“Tokoni ki Heʻetau Loto Mamahí,” Liahona, ʻEpeleli 2026.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Tokoni ki Heʻetau Loto-Mamahí
ʻE lava ke tokoniʻi kitautolu ʻe he Fakalelei ʻa Sīsū Kalaisí ʻi he meʻa kotoa pē, pea naʻa mo e taimi kuo faihala mai ai kiate kitautolú.
Tá fakatātaaʻi ʻe Elia Sampò, ʻoua naʻa hiki hano tatau
Ko e taimi naʻá ku feitama ai ʻi heʻeku tama fika faá, ne mau fiemaʻu ha kā foʻou. Naʻá ku maʻu ha taha ʻi he ʻinitanetí, ka naʻá ku manavasiʻi ʻi ha fuʻu fakatau lahi pehē. Naʻá ku kole faleʻi mei hoku ngaahi kaungāmeʻa naʻe lahi ʻenau ʻiló. Naʻe talamai ʻe he tokotaha kotoa ko ha fili lelei ia, ko ia naʻá ku ongoʻi loto-lahi.
Naʻe fiemaʻu ke fakafolau mai ʻa e kaá, ko ia ne mau tatali pē. Ko e ʻaho naʻe totonu ke tau mai ai e kaá, ne mau toki ʻiloʻi ai ʻoku ʻikai ha kā ia ʻe tūʻuta mai!
Naʻe kākaaʻi kimautolu. Naʻá ku ʻohovale mo ʻikai ha toe ʻamanaki. Naʻe mole ʻemau paʻangá.
Ko e meʻa pē naʻá ku lava ʻo fai ʻi he ngaahi ʻaho hoko aí, ko e toe fakalaulaulotoa e meʻa kuo hokó. Naʻá ku mātuʻaki fuʻu loto-mamahi ʻi heʻeku fāinga ke hoko ko ha faʻē mo ha uaifi leleí. Naʻe mole hoku iví. Naʻá ku aʻu ki ha tuʻunga faingataʻaʻia peá u ʻiloʻi ne fiemaʻu ke u liliu. Ko ia, naʻá ku lotu leva ʻo kole ki he Tamai Hēvaní ke huʻi atu muʻa e kavengá mei hoku umá.
Hili ha ngaahi houa siʻi, naʻá ku ongoʻi fiemālie hifo. Naʻe ʻikai ke u toe ongoʻi mafasia, kimui ange ai. Naʻe ʻikai ke u toe ʻita pe loto-mamahi. Naʻá ku ongoʻi nonga pē. Naʻá ku fakatokangaʻi naʻe maʻu ʻa e ongoʻi nonga ko ʻení koeʻuhí ko e Fakalelei ʻa Sīsū Kalaisí.
Hili ha ngaahi māhina siʻi, ne ma maʻu ha paʻanga mei ha kautaha ʻi homau feituʻú naʻá ma kau ki ai. Ko e lahi tatau pē ia ʻo e paʻanga ne mole meiate kimautolú. Kiate aú, ko ha mana ia.
Naʻá ku ako ʻoku ʻikai fiemaʻu ia ke u fua tokotaha pē ʻeku ngaahi kavengá. ʻOku ʻafioʻi ʻe Sīsū Kalaisi hoku lotó. Naʻá Ne fuesia ʻa e “ngaahi mamahi mo e ngaahi faingataʻa pea mo e ngaahi ʻahiʻahi kehekehe kotoa” (ʻAlamā 7:11). Kuo pau ke tau tukuange ke Ne hū ki heʻetau moʻuí ka Ne lava ʻo tokoniʻi kitautolu.
Naʻe akoʻi ʻe Palesiteni Lāsolo M. Nalesoni (1924–2025): “ʻOku ʻikai ha fakangatangata ia ʻi he ivi ʻo e Fakamoʻuí ke tokoniʻi koé. Ko Siʻene mamahi taʻe-mafakakaukaua ʻi Ketisemani mo Kalevalé, maʻau! Ko Siʻene Fakalelei taʻefakangatangatá, maʻau!”
ʻOku finangalo ʻa Sīsū Kalaisi ke tokoniʻi kitautolu ʻi hotau loto mamahí, ʻo tatau ai pē pe ko e hā. ʻOku ʻikai ke tau teitei tuenoa. ʻOkú Ne ʻi ai maʻu pē maʻatautolu (vakai, Mātiu 28:20).