Ընդունել Իր մասին սովորելու Փրկչի հրավերը

Նշում. Ինստիտուտի առաքելության առանցքային նպատակն է ստեղծել միջավայր, որտեղ բոլորն իրենց ապահով, աջակցված և գնահատված կզգան: Որպեսզի օգնեք ստեղծել պատկանելության զգացում, կարող եք դասի սկզբում ժամանակ հատկացնել միմյանց ճանաչելու համար: Դասընթացի ընթացքում դուք կարող եք փնտրել եղանակներ, որոնք կօգնեն բոլոր ուսանողներին իրենց ընդունված և սիրված զգալ ձեր դասարանում:

Դասը սկսելու համար կարող եք ցույց տալ Հիսուս Քրիստոսի նկարը և համառոտ կիսվել Նրա մասին ձեր զգացմունքներով: Դուք կարող եք նաև հրավիրել, որ մի քանի ուսանողներ կիսվեն, թե ինչ են մտածում Փրկչի մասին:

Դասարանով կարդացեք Մատթեոս 11․28–30 և Վարդապետություն և Ուխտեր 19․23 հատվածները և հարցրեք ուսանողներին, թե ինչն է նրանց համար առանձնանում այս հրավերների և խոստացված օրհնությունների մեջ: Դուք կարող եք կարևորել այս հրավերների անձնական և սիրառատ բնույթը, երբ ուսանողները բացահայտում են հետևյալ ճշմարտությունը. Հիսուս Քրիստոսը հրավիրում է մեզանից յուրաքանչյուրին սովորել Իր մասին և զգալ Իր խաղաղությունը:

• Ձեր կարծիքով, ի՞նչ է նշանակում սովորել Քրիստոսի մասին: (Անհրաժեշտության դեպքում հրավիրեք ուսանողներին վերանայել երեց Քիմ Բ. Քլարկի հայտարարությունը նախապատրաստական նյութի 1-ին բաժնում):

• Ձեր կարծիքով, ինչո՞ւ են խաղաղության, հանգստի և թեթևացած բեռների խոստումները կապված Հիսուս Քրիստոսի մասին սովորելու հետ: Ինչպե՞ս եք զգացել այդ տեսակի օրհնությունները:

Գրատախտակին կարող եք գրել Ավետարան = Բարի լուր արտահայտությունը: Այնուհետև հրավիրեք ուսանողներին կարդալ 3 Նեփի 27.13–16, 20–21-ը և քննարկել հետևյալ հարցերը զուգընկերոջ հետ կամ փոքր խմբերով:

• Համաձայն Փրկչի, որո՞նք են Նրա ավետարանի հիմնական ճշմարտությունները: Ինչո՞ւ են այդ ճշմարտությունները բարի լուր մեզ համար։ (Դուք կարող եք վերանայել երեց Ջեֆրի Ռ. Հոլլանդի հայտարարությունը նախապատրաստական նյութի 1-ին բաժնում):

• Ավետարանի ուսումնասիրությունն ու դրանով ապրելը ինչպե՞ս է օգնել ձեզ սովորել Փրկչի մասին և ավելի նմանվել Նրան:

Որպեսզի օգնեք ուսանողներին խորհել, թե որքանով է կարևոր, թե ինչպես կարող ենք սովորել հոգևոր ճշմարտությունը Հիսուս Քրիստոսի և Նրա ավետարանի մասին, կարող եք ներկայացնել հետևյալ սցենարը.

Կարող եք հրավիրել ուսանողներին իրենց պատասխաններով կիսվել զուգընկերների հետ, որից հետո դասարանով քննարկեք, թե որքան սահմանափակ է Փրկչի մասին սովորելու գիտական մոտեցումը։ (Կարող եք կիսվել երեց Փոլ Վ. Ջոնսոնի հայտարարությամբ, որը գտնվում է նախապատրաստական նյութի 2-րդ բաժնում): Ձեր քննարկումը ընդլայնելու համար խորհեք հետևյալ հարցերից մեկի կամ մի քանիսի մասին.

• Ո՞րն է հոգևոր ճշմարտությունը սովորելու Տիրոջ ուղին: (Կարող եք կարդալ Վարդապետություն և Ուխտեր 88․118։)

• Ի՞նչ է նշանակում սովորել հավատքով։ (Օգտակար կլինի վերանայել Նախագահ Ռասսել Մ․ Նելսոնի հայտարարությունը նախապատրաստական նյութի 2-րդ բաժնում։ Կարող եք նաև օգնել ուսանողներին բացահայտել նմանատիպ ճշմարտություն. Երբ ձգտենք սովորել ավետարանը՝ գործելով հավատքով, Հիսուս Քրիստոսի հանդեպ մեր հավատքը կմեծանա:)

• Բերեք սուրբ գրություններում նկարագրված մարդկանց կամ ձեր ծանոթների օրինակներ, ովքեր սովորել են հավատքով գործելու սկզբունքը: Մեկ րոպե տրամադրեք և մտածեք այն ժամանակի մասին, երբ Հիսուս Քրիստոսի վերաբերյալ ինչ-որ բան եք սովորել, քանի որ հավատքով եք գործել: Ի՞նչ եք սովորել Նրա մասին:

Դուք կարող եք մի քանի րոպե տրամադրել ուսանողներին, որպեսզի խորհեն և գրի առնեն, թե այս դասընթացի ընթացքում ինչ են նրանք ամենաշատը ցանկանում սովորել Փրկչի մասին, և ինչպես կարող են բարելավել Նրա մասին սովորելու իրենց ունակությունը: Խրախուսեք նրանց գրի առնել իրենց նպատակները: Փնտրեք հնարավորություններ, որպեսզի ուսանողները վերանայեն իրենց նպատակները առաջիկա շաբաթների ընթացքում: