Դաս 9

Կիրառեք Մորմոնի Գրքի զորությունը

Քարոզիր Իմ ավետարանը, Գլուխ 5

«Մորմոնի Գիրքը, Հոգու հետ միասին, ձեր դարձի գալու ամենազորավոր միջոցն է» (Քարոզիր Իմ ավետարանը․ Հիսուս Քրիստոսի ավետարանով կիսվելու ուղեցույց [2023], 113)։ Մորմոնի Գիրքը վկայում է Հիսուս Քրիստոսի մասին և այն գործիքն է, որն Աստված պատրաստել է՝ վերջին օրերում Իսրայելը հավաքելու համար։ Մորմոնի Գիրքն ուսումնասիրելիս և դրա ուսմունքները կիրառելիս մենք կարող ենք ավելի մոտենալ Աստծուն։

Վերանայեք և հետևեք

Քննարկումը վարող․ Հրավիրեք սովորողներին մտածել իրենց վերջին ջանքերի մասին, որպեսզի կիրառեն այս դասի ժամանակ իրենց սովորած նյութը։ Կարող եք նրանց հրավիրել կիսվել իրենց ջանքերով զուգընկերոջ կամ դասարանի հետ:

Ուսումնական վարժությունների տարբերակներ

Քննարկումը վարող․ Աղոթքով ընտրեք ուսումնական տարբերակ(ներ)ը, որոնք առավելագույնս օգտակար կլինեն ձեր դասարանի համար։ Համոզվեք, որ բավականաչափ ժամանակ մնա վարժանքի և կիրառման համար։

Տարբերակ Ա․ ինչո՞ւ է Մորմոնի Գիրքն ավետարանով կիսվելու կարևոր գործիք հանդիսանում

Ուսումնասիրել

Քննարկումը վարող․ Խնդրեք սովորողներին մտածել մի գործիքի մասին, որն իրենք հաճախ են օգտագործում։ Կարող եք քննարկել նմանատիպ հարցեր.

Ինչպե՞ս է այս գործիքը հեշտացնում ձեր կյանքը:
Ի՞նչ գործիքներ է տվել մեզ Աստված՝ Իր աշխատանքը կատարելու համար։

Քննարկումը վարող․ Հրավիրեք դասարանի մեկ անդամի բարձրաձայն կարդալ Քարոզիր Իմ ավետարանը ձեռնարկի գլուխ 5-ի առաջին պարբերությունը (էջ 113)։ Խնդրեք սովորողներին հետևել և փնտրել Աստծո գործիքներից մեկը, որը Նա կիրառում է, որպեսզի օգնի մարդկանց իր մոտ գալ։ Որպես այս քննարկման մաս, կարող եք նաև օգտագործել հետևյալ հայտարարությունը։

Երեց Դեյվիդ Ա. Բեդնարն ուսուցանել է.

Մորմոնի Գիրքը Հիսուս Քրիստոսի ևս մեկ վկայություն է և վերջին օրերում դարձի գալու մի մեծ գործիք: («Աստծո զորության մեծ փառքով», Լիահոնա, նոյեմբեր 2021, 28–30)

Երեց Ուլիսես Սոարեսը վկայել է․

Մորմոնի Գիրքն Աստծո գործիքն է, որպեսզի մեր օրերում իրականացնի Իսրայելի հավաքումը և օգնի մարդկանց ճանաչել Իր Որդուն՝ Հիսուս Քրիստոսին։ («Մորմոնի Գրքի ի հայտ գալը», Լիահոնա, մայիս 2020, 33)

Քննարկումը վարող․ Կարող եք գրել հետևյալ անավարտ միտքը գրատախտակին. Մորմոնի Գիրքը Փրկչի ավետարանով կիսվելու ամենակարևոր գործիքներից մեկն է, որովհետև …

Հրավիրեք սովորողներին ավարտել նախադասությունը։ Նրանց պատասխանները գրեք գրատախտակին: Այնուհետև կիսվեք հետևյալ հրահանգներով․

Ուսումնասիրության համար գլուխ 5-ից՝ Քարոզիր Իմ ավետարանը ձեռնարկում, ընտրեք մի բաժին (էջեր 113-122)։ Այն կարդալիս, փնտրեք լրացուցիչ պատճառներ, ըստ որի Մորմոնի Գիրքը կենսական միջոց կամ գործիք է Տիրոջ ավետարանով կիսվելու համար։

Քննարկումը վարող․ Երբ սովորողներն ավարտեն ուսումնասիրելը, հրավիրեք նրանց կիսվել լրացուցիչ եղանակներով, որոնցով նրանք կավարտեն գրատախտակին գրված նախադասությունը։ Սովորողները նաև կարող են քննարկել ստորև տրված հարցերից մեկը կամ երկուսն էլ: Եթե հարցերից մեկի իրենց պատասխանում Մորմոնի Գրքից հստակ հատված նշեն, ապա կարող եք այդ հատվածները դասարանով կարդալ։

Մորմոնի Գրքի ճշմարտություններով այլոց հետ կիսվելու ինչպիսի՞ փորձառություններ եք ունեցել։
Ինչպե՞ս եք տեսել, որ Մորմոնի Գրքի ճշմարտությունները օգնեն ձեզ կամ այլոց ավելի մոտենալ Հիսուս Քրիստոսին:

Քննարկումը վարող․ Կարող եք կիսվել նախորդ հարցերի ձեր պատասխաններով։ Կարող եք նաև ցուցադրել «Shaquille’s Story about the Book of Mormon» տեսանյութը (1:28, ChurchofJesusChrist.org)։ Քննարկեք, թե ինչպես է Մորմոնի Գիրքը օգնել իր հարցերով և առ Հիսուս Քրիստոսը դարձով։

Վարժվեք

Քննարկումը վարող․ Բացատրեք, որ պատճառներից մեկը, թե ինչու է Մորմոնի Գիրքը ավետարանով կիսվելու համար կենսական աղբյուր, այն է, որ պարունակում է հավերժական նշանակության հարցերի պատասխաններ։ Հետևյալ վարժությունը կարող է օգնել սովորողներին վարժվել օգտագործել Մորմոնի Գիրքը, որպեսզի գտնեն և կիսվեն այս հարցերի պատասխաններով։ Ցուցադրեք հետևյալ հրահանգները.

Գտեք «Մորմոնի Գիրքն անդրադառնում է հոգու հարցերին» վերնագրված բաժինը Քարոզիր Իմ ավետարանը ձեռնարկի գլուխ 5-ում (էջեր 117–118)։
Այդ բաժնից ընտրեք մեկ հարց, որի վրա ցանկանում եք կենտրոնանալ:
Կարդացեք ուղեկցող սուրբ գրությունները և մտածեք այն մասին, թե այդ սուրբ գրություններն ինչպես կարող են օգնել ձեր ընտրած հարցին։
Պատրաստվեք կիսվել ձեր ուսումնասիրած հարցերից մեկով և բացատրել, թե ինչպես է այն պատասխանում հարցին։

Քննարկումը վարող․ Դասարանը բաժանեք զույգերի: Հրավիրեք դասարանի անդամներին կիսվել, թե ինչ են պատրաստել քայլ 4-ի համար՝ իրենց զուգընկերոջ հետ։ Երբ զուգընկերները ավարտեն միմյանց ուսուցանելը, կարող եք նրանց տարբեր զուգընկերներ նշանակել, որպեսզի կարողանան ևս մեկ անգամ ուսուցման վարժանք կատարել:

Լրացուցիչ վարժանքի համար կարող եք օգտագործել Հմտության կիրառում 1․ «Մորմոնի Գիրքը ներկայացրեք մարդկանց» բաժինը։

Նպատակ դրեք

Քննարկումը վարող․ Դասարանի անդամներին ժամանակ հատկացրեք՝ այսօրվա սովորածի շուրջ խորհելու և նպատակներ դնելու համար: Այդ անելու եղանակներից մեկը կիսվելն է երեց Ռոնալդ Ա. Ռասբանդի հետևյալ հայտարարությամբ և դրանից ներքև գտնվող հրավերով։

Այսօր ես առաջարկում եմ ձեզ Մորմոնի Գիրք նվիրել ձեր ընկերներին և ընտանիքի անդամներին, գործընկերներին, ձեր ֆուտբոլի մարզչին կամ ձեր խանութի վաճառողին: Նրանք Տիրոջ խոսքերի կարիքն ունեն, որոնք հնարավոր է գտնել այդ գրքում։ Նրանք առօրյա կյանքի և գալիք հավերժական կյանքի հարցերի պատասխանների կարիք ունեն։ Նրանք պետք է իմանան իրենց սպասվող ուխտի ուղու և իրենց հանդեպ Տիրոջ մնայուն սիրո մասին: Այդ ամենն այստեղ է՝ Մորմոնի Գրքում:

Երբ դուք նրանց տալիս եք Մորմոնի Գիրքը, բացում եք նրանց միտքն ու սիրտը Աստծո խոսքի համար: Գրքի տպագիր օրինակները ձեզ հետ տանելու կարիք չկա: Դուք կարող եք դրանով հեշտությամբ կիսվել ձեր բջջային հեռախոսից՝ Gospel Library հավելվածի սուրբ գրությունների բաժնից: («Այս օրը», Լիահոնա, նոյեմբեր 2022, 27)

Աղոթքով խորհեք, թե ում հետ կարող եք կիսվել Մորմոնի Գրքով: Որոշեք, թե ինչ կարող եք ուսուցանել նրանց Մորմոնի Գրքի մասին և էլ ինչ կարող եք ասել: Գրի առեք ձեր ծրագիրը:

Իմ նպատակը

Ես ․․․ (գործողությունը, որ դուք կձեռնարկեք)։
Ես կիրականացնեմ նպատակս ․․․ (պարզ ծրագիր)։

Քննարկումը վարող․ Եթե սովորողներն իրենց նպատակներով կիսվելու համար խումբ ունեն՝ ժամանակ հատկացրեք նրանց կիսվելու, թե ինչպես կաջակցեն կամ կհիշեցնեն միմյանց հաջորդ դասից առաջ: