ʻOkú Ke Maʻu Fēfē ʻa e Fiemālié ʻi Hoʻo Ongoʻi Liʻekiná?

Naʻá ku faingataʻaʻia ʻi he loto-mafasiá mo e palopalema mo hoku fāmilí. Ko e taha ia ʻo e ngaahi taimi faingataʻa taha ʻi heʻeku moʻuí. Naʻe motuhia hoku fāmilí, pea naʻe ʻikai ke mau vālelei. Naʻá ku fifili ki ha ngaahi meʻa hangē ko e, “Ko e hā ʻa e ʻuhinga ke toe hoko atu aí? Ko e hā ʻoku ou ʻi heni aí?” Ne u ongoʻi liʻekina ʻaupito.

Naʻe fakafeʻiloaki leva au ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku fāifeinga maʻu pē hoku kaungāmeʻa naʻá ne fakaafeʻi au ki he lotú ke u moʻui ʻaki ʻa e ongoongoleleí mo vahevahe ia mo e niʻihi kehé. Naʻá ne muimui ki he Laumālie Māʻoniʻoní ʻaki ʻene fakaafeʻi au ki he lotú. Naʻe fakaʻofoʻofa ʻaupito ʻa e taimi naʻá ku ʻalu ai ki he lotú. Naʻe fakafonu au ʻe he ʻalu ki he seminelí mo hoku kaungāakó ʻaki ha ʻofa lahi. Hili ha māhina ʻe valu ʻo ʻeku feinga ke ʻiloʻi ʻa e Siasí mo ako fekauʻaki mo Sīsū Kalaisí, naʻá ku papitaiso leva.

Naʻá ku ongoʻi hangē naʻe fakahaofi au ʻe Sīsū Kalaisi mei ha ngaahi meʻa faingataʻa lahi naʻá ku foua lolotonga e taimi ko iá. ʻOku ou ʻilo ko Ia naʻá Ne tokoniʻi aú.