ʻOku Ikunaʻi ʻe he Lotú ʻa e Fakamatalilí

Tā fakatātā ʻa Katelyn Budge

Naʻe tokolahi ha fānau ʻi hoku ʻapiakó naʻa nau hoko ko ha ngaahi kaungāmeʻa loi. ʻI he holó, te nau pehē, “Fēfē, siana?” Pea nau kakata leva mo fefanafanahi kau kiate au. Naʻe fakakata ʻaki ʻe ha kakai kehe ʻa hoku fōtungá. Naʻe fakamafasia moʻoni pea naʻá ku ongoʻi momou.

Naʻe ʻikai ke u faʻa lotu. Kae tautautefito ki he taimi naʻe kamata ke faʻa fakamataliliʻi ai au ʻi he akó, naʻe kamata ke lahi ange ʻeku lotú. ʻI he kamataʻangá, naʻe ʻikai ke u fakapapauʻi ʻa e meʻa ke u lea ʻakí. Ka ʻi he fakalau ʻa e taimí, kuó u ongoʻi fiemālie ke talanoa ki he Tamai Hēvaní koeʻuhí kuó u fokotuʻu ha vā fetuʻutaki mo Ia.

Kapau ʻoku ʻi ai ha meʻa ʻoku hoko he akó, te u fai pē ha lotu ʻi hoku ʻatamaí. ʻOku ou ʻiloʻi ʻoku ʻiate au ʻa Sīsū Kalaisi, pea ko Ia ʻa e Kaungāmeʻa lelei taha te u lava ʻo maʻú. Kuo tokoniʻi au ʻe he lotú mo e manatu kia Kalaisí ke u ʻiloʻi ʻoku ʻikai mahuʻinga ʻa e ngaahi meʻa ʻoku lea ʻaki ʻe he kakai kehé. Ko e meʻa ʻoku mahuʻingá ʻa e fakakaukau mai ʻa e Tamai Hēvaní mo Sīsū Kalaisi kiate aú.