ʻI he Fofonga ʻo e ʻOtuá

Tā fakatātā ʻa Katelyn Budge

Naʻe ʻi ai ha taimi naʻe ʻikai ke u fie feohi ai mo ha taʻahine ʻi heʻeku kalasi Finemuí. Naʻe ʻi ai haʻane ngaahi tōʻonga ʻe niʻihi naʻe ʻikai ke taau mo ʻeku vakaí. Ne u fehuʻi pē kiate au, “Ko e hā ʻoku pehē aí?”

Pea ʻi ha konifelenisi, naʻe talanoa ha taha fekauʻaki mo e founga ʻoku ʻikai totonu ke tau vakai ai ki he kakaí ʻi honau tuʻunga totonú ka ki he tuʻunga te nau lava ʻo aʻusiá. Naʻe ongo ia kiate au. Naʻá ku fakakaukau ke u ʻahiʻahi vakai ki he ngaahi meʻa lelei fekauʻaki mo e finemui ko ʻení. Naʻá ne kau ʻi he kalasí. Naʻá ne loto-fiemālie ke haʻu ki he lotú neongo ko ia pē mo hono tokouá naʻe hoko ko ha ongo mēmipa mālohi ʻi honau fāmilí. Naʻá ne loto-fiemālie ke haʻu ki he ngaahi ʻekitivitií, naʻa mo e ʻikai loto ki ai hono tokouá.

ʻI he kamata ke u fekumi ki ha ngaahi meʻa lelei fekauʻaki mo e finemui ko ʻení, naʻá ku ongoʻi ʻo hangē ʻoku ʻikai ke u toe sio kiate ia ʻaki hoku mata fakamāmaní. Naʻá ku ongoʻi ʻo hangē naʻá ku mamata kiate ia ʻi he fofonga ʻo e ʻOtuá, ʻa e founga te Ne mamata ai kiate iá.

ʻI heʻetau hoko ko e kau ākonga ʻa Kalaisí, ko hotau fatongiá ke feʻofaʻaki. ʻOku ou ʻilo ʻoku ʻikai faingofua maʻu pē ia. Ka ʻi heʻetau vakai ki he kakaí ʻi he founga ʻoku ʻafio mai ai ʻa e Tamai Hēvaní mo Sīsū Kalaisi kiate kinautolú, te tau lava ʻo manatuʻi ko e fānau kinautolu ʻa ha Tuʻi, ʻo hangē pē ko kitautolú. ʻOku ʻi ai pē honau ngaahi faingataʻaʻia. Ko honau fuofua taimi ʻeni ke ʻi he māmaní ai foki.

ʻOku malava ʻa e ʻofa ki he niʻihi kehé koeʻuhí te tau lava ʻo maʻu e tokoni ʻa e Tamai Hēvaní mo Sīsū Kalaisí. Te tau lava ʻo ongoʻi Hona iví mo manatuʻi ke mamata ki he niʻihi kehé ʻi Hona fofongá, kae ʻikai ko haʻatautolú.