ʻOku ʻi ai nai ha ngaahi meʻa ʻoku ʻikai totonu ke u lotua?

Naʻe pehē ʻe Palesiteni Sefilī R. Hōlani, Ko e Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá, “Kapau “ʻe ʻikai te [tau] kole taʻetotonu,” ʻoku ʻikai ha fakangatangata ia ki he taimi, feituʻu, pe ko e meʻa ʻoku totonu ke tau lotuá.” ʻOku ʻuhinga ki he hā ke “kole taʻetotonú”?

ʻOku ʻomi ʻe Sēmisi ha tokoni: “ʻOku mou kole, pea ʻikai maʻu, koeʻuhí ʻoku mou kole kovi, koeʻuhí ke mou fakaʻosi ia ʻi hoʻomou ngaahi holí” (Sēmisi 4:3; tānaki atu hono fakamamafaʻí). Ko ia ai, ʻoku siʻi ha kaunga ʻeni mo e meʻa ʻoku tau kolé kae lahi ange ki he ʻuhingá. Kapau ʻoku tau lotu ʻaki ha ngaahi ongo siokita moʻoni, mahalo ʻoku tau kole taʻetotonu.

Te tau lava ʻo vahevahe ʻetau ngaahi ongó mo ʻetau Tamai Hēvaní, naʻa mo ʻetau ngaahi ongoʻi taʻefiemālié mo e mamahí. ʻOku totonu ke tau kole ʻEne tokoní. ʻI he taimi ʻoku tau fai ai ha ngaahi fehalaākí, ʻoku totonu ke tau fakatomala. ʻOku totonu ke tau feinga ke talangofua mo faivelenga pea fekumi ki he finangalo ʻo e ʻEikí kae ʻikai ko haʻatautolú. Pea ʻi he taimi ʻoku tau lotu aí, ʻoku ʻikai ha fakangatangata ki he meʻa ʻoku totonu ke tau lotuá.

Te tau lava ʻo fai ha ngaahi fehuʻi kuo ʻosi tali. Pea mahalo ʻe tataki fakalelei kitautolu ʻe he ʻOtuá ki he ngaahi tali kuo ʻosi ʻomí. Te tau lava foki ʻo fai ha ngaahi fehuʻi kuo teʻeki ai tali mai ʻe he ʻOtuá. Pea mahalo ʻe hokohoko atu hono ʻikai tali mai ʻe he ʻOtuá. Ko e kií ke fekumi ki Hono finangaló mo falala ʻokú Ne ʻafioʻi ha meʻa lahi ange ʻiate kitautolu.