Ko ha Toʻu Tupu mo ha Ngaahi Talēniti Lahi
ʻE lava ke fakahoko lelei ʻe Sei ʻIfalemi ha ngaahi meʻa lahi—kau ai ha ngaahi talēniti he ʻikai te ke fakatokangaʻi ʻi he kamataʻangá.
ʻŪ faitā ʻa Leslie Nilsson
Ko Sei ʻIfalemí ko ha tokotaha pōtoʻi feimeʻatokoni ʻi he kahaʻu!
ʻI he taʻu 14 ʻa Sei ʻIfalemi mei Manila, Filipainí, naʻá ne ʻosi poto ʻaupito he feimeʻatokoní. ʻOkú ne pehe, “ʻOku ou fie hoko ko ha taha pōtoʻi feimeʻatokoni ʻi ha ʻaho.” Ko e taha ʻo e meʻatokoni ʻoku ne saiʻia taha ke ngaohí ko e sinigang, ko ha meʻatokoni ʻoku tuifio ai ha kakanoʻi manu mo e vesitapolo kehekehe mo e vinika ke mahimahi pea mo ifo.
ʻOkú ne saiʻia foki ʻi he vaʻinga keimí, fakamālohisinó, feohi mo hono ngaahi kaungāmeʻá, mo e vaʻinga pasiketipoló.
Kae mahalo ko e konga ʻo hono ngaahi talēniti lelei tahá ʻoku ʻikai ke faʻa fakatokangaʻi ia.
Ngaahi Pole Fakafāmilí
ʻOkú ne fakamatala ʻo pehē, “Ko aú mei ha fāmili kuo maumau.” ʻI he taʻu hiva ʻa Sei ʻIfalemí, naʻe mavahe ʻene tamaí mei he fāmilí. Fakafokifā, naʻe pau ke ohi hake ia ʻe heʻene faʻeé toko taha mo hono ongo kiʻi tehiná. Naʻe ʻikai faingofua e ngaahi meʻá ki ha taha ʻo kinautolu.
ʻOku pehē ʻe Sei ʻIfalemi, “Naʻá ku ongoʻi ʻita lahi ʻi he kamataʻangá.” Naʻe ʻikai ke ne tuenoa. “Naʻe lahi ʻa e ʻitá mo e mamahí ʻi homau familí kotoa.”
Naʻe pau ke nau takitaha ako ke moʻui taʻe kau ai ha tamai. ʻI he taimi ʻe niʻihi, naʻe iku ʻa e loto-mafasiá mo e mamahí ki ha ngaahi fakakikihi. Ko e taimi ia naʻe fakakaukau ai ʻa Sei ʻIfalemi ke ngāue ki ha toe talēniti ʻe tahá: ko ʻene hoko ko ha tokotaha faʻa fakalelei.
“ʻOku ou feinga ke u hoko ko ha tokotaha faʻa fakalelei ʻi homau ʻapí, tautautefito ki hoku ongo kiʻi tehiná.” ‘Oku ‘aonga foki ‘ene feingá. Neongo ko e fuofua tokotaha ia ke ne fakahaaʻi ʻoku kei hoko pē ʻa e ngaahi fakakikihí, ka ʻoku nau ngāue fakataha kotoa ko ha fāmili ke fakasiʻisiʻi ʻa e fakakikihí mo hokohoko atu hono fakamalohia honau ngaahi vā fetuʻutakí. “ʻOku mau mātuʻaki vāofi ko ha fāmili!” ʻOku pehē ʻe Sei ʻIfalemi.
ʻOku ʻi ai mo ha fakapulipuli ʻe taha ki heʻenau lavameʻá. ʻOku fakamatala ʻa Sei ʻIfalemi ki ha ʻuhinga faingofua kae mahuʻinga ki he vāofi hono fāmilí: ʻOkú ne pehē, “ʻOku mau hokohoko atu ʻi he muimui ki he ngaahi akonaki ʻa Sīsū Kalaisí.”
Ngaahi Lavameʻa Fakafāmilí
Naʻe pehē ʻe Sei ʻIfalemi, “Ko e taha ʻo e ngaahi tefitoʻi ʻuhinga ʻoku mau kei uouangataha ai ki he ʻaho ní ko ʻemau nofo maʻu ʻi he Siasí pea hokohoko atu ʻemau muimui kia Sīsū Kalaisí. ʻOku mau ō ki he houalotu sākalamēnití he Sāpate kotoa pē mo fakahoko ha efiafi fakafāmili ʻi ʻapi he uike kotoa pē.”
Ko e founga ʻe taha ʻoku vāofi ai e fāmili ko ʻení ko e feohi fakataha ʻi tuʻá.
ʻOku nau maʻu foki ha taimi fakaʻaho ke feohi lelei ai. ʻOkú ne pehē, “ʻOku mau fepoupouaki maʻu pē ʻi he ngaahi talēniti ʻoku mau maʻú pea mo e ngaahi fili ʻoku mau fakahokó.” Tatau ai pē pe ʻoku ʻuhinga ia ke feohi ʻi he paʻaké, fetokoniʻaki ʻi he ngāue fakaako mei ʻapí, maʻulotu fakafāmilí, pe feohi ʻi peito mo kakata fakatahá, ʻoku nau ʻiloʻi lahi ange ʻa e mahuʻinga ʻo hono langa hake honau fāmilí ʻi he ʻaho takitaha.
Kuo ako ʻe Sei ʻIfalemi mo e fāmilí ʻa e mahuʻinga ʻo e ako fakatahá—ʻo tatau ai pē pe ko e ngāue fakaako mei ʻapí, folofolá, pe ngaahi meʻa foʻou ʻoku nau manako aí.
Mālohi ʻia Kalaisí
ʻOkú ne pehē, “Naʻe ʻalu pē taimí mo ʻeku lava ʻo fakamolemoleʻi ʻeku tamaí.” ʻI he taimi ʻoku aʻu mai ai ki he fakamolemolé, kuo ʻiloʻi ʻe Sei ʻIfalemi ha meʻa ʻoku fefaʻuhi ha tokolahi ke ako ʻi he kotoa ʻo e moʻuí. “ʻI he taimi ʻoku ou fakamolemoleʻi ai ha tahá, ʻe mole atu ʻa e ʻita ko ia ʻi hoku lotó, pea ʻoku ʻikai fiemaʻu ke u toe nofo ai.”
Sai, ko hono moʻoní, ʻoku faʻa faingofua ange hono lea ʻakí ʻi hano fai. ʻOku tau fakamolemoleʻi fēfē ha taha ʻi he taimi ʻoku hangē ai ʻoku ʻikai ke tau lava ʻo maʻu ʻa e mālohi ke fai iá? ʻOku toe tuhu pē ʻa Sei ʻIfalemi kia Sīsū Kalaisi. ʻOkú ne pehē, “ʻOku ʻomi ʻe he mālohi ʻo Sīsū Kalaisí ha ivi mo ha fakahinohino ke tau ikunaʻi ai hotau ngaahi faingataʻa ʻi he moʻuí.” “ʻI hotau māmaní he ʻahó ni, ʻoku lahi fau e ngaahi faingataʻa mo e ʻahiʻahi ʻe faingofua ke nau maumauʻi fakalaumālie, fakaeloto, fakaʻatamai, mo fakatuʻasino kitautolú. ʻE lava ʻe Kalaisi ʻo fakafaingofuaʻi ange ia maʻatautolu.”
ʻE lava ke ʻave ia ʻe heʻene ngaahi taukei ʻi he peitó ke lavameʻa ʻi ha ʻaho. Ka ʻe hanga ʻe he fili ʻa Sei ʻIfalemi ke falala kia Sīsū Kalaisi ko hono mālohingá ʻo ngaohi ia ke toe lavameʻa ange.
Ko e Meʻa ʻOkú Ne ʻOange Kia Sei ʻIfalemi Ha ʻAmanaki Leleí
Lolotonga e ngaahi taʻu siʻi kuohilí, kuo maʻu ʻe Sei ʻIfalemi ha ʻamanaki lelei mo ha fakalotolahi mei he potufolofola tatau naʻe fakaʻaongaʻi ʻi he kaveinga ʻa e toʻu tupú ki he 2023: “ʻOku ou faʻa fai ʻa e ngaahi meʻa kotoa pē ʻia Kalaisi ʻokú ne fakamālohi[a] aú” (Filipai 4:13).
“ʻI he taimi ʻoku ou manatuʻi ai e veesi ko iá, ʻoku ou manatuʻi ʻe lava ke takiekina kitautolu ʻe Kalaisi ʻi ha faʻahinga faingataʻa pē ʻoku tau fehangahangai mo ia.”