Ko Hono Ngāue ʻAki ʻo e Fakahinohinó
Maʻu ʻa e ʻOfa Taʻengatá
ʻI hoʻo fili ke ʻuluaki ʻofa ki he ʻOtuá, te ke lava ʻo ʻiloʻi ʻa e ʻofa ʻokú Ne maʻu kiate koe mo e kakai kotoa pē.
Ngaahi tā fakatātā ‘a Christine Schneider
Ko e meʻa ʻe taha ʻoku paú—ʻoku ʻofa ʻa e ʻOtuá ʻiate koe. ʻOkú ne fakakaukau kiate koe mo kumi ha ngaahi founga ke tokoniʻi ai koe ʻi he ʻaho kotoa pē! ʻOku faʻa maʻu e fakahinohino ʻa e ʻOtuá he taimi ʻe niʻihi ʻi he ngaahi fekaú. Pea ko e hā ʻa e ongo fekau māʻongoʻonga tahá? ʻOfa ki he ʻOtuá pea mo ho kaungāʻapí (vakai, Mātiu 22:37–39).
ʻOfa ki he ʻOtuá
ʻOku palōmesi mai ʻi he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí “ʻe tupulaki ho vā fetuʻutaki mo e ʻOtuá ʻi hoʻo fakahaaʻi hoʻo ʻofá ʻaki hoʻo talangofua ki Heʻene ngaahi fekaú mo tauhi hoʻo ngaahi fuakava mo Iá” ([2022], 12). Te ke lava ʻo:
-
Fepōtalanoaʻaki mo e ʻOtuá ʻi he lotu.
-
Ako fekauʻaki mo Ia ʻaki haʻo lau e folofolá.
-
Fakalaulauloto ki Heʻene taumuʻa kiate koé pea fekumi ki ha tāpuaki fakapēteliake.
ʻE tokoni hono fai ʻo e ngaahi meʻa pehení ke ke ako e founga ke ʻofa ai ki he ʻOtuá mo ʻiloʻi ʻEne ʻofa taʻe-hano-ngataʻanga kiate koé.
Kapau ʻokú ke fefaʻuhi ke ongoʻi e ʻofa ʻa e ʻOtuá, fiemālie ʻi hoʻo ʻiloʻi he ʻikai ha meʻa te ne “ fakamāvae [koe] mei he ʻofa ʻa e ʻOtuá” (Loma 8:38–39). He ʻikai ha meʻa te ne taʻofi ʻa e ʻOtuá mei Heʻene ʻofa ʻiate koé. Tui ki ai! Te ke lava maʻu pē ʻo kole ki he ʻOtuá ke tokoni atu ke ke ʻiloʻi ʻEne ʻofá.
ʻOfa ki ho Kaungāʻapí
ʻOku ʻofa ʻa e ʻOtuá ʻi he taha kotoa pē! Te tau lava ʻo ʻofa ʻi he niʻihi kehé ʻaki ʻetau:
-
Lotua kinautolu.
-
Fakafanongo ʻi he ʻofa kiate kinautolu ʻoku fefaʻuhi mo e moʻui lelei fakaeʻatamaí mo e ngaahi palopalema kehé.
-
Anga fakakaumeʻa ki he kakai ʻoku nau fotu manavasiʻi pe tuenoá.
ʻOku palōmesi mai ʻe he tohi fakahinohino Ki Hono Fakamālohia ʻo e Toʻu Tupú “ʻe tupulaki ange ho vā fetuʻutaki mo e niʻihi kehé ʻi hoʻo fakahaaʻi hoʻo ʻofá ʻo fakafou ʻi he ngāue tokoni faka-Kalaisí. Te ke maʻu ʻa e fiefiá ʻi hono ʻai ʻa e māmaní ke hoko ko ha feituʻu ʻofeina angé” (12).
ʻE tokoni hoʻo ʻofa ki he ʻOtuá mo ho kaungāʻapí ke ke ʻiloʻi ʻa e ʻofa taʻengata ʻa e ʻOtuá kiate koé pea maʻu ʻEne ʻofa taʻengata ki he niʻihi kehé!
Te ke lava fēfē ʻo ʻofa ki he ʻOtuá mo ho kaungāʻapí?