Founga Naʻe Tokoniʻi Ai Au ʻe Kalaisi ʻi Heʻeku Kulukiatamakí

Naʻá ku faʻa fefaʻuhi lahi mo e kulukiatamaki ʻi he tui fakalotú (scrupulosity), ʻa ia ʻoku meimei hangē nai ko e Hulutuʻa e Fiemaʻu ha Meʻá (Obsessive-Compulsive Disorder). Naʻá ku fefaʻuhi lahi mo e folofola ʻokú ne fekauʻi mai ke tau haohaoá. Naʻe ʻikai mahino kiate au pe ʻe malava fēfē ia.

Ne u ongoʻi ʻi ha kiʻi taimi ne hangē ʻa e ʻalu ki he Lotú mo e lau folofolá ha kavenga mafasiá. Pea naʻe ʻikai hoko hono fai ʻo e ngaahi meʻa ko iá ko ha tōʻonga moʻui ʻoku lelei ka naʻe fuʻu hulutuʻa ʻeku fiemaʻu ke fai iá. Ka naʻá ku kei hokohoko atu pē hono fai ʻo e ngaahi meʻa ko iá he naʻá ku ʻiloʻi te nau iku pē ʻo lelei pea ko e meʻa pē ia ʻoku totonu ke u faí.

Ne faifai peá u ako ke ʻoua te u fakakaukau ki he lau folofolá ko ha tōʻonga moʻui ka ke ako fakamātoato e ngaahi lea ʻo e folofolá. Naʻe ʻikai teitei tuku ʻeku lau iá, ka naʻe fakaʻau ke siʻisiʻi ange ʻeku ongoʻi ko ha meʻa fakamālohi ia kiate aú kae lahi ange ʻene hoko ko ha meʻa ʻoku ou saiʻia ʻaupito ke fai ke u ongoʻi ai e folofola ʻa e ʻOtuá.

Naʻá ku fakatokangaʻi ʻoku tokoniʻi kitautolu ʻe Sīsū Kalaisi ke tau ikunaʻi ʻetau ngaahi taʻehaohaoá. Ko e taumuʻa taupotu tahá ke nofo mo e Tamai Hēvaní pea ongoʻi e kakato ʻo e fiefia ko Ia pē te Ne lava ʻo foakí. ʻI heʻete foaki ʻa e meʻa kotoa pē ʻokú te maʻú kia Kalaisí, ʻokú te foaki kakato ai hoto lotó kiate Ia, ʻo ʻikai fakatotoe ha meʻa. ʻOkú Ne lava leva ʻo foaki atu e meʻa kotoa pē ʻi ha founga fakalaumālie. Naʻá ku ako ke foaki hoku lotó kia Kalaisi, pea ko e ngaahi meʻa kehe fekauʻaki mo e hoko ko ha ākongá naʻe muiaki mai ia ai.