“ʻOku ou ongoʻi faikeheʻia ʻi hono vahevahe ʻeku tuí. Te u lava fēfē nai ʻo ʻai ke fakanatula angé?”

“Te u lava ʻo hoko ko ha faʻifaʻitakiʻanga ʻi he taimi kotoa pē ʻi heʻeku tui ʻa e mētali ʻa e Kau Finemuí, ngūnguuʻi e ngaahi himí ʻi he akó, pea mo hono vahevahe e folofolá mo e ngaahi tā ʻo e temipalé [ʻi he mītia fakasōsialé]. ʻOku ʻai ʻe he ngaahi meʻá ni hoku ngaahi kaungāmeʻá ke nau fie ʻilo. Te nau ʻeke mai leva pe ko e hā ʻoku fekauʻaki mo iá, pea te u ongoʻi fiemālie leva ke vahevahe ʻeku tuí mo kinautolu—ʻoku ou fiefia ʻaupito heni!”

Masilī Y., 12, Fotalesa, Palāsila

“ʻOku ou ongoʻi faikeheʻia he taimi ʻe niʻihi ʻi hono vahevahe ʻeku tuí ʻi he taimi ʻoku ou talanoa ai ki he niʻihi kehé. Ka neongo ia, ʻoku fakamanatu mai ʻe he 1 Kolinitō 2:13 ʻoku tau vahevahe ʻetau fakamoʻoní ʻi he malumalu ʻo e fakahinohino ʻa e Laumālie Māʻoniʻoní. ʻI hono fakaafeʻi ʻo e Laumālié, te tau lava fakanatula pē ʻo vahevahe ʻetau tuí mo e ngaahi meʻa ʻi hotau lotó mo e kakai kehé.”

Losimani B., 18, Paungi, ʻOtu Filipainí

“ʻOku faingataʻa ke u vahevahe ʻeku tuí koeʻuhí ko e manavasiʻi naʻa fakasītuʻaʻi pe tukunoaʻi aú. ʻI he hoko mai ʻa e ngaahi fehuʻí, ʻoku ou feinga ke fiefia, tanumaki ʻeku fakamoʻoní, mo falala kia Sīsū Kalaisi. Naʻe akoʻi au ʻe heʻeku faʻeé kapau ʻoku ou feinga ke hangē ko Kalaisí, neongo kapau he ʻikai ke u lava ʻo lea ʻaki ha meʻa lahi, ʻe ʻilo ʻe he niʻihi kehé ʻa e meʻa ʻoku ou tui ki aí ʻi he anga ʻo ʻeku moʻuí.”

ʻEti A., taʻu 19, Vila Nueva, Kuatemala

“ʻOku faingofua ange ʻeku talanoa fekauʻaki mo ʻeku tuí ʻi he taimi ʻoku ʻeke mai ai ʻe he kakai ʻoku mau feohí ha ngaahi fehuʻi fekauʻaki mo e meʻa ʻoku ou lea ʻakí mo e meʻa ʻoku ou faí. Hangē ko ʻení, ʻoku nau fehuʻi mai pe ko e hā ʻoku ʻikai ke u lea kovi aí pe ko e hā ʻoku ʻikai ke u vaʻinga sāpate aí pe ko e hā ʻoku kuikui ai hoku matá pea punou hoku ʻulú kimuʻa peá u maʻu meʻatokoni ʻi he falekaí.”

Tomasi H., 13, Koleti, Falanisē

“ʻE lava ke faingofua pē hono vahevahe ʻo e ongoongoleleí ʻo hangē ko hono fakahaaʻi ʻo e ʻofa faka-Kalaisí kiate kinautolu ʻoku mou feohí—ʻi hono vahevahe ha veesi folofola mo ha kaungāmeʻa ʻokú ne foua ha taimi faingataʻa pe ko hono fakakau ha tahá. Hoko ko ha faʻifaʻitakiʻanga lelei pea muimui ki he sīpinga ʻa Sīsuú pea te ke ongoʻi fiemālie ange ʻi hono vahevahe ʻo e ongoongoleleí ʻi he ʻaho kotoa pē.”

Maia S., 17, Tekisisi, USA