Tokoni ʻa e Kau Ako ʻUnivēsití ʻi he Ngaahi Ngāue ʻi ha Konifelenisi Fakavahaʻapuleʻanga ki he Laó mo e Tui Fakalotú

Naʻe tokoni ʻa e fānau ako mei he ʻUnivēsiti Pilikihami ʻIongi mei Polovo, ʻIutā mo Laʻie, Hauaiʻi, ki he kau maʻu fakataha ʻi he Konifelenisi Fakataʻu Fakavahaʻapuleʻanga ki he Laó mo e Tui Fakalotú ʻi he ʻApiako Lao ʻa BYU ko e J. Reuben Clark ʻi he konga kimui ʻo e taʻu 2025.

ʻOku fakatahatahaʻi mai ʻe he konifelenisí ha kau taki fakapuleʻanga, fakaako, mo fakalotu mei he tapa kehekehe ʻo e māmaní ke aleaʻi e ngaahi tefitoʻi moʻoni ʻo e tauʻatāina ʻa e tui fakalotú.

Ka ʻoku ʻikai ko e kau maʻu konifelenisí pē ʻoku ʻuhinga ai ʻa e lavameʻa ʻa e konifelenisí, ka ʻoku kau ki ai ʻa e fānau ako ʻoku nau ngāue ke lava lelei iá.

Naʻe omi ʻa e fānau ako BYU Hauaiʻi mei he Religious Freedom and Human Dignity Initiative [Ngāue ki he Tauʻatāina ʻa e Tui Fakalotú mo e Tauhi e Ngeia ʻo e Tangatá] ke tokoni ki he konifelenisí ke ʻaonga mo fakangalongataʻa ki he fānau akó mo e kau maʻu konifelenisí foki.

Naʻe tui ʻe he fānau ako BYUH ha ngaahi kahoa Tuitui ke nau hā makehe mei he fānau ako mei BYU Polovó. ʻOku fakafofongaʻi ʻe he ngaahi kahoa ko ʻení ʻa e ʻiló mo e tupulakí, ko ha meʻa ʻoku fakaʻamu ki ai ʻa e fānau akó lolotonga ʻenau ʻi he polokalamá. ʻI Hauaiʻí, naʻe tutu ʻa e tuituí ko ha ngaahi foʻi teʻelango, ʻokú ne ʻomi ha maama ʻi he taimi fakapoʻulí, ʻa ia ko ha ʻuhinga mahuʻinga ia ʻe taha ʻo e kahoa Tuituí.

Fakatatau ki ha kau maʻu konifelenisi tokolahi, ʻoku hoko ʻa e fānau ako tokoní ko ha konga mahuʻinga ʻo e konifelenisí. ʻOku nau hoko ko e kau fakafetuʻutaki maʻá e kau maʻu konifelenisí, ʻi hono tali e ngaahi fehuʻí, tataki kinautolu, mo tokoni ki he polokalamá. Kuo fakamālō ha kau maʻu konifelenisi tokolahi ki he fānau akó ʻi heʻenau angaʻofa mo e maama ʻi he ngaahi taʻu lahi.

Naʻe pehē ʻe Kala Havelī, ko ha tokotaha ako mei Hauaiʻi, “Ko e meʻa ia ʻoku mau feinga ki aí, ke hoko ko e maama ʻo Kalaisí.”

Naʻe hoko ha tokotaha ako Lao BYU, ko ʻEli Makongikī, ko ha Pule Fakataimi-tēpile ki he Konifelenisí. Naʻá ne pehē neongo naʻe ʻikai ko e tokangá ki hono vahevahe e maama ʻo Kalaisí ʻi he lolotonga ʻo hono palani ʻo e polokalamá mo e teuteú, ka naʻe fakanatula pē ʻene hoko lolotonga ʻa e konifelenisí.

Naʻe pehē ʻe Makongikī, “ʻOku ou tui ʻoku fakafou ʻe heʻemau talanoa mo e kau maʻu konifelenisí—ʻi heʻemau tokoniʻi kinautolú, tali ʻenau ngaahi fehuʻí, kau ʻi he ngaahi fetalanoaʻakí, pea tokoni ʻi ha aʻusia lelei maʻanautolú—naʻa mau tokoni ai ke vahevahe ʻa e ʻofa mo e maama ʻa Kalaisí.”

ʻI he fakaʻosinga ʻo e konifelenisí, naʻe foaki ʻe he fānau ako BYUH ʻa e ngaahi Kahoa Tuituí ki he kau maʻu konifelenisi ne nau fetuʻutakí pea fakaafeʻi ai kinautolu ke kau mai ki he Polokalama ki he Tauʻatāina ʻa e Tui Fakalotú mo e Tauhi e Ngeia ʻo e Tangatá ʻi honau ʻapiakó ʻi ʻEpeleli, ʻa ia ʻoku nofotaha ai e tokangá ki ha tui fakalotu pau.

ʻOku tataki ʻe Lisi Levati mei Fisí ʻa e polokalama ʻi BYUH. Naʻá ne pehē ko ha meʻa mahuʻinga ʻa hono fokotuʻu ha ngaahi vā fetuʻutaki ʻoku tuʻuloá. Naʻe nofo taha ʻa e tokanga ʻi he konifelenisi ʻi BYUH ʻi he taʻu kuoʻosí ʻi he vahefonua Pasifikí, ʻa ia naʻe kau mai ki ai ha fānau ako ʻe teau tupu mei he ngaahi fonua ʻo e Pasifikí.

Naʻe pehē ʻe Levati, “ʻOku ʻikai ngata pē ʻi hono fakatupulaki honau vā mo e kau maʻu konifelenisi kehé, ka ʻoku poupouʻi ai kinautolu ke nau tupulaki ʻi he tafaʻaki ko ʻení, ʻi heʻenau hoko ko ha fakafofonga lao pe kau ʻi he ngāue ki he tauʻatāina ʻo e tui fakalotú mo e tauhi e ngeia ʻo e tangatá.”

Naʻe tokoni lahi foki mo e ʻēlia Pasifikí ki he konifelenisi ICLRS, ʻi hono langa ha ngaahi vā fetuʻutaki mo e fānau akó mo e kau maʻu konifelenisi kehé lolotonga ia ʻenau vahevahe ʻenau fakakaukaú.

Naʻe ongoʻi ʻe Makongikī naʻe mahuʻinga ʻa e ngaahi leʻo mei he Pasifikí. “ʻOku mahuʻinga ke ʻi ai ha ngaahi leʻo mei he Pasifikí ʻi he tēpile ʻa ia ʻoku aleaʻi ai e ngaahi kaveinga mahuʻingá ni.”

Lolotonga ha taimi faikehekehe lahi pehē, naʻe ongoʻi ʻe Makongikī ko e konga mahuʻinga taha ʻo e konifelenisí kiate ia, mo e niʻihi kehé, ko hono fakatupulaki ʻo e ngaahi vā fetuʻutakí. “Naʻe ola lelei ʻa e konifelenisí koeʻuhí he naʻe ʻikai ha ʻfakafaʻafaʻahi.ʼ” Naʻe pehē ai ʻe Makongikī, “Naʻe fakaʻofoʻofa ʻa e fetuʻutaki tonu mo e niʻihi kehé.”

ʻOku haʻu fakataha ha kakai mei he ngaahi puipuituʻa, fakakaukau, mo ha ngaahi aʻusia kehekehe pea nau tokoni kotoa ki he fealeaʻakí. ʻOku ngāue ʻa e kakaí ke mahino ʻa e ngaahi fakakaukau ko ia mahalo ʻoku ʻikai ke lahi hono fakahokó pea vahevahe ʻenau ngaahi fakakaukaú ke ohi ha mahino lahi ange mo ha fakaʻapaʻapa.

Naʻe pehē ʻe Nilima Mungamula, ko ha tokotaha ako mei ʻInitia, “ʻOku mau fiemaʻu ke ʻiloʻi ʻe he tokotaha kotoa, neongo pe ko e hā ʻenau tui fakalotú pe tuí, ʻoku nau mahuʻinga kotoa pea ʻi ai ʻene mahuʻinga lahi mo e maama.”