Ngaahi Fakakaukau ʻe 20 ki ha Fakafiefia Māhina Kakato ʻo e Toetuʻú

Lolotonga ʻa Tīsemá, ʻoku tokolahi ha kakai ʻoku nau tauhi ʻa e ngaahi tukufakaholo faka-Kilisimasí pea fakamaʻunga ha tokanga makehe ki he Fakamoʻuí ʻi he māhiná kotoa.

Te ke lava ʻo feinga ʻi he māhiná ni ke fai ha meʻa tatau mo hono fokotuʻu ha ngaahi tukufakaholo foʻou ʻo e Toetuʻú. Ko ha ngaahi fakakaukau ʻeni ʻe 20, ko e taha ki he ʻaho takitaha mei he ʻaho 1 ʻo ʻEpelelí ki he ʻaho 20 ʻo ʻEpelelí (Toetuʻú). Ongoʻi tauʻatāina ke faʻu ha fakakaukau pē ʻaʻau!

Ngaahi tā fakatātā ʻa Katy Dockrill

1. ʻAʻahi ki ha taha kuo fuoloa hoʻo ʻikai sio ki aí. ʻE lava ke fakamanatu atu ʻe he meʻá ni ʻa e ʻaʻahi ʻa Kalaisi kia Melé, ko ʻEne Kau ʻAposetoló, mo ha kakai tokolahi hili ʻEne Toetuʻú.

   

2. Faʻu ha tohinoa “Koeʻuhí ko Ia.” Fakaʻosi ʻi he ʻaho takitaha ʻa e sētesi “Koeʻuhí ko Ia …” ʻi ha tohinoa mo ha meʻa foʻou ʻokú ke houngaʻia ai ʻi he Fakamoʻuí.

   

3. Fanongo pe hivaʻi ha ngaahi himi mo ha ngaahi hiva fekauʻaki mo Kalaisi mo e Toetuʻú.

   

4. Ngaohi mo fakapuna ha lofa pepa. ʻI Pēmuta, ko ha tukufakaholo angamaheni ʻeni ʻo e Toetuʻú ke fakafiefiaʻi ʻaki e toe tuʻu ʻa Kalaisi mei he fonualotó.

   

5. ʻAʻahi ki ha faʻitoka. Fakakaukau ki he meʻaʻofa ʻo e moʻui taʻengatá!

   

6. Fakalaulauloto ki he Fakalelei ʻa Kalaisí lolotonga e sākalamēnití. Fakakaukau ki he ʻuhinga ʻo e Fakalelei ʻa Kalaisí kiate koe fakafoʻituituí.

   

7. Tokoni ki he niʻihi kehé. Tuku ha taimi ke ngāue tokoni mo feinga ai ke hangē ange ko Kalaisí.

   

8. Ako ke taʻo ha ngaahi foʻi pani pe mā. ʻI he tupu ʻa e maá, fakakaukau ki he founga naʻe toe tuʻu ai ʻa Kalaisi mei he maté.

   

9. Mamata ʻi he ngaahi vitiō ʻo e pōpoaki Toetuʻu ʻo e 2024 mei he kau palōfitá mo e kau ʻaposetoló. Kumi e ngaahi vitiō ko ʻení ʻi he newsroom.churchofjesuschrist.org/article/apostles-jesus-christ-easter.

   

10. Faʻu ha “fuʻu ʻakau fuaʻimoa ʻo e Toetuʻú.” Hiki e ngaahi ʻulungaanga lelei ʻo Sīsū Kalaisí ʻi ha ʻū laʻipepa, faʻo ia ʻi ha fuaʻimoa pelesitiki, pea tautau kinautolu ʻi ha fuʻu ʻakau ko ha meʻa teuteu.

    

11. ʻAʻeva ʻi ha ngoue pe ʻi natula. ʻI hoʻo fai iá, fakakaukau ki he lotu, mamahi, mo e toʻo ʻe Kalaisi kiate Ia ʻa e ngaahi angahala ʻo e māmaní ʻi he Ngoue ko Ketisemaní.

    

12. Fakamolemoleʻi ha taha. Fakakaukau ki he founga naʻe kole ai ʻe Kalaisi ki he Tamai Hēvaní ke fakamolemoleʻi ʻa e kakai naʻa nau lavakiʻi Ia ʻi hono tutuki Ia he kolosí.

    

13. Ngaohi ha lauʻi paame pepa. ʻE lava ke fakamanatu atu heni kiate koe ʻa e Sāpate Pāmé, ʻa e hū lāngilangiʻia ʻa Kalaisi ki Selusalemá.

    

14. Kumi pea teuteuʻi ha foʻi maka pea tuku ia ʻi ha feituʻu ʻe lava ha sio ki ai. Fai ʻeni ke tokoni atu ke ke fakakaukau ki he maka ʻokú ne tāpuani ʻa e fonualotó. ʻI he Toetuʻú, ʻunuakiʻi ʻa e foʻi maká ke fakamanatua ʻa e ʻikai ha taha ʻi he fonualotó!

    

15. Fakaʻohovaleʻi ha mēmipa ʻo e fāmilí ʻaki hono fufulu ha meʻa maʻanautolu. Fufulu ʻa e ʻū peletí, fakamaʻa ʻa e falekaukaú, pe ngaohi ha mohenga ʻo ha taha! Manatuʻi e founga hono fakamaʻa ʻe he Fakamoʻuí e temipalé.

    

16. Ako ʻa e ngaahi meʻa naʻe hoko ʻi he uike fakaʻosi ʻo e moʻui ʻa Kalaisí. ʻI he uike kimuʻa he Toetuʻú, ako mo ho fāmilí fekauʻaki mo e uike fakaʻosi ʻo e moʻui ʻa e Fakamoʻuí.

    

17. Maʻu meʻatokoni efiafi ʻi he maama ʻo e teʻelangó. Fakakaukau ki he fiefia ʻa Kalaisi mo ʻEne kau ʻAposetoló ʻi he ʻOhomohe Fakaʻosí ʻi he poʻulí ʻi he maama ʻo ha maama tuʻu.

    

18. Langaki hake ʻa e niʻihi kehé ʻi he Falaite Leleí. Ko e Falaite kimuʻa he Toetuʻú ko e Falaite Leleí ia. Vahevahe ha lelei ʻaki hono tokoniʻi e niʻihi kehé pe vahevahe ha pōpoaki lelei ʻi he mītia fakasōsialé!

    

19. Ako ʻa e 3 Nīfai 11. Ako fekauʻaki mo e ʻaʻahi ʻa Kalaisi ki he kakai ʻi he ongo ʻAmeliká ʻi he kuonga muʻá hili ʻEne Toetuʻú.

20. Sāpate Toetuʻú! Taimi ke fakalaulauloto. Fiefia ʻi he lotú. Hili iá peá ke fakakaukau ki he meʻa kotoa pē kuó ke fai ʻi he māhiná ni ke tokanga taha kia Sīsū Kalaisí. Ko e hā ha ngaahi liliu te ke lava ʻo fai ke ke manatu lahi ange ai kia Sīsū Kalaisi ʻi he lolotonga ʻo e taʻú?