Ko e Hā ʻOkú ne ʻAi ʻa e Toetuʻú ke Mātuʻaki Makehé? ʻOfá

Kimuʻa peá u hoko ko ha tokotaha muimui ʻo Sīsū Kalaisí, naʻá ku fifili pe ko e hā naʻe hoko ai ʻa e Toetuʻú ki ha kakai ʻe niʻihi, ko ha ʻaho mālōlō lahí.

Ka ʻoku ou ʻiloʻi he taimí ni ko e Toetuʻú ko ha fakataipe ia ʻo e ʻofa—ʻa e ʻofa ʻa Sīsū Kalaisi ki he Tamai Hēvaní pea mo kitautolu takitahá.

ʻOku fakahaaʻi ʻe he Toetuʻú ha fekauʻaki mālohi ʻi he vahaʻa ʻo e Tamaí mo e ʻAló. Ka ne taʻe-ʻoua e mana ʻo e Fakalelei ʻa Sīsū Kalaisí mo e Toetuʻu ne hoko aí, he ʻikai ha founga ke tau toe foki ai ki heʻetau Tamai Hēvaní. Naʻe ʻofa lahi ʻa Sīsū Kalaisi ki he Tamaí pea mo kitautolu takitaha peá Ne kātekina ai ʻa e “ngaahi mamahi mo e ngaahi faingataʻa pea mo e ʻahiʻahi kehekehe kotoa pē” (ʻAlamā 7:11) ka tau lava ʻo foki ki he Tamai Hēvaní.

Ko e tefitoʻi pōpoaki ʻo e Toetuʻú ko e ʻofa. ʻOku fiemaʻu ke tau ʻofa ki he niʻihi kehé ʻi he founga ʻoku ʻofa ai ʻa e Tamai Hēvaní mo Sīsū Kalaisi ʻiate kitautolú. ʻOku fakamanatu mai ʻe he Toetuʻú ke tau ʻiloʻi moʻoni e meʻa ʻoku fiemaʻu ʻe he niʻihi kehé.

ʻOfa lahi ange. Faʻa fakamolemole ange. Tokoni ke lahi ange.

Hangē ko ia naʻe vahevahe ʻe ʻEletā Tieta F. ʻUkitofa ʻo e Kau ʻAposetolo ʻe Toko Hongofulu Mā Uá: “ʻOku tau tānaki fakataha ʻa e fānau kotoa ʻa e ʻOtuá ʻa ia ʻoku nau loto-fiemālie ke tānaki kinautolú mo nau fekumi ki he moʻoní. ʻOku ʻikai ko hotau fōtunga fakaesinó, pe ko ʻetau ʻū fakakaukau fakapolitikalé, anga fakafonuá, pe fakamatakalí ʻokú ne fakatahatahaʻi kitautolú. Ka ko ʻetau kaveinga angamahení, ʻetau ʻofa ki he ʻOtuá mo e ʻofa ki hotau kaungāʻapí, ʻetau lotoʻaki ʻa Sīsū Kalaisi mo ʻEne ongoongolelei kuo fakafoki maí.”

ʻOku ʻikai tokanga ʻa e ʻOtuá ki hotau tuʻunga fakasōsialé ka ko hotau tuʻunga fakafoʻituituí. Kuo hanga ʻe he ʻiloʻi ʻo e meʻá ni mo e ongoʻi ʻo ʻEne ʻofá, ʻi he ʻaho mālōlō fakaʻofoʻofá ni, ʻo ʻai ke u fie vahevahe foki ia mo ha niʻihi kehe.

ʻOku ou hoko he taimí ni ko e palesiteni ʻo e kōlomu ʻo e kaumātuʻá, pea ʻoku ou maʻu ai ha faingamālie ke fakahaaʻi ʻa e ʻofa tatau ne u aʻusiá ki ha kau mēmipa kehe ʻo hoku uōtí.

Kuo mau fakatokangaʻi ʻi homau uōtí ko e taimi ʻoku mavahe ai ʻa e kakaí mei he ngaahi tefitoʻi moʻoni ʻo e ongoongoleleí, ʻoku nau fehangahangai mo ha ngaahi ʻahiʻahi fakatuʻutāmaki lahi.

Ke fehangahangai mo ʻení, naʻe fokotuʻutuʻu maʻu pē heʻemau pīsopé ha ngaahi ʻaʻahi, ʻo mau fili ai ha fāmili pea mau ō ki honau ʻapí ke akoʻi mo ako fakataha mo kinautolu. ʻOku liliu ʻe he ngaahi ʻaʻahí ni ha ngaahi moʻui tokolahi koeʻuhí he ʻoku ʻi ai ha laumālie ʻo e nēkeneká mo e fiefiá. Te ke lava ʻo fakatokangaʻi hono lahi ʻo e fiefia ʻa e kakaí ʻaki haʻo vakai pē ki honau fofongá. Ko ha meʻa ia ʻoku taau moʻoni ke vīkivikiʻi, pea ʻoku mau ngāue mālohi ki ai.

ʻOku tupulaki ʻo mālohi ange ʻeku tuí ʻi he ʻaho takitaha. ʻI heʻeku tokoniʻi e niʻihi kehé, tautautefito ʻi he lolotonga ʻo e ngaahi ʻaʻahi ko ʻení, ʻoku ou ongoʻi fehokotaki maʻu pē mo e Fakamoʻuí, ʻa ia kuó Ne fakahaofi takitaha kitautolu ʻo fou ʻi Hono finangalo ke fakahoko ʻEne Fakaleleí. ʻI he taimi ʻoku ou feinga ai ke angalelei ki he niʻihi kehé, ʻokú Ne akoʻi mo e Tamai Hēvaní au, pea mo fakamālohia ʻeku tuí.

Ko Sīsū Kalaisi ʻa hoku moʻuiʻangá. Naʻá Ne ʻomi ʻa e faingamālie ke u hoko ko ha tokotaha ʻoku kehe. Naʻá Ne ʻofa ʻiate au, pea naʻá Ne fakahaaʻi mai ʻEne ʻofá. Ko Sīsū Kalaisi mo ʻEne mana ʻo e Toetuʻú ko ha ngaahi fakaʻilonga ia ʻo e ʻofá, ʻapasiá, fakamoʻuí, loto-fiemālié, mo e loto-fakatōkilaló.

ʻOku moʻui ʻa Sīsū Kalaisi. ʻOkú Ne ngāue ʻi heʻetau moʻuí ʻo fakafou ʻi he kau ākonga ʻoku nau hoko ko Hono ngaahi toʻukupu ʻofá. Naʻá Ne toetuʻú koeʻuhí ke tau lava ʻo toe foki ke nofo mo ʻetau Tamai Hēvaní.

Tali Ia.

Tali ʻa e mana ʻo ʻEne Toetuʻú.

Tali ʻEne ʻOfá.

Pea vahevahe ʻa e ʻofa haohaoa ko iá mo kinautolu ʻoku mou feohí.