Fakakaukau ʻe Tolu ki he Moʻui Lelei Fakaeʻatamaí

Ko e hā ʻa e angamaheni? Kuó ke ʻosi sio nai ʻi ha ika ʻengikelā (anglerfish)? ʻOku ʻi ai ha foʻi maama ʻoku tautau mai ʻi honau foʻi laʻé pea ʻoku nau faʻa nofo ʻi he tahi lolotó. ʻOku ʻahiʻahi e langó ʻaki hono ngaahi vaʻé.

Ko e hā hono fakalūkufuá? ʻOku fakamoʻoniʻi ʻe he māmani fakaʻofoʻofá ni ko e kehekehé ko ha konga ia ʻo e palani ʻa e ʻOtuá.

ʻOku tau takitaha maʻu ha ngaahi talēniti, manako, mo ha ngaahi ʻulungaanga kehekehe. Lolotonga ʻetau moʻui ʻi he māmaní, ʻoku tau takitaha aʻusia ha ngaahi tāpuaki mo ha ngaahi faingataʻa kehekehe.

Ko e hā leva ka tau ʻamanaki ai ʻe tatau ʻa e tokotaha kotoa pē?

Ko e moʻoni kuo foaki mai ʻe he ʻOtuá ha ngaahi fekau pau kiate kitautolu pea ʻokú Ne finangalo ke tau tauhi kotoa kinautolu koeʻuhí he ʻokú Ne ʻafioʻi te ne ʻomi kiate kitautolu ʻa e fiefiá. Ka ʻoku ʻi ai ha founga “totonu” ʻe taha pe lahi ange ke matuʻuaki ʻaki e ngaahi tūkunga fakaʻahó.

Nofo maʻu ʻi he Laumālié pea ʻoua naʻá ke manavasiʻi ke fakafiefiaʻi ʻa e ngaahi meʻa lelei ʻoku makehe kiate koé!

ʻOku moʻoni ʻe iku hono maumauʻi ʻo e ngaahi fekaú ki he mamahí ʻi he vave tahá pe ʻamui ange. Ka ʻoku ʻuhinga nai, ko e taimi kotoa pē ʻokú ke mamahi aí, pau pē naʻá ke fai ha meʻa hala?

ʻIkai! ʻOkú ke ʻiloʻi mo ha toe meʻa te ne lava ʻo ʻai ke tau mamahi? Moʻui fakaʻahó! ʻOku lahi ha ngaahi meʻa fakalotosiʻi—hangē ko e ngaahi fakatamakí, mahamahakí, mo e ngaahi fili kovi ʻa e kakai kehé—ʻoku ʻikai ko hotau foʻui ia.

ʻI he taimi ʻoku hoko ai e ngaahi meʻa faingataʻa ko ʻení, tuku ke ke mamahi. Lotu. Akoako ke mānava fakaloloa mo tuku ke haʻu pea ʻalu ʻa e ngaahi ongó.

Kapau ʻoku lau uike ʻa e ongoʻi loto-mamahí, mahalo ʻokú ke aʻusia ha meʻa ʻoku mamafa ange hangē ko e loto-mafasiá, pea mahalo te ke fiemaʻu ha tokoni lahi ange. Hangē pē ko e ʻi ai ha kau toketā ʻoku nau tokoniʻi hotau sino fakamatelié ke leleí, ʻoku ʻi ai ha kau mataotao ʻoku nau tokoniʻi kitautolu ke tau moʻui lelei fakaʻatamai mo fakaeloto. Kamata ʻaki haʻo talaange ki ha mātuʻa, taki, pe kakai lalahi kehe ʻa e ongo ʻokú ke maʻú.

Pea … foki ki he fehuʻi totonú: Kapau ʻokú ke pehē ko hoʻo mamahí ko ha ola ia ʻo ha ngaahi fili kovi kuó ke fai, lotu mo talanoa ki ai mo e ʻOtuá. ʻE ala tokoni foki ke ke talanoa mo hoʻo pīsopé. ʻOku ʻi ai maʻu pē ha founga ke foki ai ki he melinó, fakafetaʻi ki he Fakalelei ʻa Sīsū Kalaisí!

Kuó ke ongoʻi manavasiʻi nai ʻi haʻo fai ha fehalaaki ʻo ke fakaʻehiʻehi ai mei hano ʻahiʻahiʻi ha meʻa foʻou koeʻuhí te ke ala fehalaaki? Kapau ko ia, ko ha ngaahi meʻa ʻeni ke fakakaukau ki ai:

• ʻOku ʻafioʻi ʻe he ʻOtuá ko e faingataʻaʻiá ko ha konga pē ia ʻo e moʻui fakamatelié. Ko e ʻuhinga ia ʻoku kau ai ʻi Heʻene palaní ha Fakamoʻui mei he kamataʻangá.

• Te tau lava ʻo lotua e ʻaloʻofa ʻa Sīsū Kalaisí ke fakamālohia kitautolu ʻi hotau ngaahi vaivaí mo e tōnounoú. Pea ʻi he taimi ʻoku tau faiangahala aí, te tau lava ʻo fakatomala pea fakamolemoleʻi kitautolu. Ko e ʻuhinga ʻeni ʻoku fakaofo ai e Fakalelei ʻa Sīsū Kalaisí!

• ʻOku poupouʻi kitautolu ʻe he folofolá ke tau “haʻu kia Kalaisi, pea hoko ʻo haohaoa ʻiate ia” (Molonai 10:32) He ʻikai hoko ʻa e haohaoá ʻi he moʻuí ni. Hili ʻetau toetuʻú, te tau lava ʻo hoko ʻo haohaoa hangē ko Iá.

Faʻa kātakiʻi koe. Tokanga taha ki he meʻa ʻokú ke fakahoko leleí. Pea ʻi he taimi ʻokú ke tōnounou aí, ako mei ai pea laka ki muʻa!