Fakamaʻa ʻe he Māmá

Tā fakatātaaʻi ʻe Elia Sampò, ʻoua naʻa hiki hano tatau

Ko e taimi ʻoku fakahoko ai e ngaahi ouaú ʻi he temipalé, ʻoku lekooti takitaha ia ʻe he kau ngāue temipalé mo fakaʻilongaʻi ʻaki ha peni vahevahe kulokula ʻi he kaati ʻo e hingoá. Hili haʻaku fakahoko ha ouau ʻi ha ʻaho ʻe taha, naʻá ku mono leva e peni vahevahé ki he loto kato ʻo hoku kote suti hinehiná. Ko e taimi naʻá ku foki ai ki he ʻōfisí, naʻá ku toʻo leva ʻa e peni vahevahé.

Ko e taimi naʻá ku fō kimui ange ai ʻa e koté, kuo tau ai ha lanu kulokula ia! Naʻá ku toki ʻilo tā ne motu e mata ia ʻo e peni vahevahe kulokulá, ʻi he loto kato ʻo e koté. Naʻe ʻikai ke u tui ʻe lava ʻe ha kiʻi konga mataʻi peni vahevahe ʻo fakatupu ha faʻahinga maumau pehē.

Naʻe talamai ʻe hoku uaifí kuo maumau e koté, ka ne u pehē ke toʻo ʻaki e meʻa kulokulá ha koa fō mālohi (bleach). Ka, ʻi he taimi naʻá ku toʻo hake ai e koté mei he huhuaʻi koá, kuo mafuli ia ʻo lanu engeenga.

Naʻá ku lotu leva, “ʻE Tamai Hēvani, ko e hā ʻoku tonu ke u fai he taimi ní?” ʻI heʻeku fakakaukaú, naʻá ku sioloto au ki he palau lanu kulokula panefunefu ʻa ʻeku faʻē-tangatá, ne faʻa taimi lahi hono fakaʻaongaʻi ʻi he laʻā ʻo e manafá. Naʻá ku manatuʻi ʻoku toʻo ʻe he laʻaá ʻa e meimei lanu kotoa pē. Ko ia, naʻá ku tautau leva hoku koté ʻi he loto laʻaá, ʻo fakaʻasi e tafaʻaki lanu engeenga tahá ki he laʻaá. Ko hono fakaʻohovalé, he naʻe ʻosi ha ngaahi ʻaho lahi, kuo toe foki o lanu hinehina.

Kuo hanga ʻe he laʻaá [sun], ʻa ia ʻokú ne fakamaamaʻi ʻa e fakapoʻulí, ʻo ʻai hoku koté ke toe foki ʻo hinehina. ʻE lava ʻe he ʻAló [Son], ʻa ia ʻokú Ne hulungia ʻa e māmaní (vakai, Tokāteline mo e Ngaahi Fuakava 88:6–13; Sione 8:12), ʻo ʻai ke tau toe maʻa. Hangē ko e fakahā ʻe he ʻEikí ʻia ʻĪsaiá, “He neongo ʻa e tatau ʻo hoʻomou angahalá mo e kula ʻahoʻahó, ʻe hoko ia ke hinehina ʻo hangē ko e ʻuha hina ekiakí; kapau ʻoku kulokula ia ʻo hangē ko e kulamūmū, ʻe tatau ia mo e fulufuluʻi sipí” (ʻĪsaia 1:18).

ʻOku fakamatalaʻi ʻe ʻAlamā e tefitoʻi moʻoni ko ʻení: “ʻOku ʻikai lava ʻo fakamoʻui ha tangata ʻe toko taha, tuku kehe kapau kuo fō hono ngaahi kofú ke hinehina; ʻio, kuo pau ke fakamaʻa hono kofú kae ʻoua ke nau maʻa mei he ʻuli kotoa pē, ʻi he taʻataʻa ʻo ia kuo lau ki ai ʻa ʻetau ngaahi tamaí, ʻa ia ʻe hāʻele mai ʻo huhuʻi hono kakaí mei heʻenau ngaahi angahalá” (ʻAlamā 5:21).

ʻOku tau maʻu ʻa e faingamālie fakalangi ke fakatomala pea hoko ʻo maʻa tuʻunga ʻi he Fakalelei ʻa Sīsū Kalaisí. ʻI heʻetau fakatomalá, ʻokú Ne toʻo leva e ʻuli ʻo e angahalá pe ha toe meʻa ʻokú ne fakafeʻātungiaʻi ʻetau fakalakalaka fakalaumālié.

Ko e Toe Tuʻú ko ha faingamālie makehe ia ke manatua ai e mālohi fakahaohaoa ʻo Kalaisi ʻi heʻetau moʻuí. Pea hangē ko hono ʻai ʻe he laʻaá ke toe hinehina e kote hoku sutí, ʻoku tau fakafiefiaʻi ʻa e foʻi moʻoni ko ia ʻe hanga ʻe he feilaulau fakalelei ʻa e ʻAlo ʻo e ʻOtuá ʻo ʻai ke hina ekiaki ʻetau ngaahi angahalá ʻo hangē ko e fulufuluʻisipí.