Sandei Moning Sesen
Ol Bigfala Presen blong God We I No Save Finis: Atonmen blong Jisas Kraes, Laef Bakegen long Ded mo Restoresen.
Samfala Pat
Sam yia i pas, eli moning gospel klas blong mifala i lanem ol Baebol ves bae hat. Mi laekem plante ol sot ves. Hemia i kavremap tu Jon 11:35—long Inglis Lanwis, hemia hem i wan ves we i sot bitim evri narafala ves long skripja, i gat tu toktok nomo—“Nao Jisas i krae.”
Long mi naoia, krae blong harem nogud mo krae blong glad blong Jisas i testifae long wanem we i tru we i fulap long merikel: Tabu Pikinini ia blong God i bin kam long wol mo lanem long saed blong bodi, olsem wanem blong stap wetem yumi mo blesem yumi oltaem.
Taem yumi stap krae long taem blong harem nogud o long taem blong glad, Jisas Kraes i andastanem yumi stret evriwan. Hem i save stap long ol taem we yumi nidim tumas ol bigfala presen blong God we i no save finis: Atonmen blong Jisas Kraes, Resureksen mo Restoresen.
Resureksen blong Jisas Kraes i helpem yumi filim se God i akseptem yumi. Wol ia i talem long yumi se yumi tol, sot, fatfat, bunbun tumas—o se yumi no waes, naes mo no strong inaf long saed blong spirit. Tru long jenis long saed blong spirit long Jisas Kraes, yumi save ronwe long tingting blong wantem stap stret evriwan oltaem. …
Plan blong God long fridom blong joes long saed blong tingting mo long saed blong bodi i letem yumi blong lanem samting tru long eksperiens blong yumiwan. … Wetem lav, Jisas Kraes i go tru long evri samting blong andastanem evri samting. Hem i stap glad long tabu paoa blong yumi blong mekem samting mo stap glad, fasin blong stap kaen mo no wet blong kasem riwod, gat fet blong sakem sin mo fogivnes. Mo Hem i krae long harem nogud from bigfala harem nogud blong man, fasin nogud, fasin we i no stret—we plante taem i hapen from joes blong man—ol heven tu i krae mo God blong heven i krae wetem olgeta. …
Ista ia i abaot Resureksen blong Jisas Kraes: Hem i mekem wanem we hat blong yumi i wantem mo ansarem ol kwestin blong ol sol blong yumi. Hem i waepemaot ol krae blong yumi, be i lego ol krae blong glad i stap.