Kiʻi Mālōlō mei he Tauʻolunga Pāleí

Naʻá ku ʻamanaki te u foki o tauʻolunga ʻi he taimi ʻe aʻu ai ki he taʻu fakaako foʻoú ʻa ia ko e faʻahitaʻu fakatōlaú. Ka ʻi he aʻu ki aí, naʻá ku kei fakaakeake pē. Hili haʻaku lotu lahi ʻi Sepitema, ne u fai ha fili loto-toʻa ke u ʻalu ki ha kilīniki ke tokoni ki heʻeku moʻuí.

Naʻe kamata foki ke u ʻalu ki he seminelí. Ko ha founga lelei ia ke kamata ʻaki hoku ʻahó, ko e fakaʻutumauku ʻi he ongoongoleleí. Kuo teʻeki ke u anga ʻaki e ako e folofolá. Naʻe tokoni hono tuku mavahe ʻa e foʻi houa ko iá ʻi he ʻaho takitaha ke u fakaʻutumauku ai ʻi he folofolá, ke fakatupulaki ha vā fetuʻutaki mālohi ange mo e ʻOtuá.

Kimuʻa ʻi hoku ngaahi faingataʻaʻia fakafaitoʻó, naʻá ku fakaʻaongaʻi ha taimi lahi ki he tauʻolungá naʻe fakaʻau ke ʻiloʻi ʻaki au ia. ʻI he ʻikai ke toe ʻi ai ha ʻekitivitī ke u kau ki ai lolotonga e taimi faingataʻa ko ʻení, naʻá ku ongoʻi hē ai pea hangē naʻe mole ha meʻa meiate aú. Ka naʻá ku fakatokangaʻi ko e lahi ange ʻeku ʻalu ki he seminelí, lau ʻeku folofolá, mo feohi mo e toʻu tupu ne nau fai e meʻa tataú, ko e lahi ange ia ʻeku fakamālohia hoku tuʻunga ko e fānau ʻa e ʻOtuá. Hili haʻaku ongoʻi hē ʻi ha taimi fuoloa, naʻe tokoni moʻoni ʻeni ke u maʻu ha ʻamanaki lelei mo ha ʻuhinga.

Naʻe tokoni lahi kiate au ha foʻi fakakaukau ʻe taha naʻe faʻa ʻohake maʻu pē lolotonga ʻeku kalasi seminelí. Ko e fakakaukau ko ʻení ko e founga ia ʻoku fakamālohia ai kitautolu ʻe Kalaisi lolotonga hotau ngaahi faingataʻá. Naʻe poupouʻi kimautolu ʻe heʻeku faiako seminelí ʻi he kalasi takitaha ke mau hiki ha fanga kiʻi fakamatala ʻi ha laʻipepa ʻoku ala fakapipiki fekauʻaki mo ha meʻa ʻoku “piki ʻi heʻemau fakakaukaú.” ʻI heʻeku manatu ki aí, naʻe nofotaha ʻeku fanga kiʻi fakamatalá kotoa ʻi he ʻi ai ʻa Kalaisi maʻaku mo tāpuakiʻi au ʻi hoku ngaahi faingataʻá. Naʻá ku ongoʻi hangē naʻá ku maʻu ha fakamanatu fakaʻaho naʻe ʻi ai ʻa Kalaisi ke tokoniʻi au.

Hili ha māhina lōloa ʻe ono, naʻe faifai pea fakaʻatā au ʻe he toketaá ke u foki ʻo tauʻolunga. ʻI he kamataʻangá, naʻá ku manavasiʻi ʻaupito he naʻá ku ongoʻi hangē kuo mole kotoa hoku iví. Naʻe hokohoko atu pē ʻeku ngāué, lotú, ʻalu ki he lotú, mo ʻamanaki lelei pē kapau te u fai hoku lelei tahá, ʻe tokoniʻi au ʻe he Fakamoʻuí. ʻI heʻeku fokí, neongo naʻe ʻikai ke u mālohi ʻo hangē ko e meʻa ne u anga ki aí, ka naʻe fakahīkihikiʻi au ʻe heʻeku faiakó ʻi hoku ivi mālohí. Naʻá ne pehē naʻá ne laukau ʻaki au mo ʻeku fakalakalaká.

Neongo naʻá ku faingataʻaʻia lahi, ka ʻoku ou houngaʻia ʻi hono ʻomi heʻeku ngaahi faingataʻaʻia fakafaitoʻó ʻa e faingamālie ke fakamālohia hoku vā fetuʻutaki mo e Tamai Hēvaní mo Sīsū Kalaisí peá u ʻiloʻi ai hoku tuʻunga ko e fānau ʻa e ʻOtuá.

Ki ha taha pē ʻokú ne foua ha meʻa faingataʻa, ʻiloʻi ʻoku ʻi ai maʻu pē ha kakai ʻoku mou feohi ʻoku nau poupouʻi koe, ʻo tatau ai pē pe ʻokú ke lava ʻo sio kiate kinautolu pe ʻikai. Ko ha fānau koe ʻa e ʻOtuá. Neongo ʻoku ʻikai ke tau lava ʻo mamata kia Sīsū Kalaisi pe ko e Tamai Hēvaní, ka ʻokú Na tokangaekina mo maluʻi kitautolu. ʻOku ʻi ai ha palani ʻa e Tamai Hēvaní maʻatautolu. Mahalo he ʻikai te ke aʻusia he taimi ʻe niʻihi ʻa e meʻa ʻokú ke fiemaʻú, ka ʻe lava ke tokoniʻi koe ʻe hoʻo ngaahi ʻahiʻahí ke ke mālohi ange.

ʻOku ou fakamoʻoni kapau te tau lotu mo fokotuʻu ha vā fetuʻutaki mo e ʻOtuá, te Ne tataki, tokoniʻi, mo fakamālohia kitautolu.