Ավետարանի դասընթացներ
Հմտության կիրառում 10. Զարգացնել առողջ մտածելակերպ

Հմտության կիրառում 10

Զարգացնել առողջ մտածելակերպ

ժպտացող աղջիկը

Մեր մտքերը կարող են հզոր ազդեցություն ունենալ մեզ վրա՝ թե՛ լավ, և թե՛ վատ առումներով։ Առողջ մտածելակերպ զարգացնելը կբարելավի կյանքի հանդեպ մեր տեսանկյունը և Տիրոջ աշխատանքը կատարելու մեր կարողությունը:

Քննարկումը վարող․ Ձգտեք լինել հակիրճ «Սահմանեք» և «Ցուցադրեք» բաժիններում, որպեսզի սովորողները բավական ժամանակ ունենան վարժանքի համար:

Սահմանեք

Քննարկումը վարող․ Ներկայացրե՛ք այս հմտության կիրառման թեման՝ ասելով հետևյալը։ Կարող եք նաև միասին ուսումնասիրել Վարդապետություն և Ուխտեր 6․36-ը։ Հրավիրեք սովորողներին կիսվել, թե ինչպես կարող է այս հատվածում տրված Տիրոջ խորհրդին հետևելը ազդել իրենց կյանքի վրա:

Մեր մտքերը ազդում են այն բանի վրա, թե ինչպես ենք մենք զգում և գործում (տես Առակաց 23․7)։ Բացասական մտքերը կարող են հանգեցնել վհատության, կասկածների, վախի, զայրույթի և հուսահատության: Դրական մտքերը կառաջացնեն լավատեսություն, ինքնավստահություն և հույս:

Առողջ մտածելակերպ զարգացնելու ուղիներից մեկը մեր բացասական մտքերը գրանցելն է ու դրանք փոխարինելը այնպես, որ դրանք լինեն․

  • Ավելի հուսադրող։

  • Ավելի ճշմարտացի։

  • Հավատք ցուցադրեն առ Հիսուս Քրիստոսը:

Քննարկումը վարող․ Կարող եք գրատախտակին գրել այս երեք ուղեցույցները:

Ցուցադրեք

Քննարկումը վարող. Ցույց տվեք այս հմտությունը՝ ցուցադրելով և քննարկելով հետևյալ օրինակներից մի քանիսը, որոնք վերցված են «Հակաճառել բացասական մտածելուն»՝ Հարմարվել միսիոներական կյանքին գրքույկում ([2013], 21): Դուք կարող եք հրավիրել դասարանի տարբեր անդամների յուրաքանչյուր օրինակը բարձրաձայն կարդալու դասարանի համար:

Իմ բացասական մտքերը

Իմ վերաշարադրումը առողջ մտածողություն կառուցելու համար

Ես ատում եմ շուտ արթնանալը:

Ես չպետք է դա սիրեմ։ Կարծում եմ, որ կարող եմ դա անել: Երբ վեր եմ կենում և սկսում շարժվել, թերևս ինձ ավելի լավ եմ զգում: Ես կարող եմ աղոթել Աստծո օգնության համար:

Ես չեմ կարողանա հաղթահարել այս օրը:

Մինչ այժմ ես հաղթահարել եմ ամեն օր, և ես կհասցնեմ դա անել նաև այսօր։ Այս պահին պետք է անեմ այն, ինչ իմ առջև է՝ քայլ առ քայլ: Երբ նայեմ Փրկչին, Նա կօգնի ինձ հաղթահարել այս օրը:

Այս դասը աղետ էր։

Որոշ դասեր ավելի լավ են անցնում, քան մյուսները: Լավ է, որ ուզում եմ կատարելագործվել։ Ես գիտեմ, որ Աստված կընդունի իմ լավագույն ջանքերը: Գուցե իմ զուգընկերը կօգնի ինձ կատարելագործվել:

Քննարկումը վարող. Հրավիրեք սովորողներին կիսվել, թե երբ են նրանք տեսել այս օրինակներում ցուցադրված երեք ուղեցույցները: Կարող եք նաև քննարկել հետևյալ հարցերը.

  • Ի՞նչն ամենից շատ տպավորեց ձեզ այս օրինակներից։

  • Ինչպե՞ս կարող է այս կերպ մտածելը ազդել ձեր կյանքի վրա:

Վարժվեք

Քննարկումը վարող․ Սովորողներին հնարավորություն տվեք վարժել այս հմտությունը զուգընկերոջ հետ: Կարող եք ցուցադրել հետևյալ հրահանգները․

Հետևյալ բացասական մտքերը վերաշարադրեք այնպիսի խոսքերով, որոնք ավելի հուսադրող և ճշմարտացի են, և որոնք ցույց են տալիս հավատք առ Հիսուս Քրիստոս.

  • «Բոլորն այս հարցում ինձնից լավն են: Ես պարզապես այստեղ տեղ չունեմ»:

  • «Ես չեմ կարող խոսել անծանոթի հետ։ Դա շատ վախենալու է»:

  • «Ես միշտ այնքան անկազմակերպ եմ»։

Քննարկումը վարող․ Հրավիրեք դասարանի մի քանի պատրաստակամ անդամների կիսվել, թե ինչպես են նրանք վերաշարադրել բացասական մտքերից մեկը: Լրացուցիչ վարժանքի համար կարող եք հրավիրել սովորողներին գրի առնել մի քանի բացասական մտքեր, որոնք նախկինում ունեցել են: Նրանց ժամանակ հատկացրեք, որպեսզի փորձեն վերաշարադրել այդ մտքերն այնպես, որ դրանք լինեն ավելի հուսադրող, ճշմարտացի և լի հավատքով:

Կիրառեք

Քննարկումը վարող․ Կիսվեք հետևյալով, որպեսզի օգնեք սովորողներին կիրառել այս հմտությունը.

Հաջորդ յոթ օրերի ընթացքում ժամանակ հատկացրեք ձեր ունեցած բացասական մտքերից մի քանիսը գրելու համար: Այնուհետև վերաշարադրեք դրանք այնպես, որ ավելի հուսադրող և ճշմարտացի լինեն և ցույց տան ձեր հավատքն առ Հիսուս Քրիստոս: Ուշադրություն դարձրեք, թե ինչպես է այս գործողությունը ազդում ձեզ վրա: