“Kam Kolosap long Mi”

I gat ol taem we yumi filim se yumi stap kolosap long Sevya Jisas Kraes. Be yet, samtaem long ol hadtaem blong yumi long wol ia, bae yumi filim se yumi stap longwe long Hem mo wantem tumas blong save stret se Hem i save wanem i stap long hat blong yumi mo i lavem yumi wanwan. …

Jisas i lavem wanwan long yumi. Hem i givim janis ia blong go moa kolosap long Hem. Olsem we yu stap mekem wetem wan fren we yu lavem bae yu mekem long semmak fasin; taem yu toktok tru long prea long Papa long Heven tru long nem blong Jisas Kraes, lisin blong Tabu Spirit i lidim yu, mo afta givim seves long ol narawan wetem glad long bihaf blong Sevya. …

Semmak olsem ol disaepol blong Hem, evri pikinini blong Papa long Heven we i bin jusum blong gotru long get blong baptaes, yumi mekem kavenan blong stap olsem witnes blong Sevya mo blong kea long olgeta we oli stap long nid truaot long laef blong yumi long wol ia. …

Taem yu stap fetful long ol promes ia, bae yu luk Lod i kipim promes blong Hem blong stap wan wetem yu taem yu givim seves mo i mekem ol harem nogud blong yu i kam laet. Bae yu kam blong save Sevya, mo wetem taem, bae yu kam olsem Hem mo “kam stret evriwan tru long Hem.” Taem yu stap helpem ol narawan long bihaf blong Sevya, bae yu luk se yu stap go moa kolosap long Hem. …

Taem yu stap helpem olgeta long nid, bae paoa blong Lod i sapotem yu. Bae ol han blong Hem mo ol han blong yu i helpem mo blesem ol pikinini blong Papa blong yumi long Heven.

Evri kavenan wokman blong Jisas Kraes, bae oli kasem daereksen we i kam long Spirit taem oli blesem mo givim seves long ol narawan long bihaf blong Hem. Afta, bae oli filim lav blong Sevya mo faenem glad taem oli stap go moa kolosap long Hem.