« ការជជែកជាមួយហ្គាប៊ីអំពីការបម្រើនៅព្រះវិហារ » ប្រិយមិត្ត ខែកញ្ញា ឆ្នាំ២០២៥ ទំព័រ ៤០–៤១ ។
ការជជែកជាមួយហ្គាប៊ីអំពី ការបម្រើនៅព្រះវិហារ
ហ្គាប៊ីមានអាយុ ១១ ឆ្នាំ មកពីទីក្រុងហារ៉ារ៉េ ប្រទេស ហ្ស៊ីមបាវ៉េ ។ យើងបានសួរសំណួរនាងមួយចំនួនអំពីការដឹកនាំតន្ត្រីនៅព្រះវិហារ ។
សូមប្រាប់យើងអំពីខ្លួនរបស់ប្អូន ។
ខ្ញុំចូលចិត្តចម្អិនបង្អែម និងអាហារឆ្ងាញ់ៗ និងលេងmarimba ( ម៉ារីមបា ) ។ ខ្ញុំច្រៀង និងរាំ ហើយខ្ញុំកំពុងរៀនលេងខ្លុយ រនៀត និងព្យាណូ ។
សូមប្រាប់យើងអំពីការចាត់តាំងថ្មីរបស់ប្អូន ។
ប៊ីស្សពបានស្នើឲ្យខ្ញុំជួយដឹកនាំតន្ត្រីនៅក្នុងការប្រជុំសាក្រាម៉ង់ ។ ខ្ញុំមិនបានគិតពីរឿងនេះទេ ហើយគិតថាពួកលោកនឹងជ្រើសរើសនរណាម្នាក់ដែលមានវ័យធំជាងនេះ ។ ប៉ុន្តែខ្ញុំក៏មានអារម្មណ៍នៃសេចក្តីស្រឡាញ់ និងសប្បាយចិត្តផងដែរ ព្រោះខ្ញុំស្រឡាញ់តន្ត្រី ។
ពេលខ្លះខ្ញុំនៅតែភ័យខ្លាចថា ខ្ញុំនឹងច្រៀងអ្វីមួយខុស ហើយមនុស្សនឹងស្តាប់ឮវា ។ ប៉ុន្តែព្រះវិញ្ញាណបរិសុទ្ធជួយខ្ញុំឲ្យមានអារម្មណ៍ស្រណុកចិត្តនៅចំពោះមុខមនុស្សគ្រប់គ្នា ។ ឥឡូវនេះខ្ញុំកំពុងចាប់ផ្តើមធ្លាប់នឹងការចាត់តាំងនោះហើយ វាពិតជាសប្បាយរីករាយណាស់ !
តើការដឹកនាំតន្ត្រីសម្រាប់កម្មវិធីធ្វើបទបង្ហាញរបស់កុមារនៅក្នុងការប្រជុំសាក្រាម៉ង់មានលក្ខណៈបែបណាដែរ ?
ពីដំបូងវាជារឿងគួរឲ្យភ័យព្រួយណាស់ ។ ពេលយើងកំពុងហាត់រៀន ពេលខ្លះខ្ញុំភ្លេចពាក្យមួយចំនួន ។ ដូច្នេះខ្ញុំបានហាត់ច្រៀងជាមួយម្តាយរបស់ខ្ញុំនៅផ្ទះ ហើយវាបានជួយច្រើនណាស់ ។ នៅពេលដែលយើងហាត់រៀននៅក្នុងអង្គការបឋមសិក្សា ខ្ញុំបានច្រៀងកាន់តែឮដើម្បីជួយអ្នកដែលមិនអាចអាន ឬមិនចេះពាក្យ ។
ខ្ញុំមានអារម្មណ៍រំភើបនៅពេលដែលថ្ងៃនៃការធ្វើបទបង្ហាញបានមកដល់ ។ អ្វីគ្រប់យ៉ាងបានប្រព្រឹត្ដទៅយ៉ាងរលូន ។ ខ្ញុំមានអារម្មណ៍ថា មានភាពសុខសាន្ត និងស្ងប់សុខ ហើយខ្ញុំចងចាំពាក្យទាំងនោះនៅក្នុងបទចម្រៀង ។
តើប្អូនបានរៀនអ្វីខ្លះចេញពីបទពិសោធន៍នេះ ?
ខ្ញុំបានរៀនថា ពេលខ្លះអ្វីៗមិនដំណើរការល្អឥតខ្ចោះនោះទេប៉ុន្តែវាមិនអីនោះទេ ហើយយើងអាចរៀនពីរឿងទាំងនោះបាន ។ ការដឹកនាំតន្ត្រីនៅអង្គការបឋមសិក្សាក៏បានរៀបចំខ្ញុំសម្រាប់ការចាត់តាំងថ្មីរបស់ខ្ញុំផងដែរ !
តើប្អូននឹងឲ្យដំបូន្មានអ្វីខ្លះអំពីការបម្រើនៅព្រះវិហារទៅដល់អ្នកដទៃ ?
ពេលខ្លះវាអាចជាការលំបាកក្នុងការធ្វើការបម្រើនៅចំពោះមុខមនុស្សជាច្រើន ប៉ុន្តែសម្រាប់យើងជាកុមារគឺថាយើងអាចធ្វើជាគំរូបាន មិនថាយើងអាយុប៉ុន្មាន ឬយើងទាប ឬខ្ពស់នោះទេ ។ ខ្ញុំនឹងប្រាប់ពួកគេថា ទោះបីជាពេលខ្លះការភ័យខ្លាចរបស់យើងអាចធ្វើឲ្យយើងបាក់ទឹកចិត្ដ តែព្រះវិញ្ញាណបរិសុទ្ធអាចជួយយើងឲ្យមានអារម្មណ៍សុខសាន្តបាន ។ ទ្រង់នឹងជួយយើងឲ្យក្រោកឈរឡើងវិញម្តងទៀត ។