Naʻe Liliu ʻEku Mamahí ki he Fiefia

Tā fakatātaaʻi ʻe Brian Kranz

ʻI hoku taʻu 18, ne mālōlō siʻeku kuitangata he tafaʻaki ʻo ʻeku faʻeé. ʻI he taimi ko iá ʻi heʻeku moʻuí, naʻe teʻeki ai mate ha taha ofi mai kiate au. Naʻá ku ʻiloʻi ʻe hoko ia ʻi ha ʻaho, ka naʻe ʻikai haʻaku ʻamanaki ʻe hoko fakafokifā mai.

Naʻe moʻui lelei pē ʻeku kui tangatá, ka naʻá ne pā kālava ʻo ʻikai ha fakatokanga. Naʻe ʻave vave ia ʻe heʻeku kui fefiné ki falemahaki, ka naʻá ne mālōlō hili ha ʻaho ʻe fā mei ai.

Ko e fuofua taimi ke mole mātuʻaki fakafokifā ai ha tahá, ʻoku ongo ia. Naʻe faikehe ʻa e kau ʻa ʻeku kui tangatá he meʻa mahuʻinga kotoa ne hoko ʻi heʻeku moʻuí pea puliá.

ʻI he ʻosi ʻa e meʻafakaʻeikí, naʻá ku kumi ha founga ke fakalāngilangiʻi ai e manatu ki heʻeku kui tangatá mo homa taimi fakatahá. Naʻá ne manako ke ngāue ʻi heʻene lolí mo fai ha ngaahi ngāue kehe. Ko hono moʻoní, ko e taimi naʻá ne pā-kālava aí, naʻá ne ʻi heʻene fale tauʻanga meʻalelé ʻo ne toʻotoʻo ha meʻangāue (wrench) ʻi he taha hono ongo nimá, ʻo ngāue hangē ko e angamahení.

Naʻá ku fakakaukau ai te u lava mo au ʻo ngāue ʻi he ngaahi kaá. Naʻe tokoni ʻeku fakahoko iá ke u ongoʻi ofi ai kiate ia. Naʻá ku tafoki foki ki he lotú mo e folofolá, ʻo u maʻu ai ha nonga ke laka ki muʻa ʻi he tui mo e ʻamanaki lelei ʻi he ʻikai ke ne ʻi aí.

Naʻe fakamanatu mai ʻe he palōfita ko ʻApinetaí kiate au, “ʻOku ʻi ai ha toetuʻu, ko ia ʻoku ʻikai ha ikuna ʻa e faʻitoká, pea ʻoku folo hifo ʻa e huhu ʻo e maté ʻia Kalaisi” (Mōsaia 16:8).

Naʻe tokoni e mālōlō ʻeku kuitangatá ke u maʻu ha fakakaukau naʻá ne ʻai ke toe mahuʻingamālie ange ʻa e Fakalelei ʻa Sīsū Kalaisí ʻi heʻeku moʻuí. Pea ʻi heʻeku fakaʻapaʻapaʻi ʻeku kuitangatá ʻaki ʻeku ngāue ʻi he ngaahi kaá, naʻá ku fakatokangaʻi ai ʻoku tau fakaʻapaʻapaʻi ʻa Sīsū Kalaisi—pea ʻe lava ke tau ongoʻi ofi kiate Ia—ʻi heʻetau feinga ke moʻui hangē ko ʻEne moʻuí, ako ʻEne ngaahi folofolá, vahevahe ʻEne ongoongoleleí, mo fakahoko e ngaahi ngāue [ʻa ʻEne] Tamaí” (Sione 10:37). ʻOku ʻomi ʻe hono fai iá ha ʻuhinga loloto ange ki he Fakalelei ʻa e Fakamoʻuí mo fakatupulaki ʻetau falala kiate Iá.

Naʻe akoʻi ʻe ʻEletā Kēliti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻI heʻetau tangi ʻi he mamahí pe fiefiá, ʻoku ʻafioʻi lelei ia ʻe Sīsū Kalaisi. ʻE lava ke Ne ʻi ai ʻi he ngaahi momeniti ʻoku tau fiemaʻu lahi taha ai ʻa e ngaahi meʻaʻofa maʻongoʻonga ʻo ʻitānití: ʻa e Fakalelei ʻa Sīsū Kalaisí, Toetuʻú, toe fakafoki ki he tuʻunga totonú.”

Kuo liliu ʻe Sīsū Kalaisi ʻeku mamahí ko e fiefia. Koeʻuhí ko Ia mo ʻEne Fakaleleí, ʻoku ou ʻiloʻi ai te u toe mamata ki heʻeku kuitangatá.