Ko e Misiona Naʻe ʻIkai Ke Ne ʻAmanaki Ki Aí

ʻI ʻOkatopa 2025, naʻe folau ai ʻa ʻEletā Hingikelī Tanumafili Iʻaulualo mei Haʻamoa ki he Senitā Akoʻanga Fakafaifekau ʻi ʻAokalaní (MTC) ke teuteu ki heʻene misiona ʻi Wellington, New Zealand. Ka ʻi he taimi naʻe tapeva ai hono vaʻé lolotonga ʻa e sipotí, naʻe fakahaaʻi ʻe ha sivi toto ʻokú ne moʻua ʻi he suka kalasi 2, ʻa ia naʻe ʻikai ʻasi ʻi ha faʻahinga sivi fakafaitoʻo kimuʻa pea toki ngāue fakafaifekaú.

Naʻe fokotuʻu ange ʻe heʻene toketaá ke nofo pē ʻi kolo ke tokangaʻi ʻene tuʻunga moʻui leleí, naʻe liliu ai e ngāue ʻa ʻEletā Iʻaulualó. Naʻe ʻikai ke ne faifekau malanga ʻi Uelingatoni, ka te ne nofo ʻi he taimí ni ʻi ʻAokalani pea hoko ko ha faifekau tokoni.

Naʻe ʻikai foʻou ʻa Hingikelī ki Nuʻu Sila. Naʻe fāʻeleʻi ia ai pea ohi hake ia ʻe he ongomātuʻa ʻa ʻene faʻeé ʻi ʻAokalani Hihifo. Naʻe toki hiki pē ʻi he 2016, hili ʻa e mālōlō fakatou ʻosi ʻa e ongo kuí, ke nofo mo ʻene ongomātuʻá ʻi Savaiʻi, Haʻamoa.

Naʻe hoko ʻene tangataʻeikí ko e pīsope ʻo honau uōtí ʻi he taimi ko iá pea naʻá ne poupouʻi maʻu pē ʻa e toʻu tupú ke nau ō ʻo ngāue fakafaifekau. ʻOku manatuʻi ʻe ʻEletā I’aulualo, “Ko ha toʻu tupu pē ʻe toko taha [mei homau uōtí] naʻe ʻalu ʻo ngāue fakafaifekaú. Naʻá ku mātuʻaki tokanga taha pē au ki he akó ʻi he taimi ko iá.” ʻI he taimi naʻá ne maʻu ai ha sikolasipi ki he ʻUnivēsiti ʻo Haʻamoá, naʻe fokotuʻu ange ʻe heʻene tamaí ke ʻuluaki ʻalu ʻo ngāue fakafaifekau. “Naʻá ku talaange ki ai ʻe lava ke tatali ʻa e ngāue fakafaifekaú koeʻuhí ʻoku fiemaʻu ke u ʻuluaki fakahoko ʻeku akó.”

Naʻe maʻu ʻe Hingikelī ha tipiloma ʻi he saienisi ʻo e komipiutá mo ola lelei ʻene ngāue maʻuʻanga moʻui ʻi he IT, ʻo ne maʻu ha paʻanga hū mai māʻolunga ange ʻi he ngāue foʻou takitaha. Ka naʻá ne toki ʻilo kuo uiuiʻi ʻene tangataʻeikí ke hoko ko ha palesiteni fakasiteiki, pea naʻe liliu ha meʻa. ʻOkú ne pehē, “Naʻá ku ongoʻi taʻe-fiemālie ʻaupito ʻi he ʻikai ke u fai ʻa e meʻa naʻá ne fiemaʻú. Ko ia, naʻá ku fakafisi mei heʻeku ngāué ʻo fakahū ʻeku foomu ngāue fakafaifekaú.”

Kimuʻa pea mavahe ʻa Hingikelī ki Nuʻu Silá, naʻá ne ʻilo ai ko ʻene tangataʻeikí toko taha pē—ʻa ia ʻoku toko 8 ʻenau fānaú—naʻe ʻalu ʻo ngāue fakafaifekau ʻi hono toʻu tangatá. Ko Hingikelī toko taha pē ʻi he taimí ni ʻi hono ngaahi tokoua mo e tuofāfine ʻe toko 7 ke ngāué, pea ko e fika ua pē ia ʻi honau hisitōlia fakafāmilí.

Naʻe ʻamanaki moʻoni ʻa ʻEletā Iʻaulualo te ne ʻalu ki Uelingatoni hili ʻene ako faifekaú. Neongo naʻá ne manavasiʻi ʻi he fakakaukau atu ki he tukituki ʻi he ngaahi matapaá, ka naʻe langaki ʻe heʻene akoako ʻi he MTC ʻa ʻene loto-falalá. “Naʻá ku feinga pē ki ai . . . naʻá ku ʻi he tūkunga totonú… ka ne u ongoʻi hangē ʻoku totonu ke te fakahoko moʻoni iá, ko ia? Ke te maʻu ʻa e [loto-falalá].” Naʻá ne fiefia ke kamata ngāue.

Ka naʻe tapeva hono vaʻé, pea naʻe liliu ʻa e meʻa kotoa pē. Naʻá ne ʻi ha misiona ngāue fakafaifekau tokoni ʻi he taimí ni – ʻa ia naʻe siʻisiʻi ʻaupito ʻene ʻilo ki aí—pea naʻá ne kau ki ha kiʻi timi toko siʻi ʻo ha kau faifekau tokoni kehe pē ʻe toko 12 ʻi ʻAokalani kotoa.

Neongo naʻe nofo ʻa e tokolahi taha ʻo e kau faifekau tokoní ʻi honau ngaahi ʻapí pē, ka naʻe fiemaʻu ʻi he tūkunga ʻo ʻEletā I’aulualó ke ne hiki ki he ʻapi ʻo ʻene faʻētangatá ʻi ʻAokalani, ʻa ia ʻokú ne maʻu tokoni ai ke ʻalu ki he ngaahi ʻapoinimeni fakafaitoʻó mo e fakamālohisinó. ʻOku ʻikai ke ne ngāue mo hano hoa, ka ʻokú ne ngāue ʻiate ia pē, ʻo fakaʻaongaʻi ʻene taukei ʻi he IT ke fakatonutonu ha tauhiʻanga fakamatala ʻo ha ngaahi kautaha fakakolo ʻoku nau ala fiemaʻu ʻa e tokoni ʻa e Siasí.

ʻOku fakahoko ʻe he kau faifekau tokoni kehé ha ngaahi fiemaʻu kehekehe, hangē ko hono pelupelu ʻo e vala maʻá e Salvation Army, faʻu ha ngaahi naunau fale maʻá e ngaahi fāmilí, pe fokotuʻutuʻu ha ngaahi ongo ki ha polokalama ako fakalotofonua. Hangē ko e kau faifekau kotoa pē, ʻoku kei tui pē ʻe he kau faifekau tokoní honau piné, muimui ki he ngaahi fakahinohino ʻa e kau faifekaú, mo kumi ha ngaahi faingamālie ke vahevahe ai ʻenau fakamoʻoni ki he Tamai Hēvaní mo Sīsū Kalaisí.

ʻI he kamataʻangá, naʻe faingataʻaʻia ʻa ʻEletā Iʻaulualo. Naʻe kei tuku pē hono lotó ki Uēlingatoni. Naʻá ne akoako ke ʻi ai hano hoa, [tukituki ʻi] ha ngaahi matapā, [fakahoko] ha ngaahi akoʻi. ʻOkú ne pehē, “Naʻá ku fie hoko ko ha faifekau akoʻi.”

ʻI he lotu mo e fakalaulauloto, ʻoku kamata ke mahino kiate ia ʻa e ʻuhinga naʻe liliu ai ʻe he Tamai Hēvaní hono hala fonongá. Kuo tupu mei heʻene nofo mo ʻene faʻētangatá hano fakaloloto ange ʻa e ngaahi haʻi fakafāmilí. ʻOku fakalakalaka māmālie ʻene moʻui leleí—pea ʻi heʻene peheé ʻoku ʻi ai ha faingamālie ke ne lava ai ʻo ngāue ʻi Uēlingatoni. Pea kuó ne fiefia fakalongolongo pē ʻi hono fakaʻaongaʻi ʻene taukei fakakomipiutá ʻi he ngāue ʻa e ʻEikí.

ʻOku faʻa fakakaukau ʻa ʻEletā I’aulualo ki ha potufolofola mei he Tohi Tapú mei he tohi Fakahaá: “ʻOku ou ʻiloʻi hoʻo ngaahi ngāué: vakai, kuó u tuku ʻi ho ʻaó ʻa e matapā kuo ava, pea ʻe ʻikai faʻa tāpuni ia ʻe ha taha: he ʻoku ai hoʻo mālohi siʻi, pea kuó ke tauhiʻi ʻa ʻeku leá, pea naʻe ʻikai te ke fakafisingaʻi hoku hingoá” (Fakahā 3:8). Kuo hoko ʻa e veesi ko ʻení ko ha fakamaʻunga kiate ia. ʻOku fakaava ʻe he ʻOtuá ʻa e matapā totonú ʻi he taimi totonu, naʻa mo e taimi ʻoku ʻikai ko e matapā ia naʻa tau ʻamanaki ki aí.

Ko ʻene faleʻi ki ha taha pē ʻoku teuteu ke ngāué: ʻoua naʻá ke haʻisia ki he ngaahi meʻa ʻokú ke ʻamanaki ki aí. “Tali tauʻatāina ha meʻa ʻoku lelei ange ʻi he meʻa naʻá ke ʻamanaki ki aí.” ʻOkú ne pehē mahalo ko e misiona naʻe ʻikai ke ne ʻamanaki ki aí ʻa e meʻa tonu naʻá ne fiemaʻú.