Hemia mo plante nara kwaliti we i mekem yumi yumi talem tu: “Man we i mekem tingting blong hem i stap daon olsem pikinini ya, hem i hae moa, i winim olgeta narafala man we God i king blong olgeta.”
Ol sista, brata mo fren, long top blong lis blong ol naesfala pikja we mi save, i gat ol bebi mo pikinini mo yut we oli wantem blong mekem gud samting mo oli spesel tumas olsem olgeta we mi tokbaot tedei. Mi testifae se olgeta oli ol pikja blong kingdom blong God we oli naes tumas mo gat paoa long wol ia.
Long semmak spirit blong testemoni, mi talem witnes blong mi se yangfala Josef Smit i bin luk wanem we hem i luk, mo olgeta we oli bin visitim hem, oli bin visitim hem. Mi testifae se Russell M. Nelson we i gat tingting we i stap daon, mo klin fasin, God i odenem hem mo hem i wan spesel profet mo sia. Olsem wan man blong stap rid long ful laef blong mi, mi talem witnes blong mi se Buk blong Momon hem i buk we i blesem bitim evri nara buk we mi bin ridim, mo hem i ki ston blong smol hom blong mi. Mi talemaot witnes blong mi se prishud mo prea i stap putumbak laef blong mi—prishud blong Kraes mo ol prea blong yu. Mi save se evri samting ia i tru mo mi talem witnes blong mi long nem blong pikinini blong God, we i fetful mo gat tingting we i stap daon—Alfa mo Omega, [Hem] we [I] Stap we [I] Hae Tumas, we oli krusifae [Hem], fetful witneswe i Lod Jisas Kraes, amen.