Mata ke Mamata ki he Leleí

Tā fakatātaaʻi ʻe Brian Kranz

ʻI Sānuali 2025, naʻe kamata ke faingataʻaʻia hoku uaifi ko Keilá ʻi hono fofongá. Naʻe langa maʻu pē hono ʻulú mo mamahi hono mata toʻohemá. Naʻe ʻikai ke lava ʻo sio lelei, pea kamata ke ma hohaʻa.

ʻI he taimi naʻá ma ō ai ki he toketā-matá (optometrist), naʻá ne maʻu ko hono mata toʻohemá naʻe mālohi ai e tā hono totó. Naʻá ne fekau leva ke ma ō ki ha toketā ki he neave ʻo e matá [ophaomogist] ke ne sivi pe ʻoku uesia e neave ʻi hono matá (glaucoma). Naʻe tuʻu fakatuʻutāmaki ʻa e vakai ʻa Keilá. Naʻá ma telefoni ki ha kau toketā, ka ko e lahi ʻo e ngaahi ʻōfisí naʻe kei tāpuni ki he ʻaho mālōloó. Ko e meʻa pē naʻá ma lava ʻo faí ko e tatali.

Naʻe mafasia lahi ʻema fakakaukaú ʻi he loto-hohaʻá. Naʻá ma tafoki ki he Tamai Hēvaní ʻi he lotu, ʻo tautapa ke hoko ʻa e meʻa kotoa ʻo fakatatau mo Hono finangaló. Naʻá ma fakaʻamua ha tokoni, pea naʻá ma ongoʻi ʻEne ʻofá. Naʻá ma ʻiloʻi ʻe lelei ʻa e meʻa kotoa.

Naʻe fāifai peá ma maʻu ha faingamālie ke sio ki ha mataotao, ʻi ha ʻosi ha ʻaho ʻe fā, ka ko ʻene lisi talitalí naʻe laumāhina hono lōloá. Naʻe maʻu ʻe he toketā matá kuo holoholo hifo e mālohi ʻo e pamu e totó he mata ʻo Keilá. Naʻá ne tohi mai ha ngaahi tuluʻi mata, peá ma foki leva.

Naʻe ʻikai hoko ha faʻahinga meʻa liliu moʻui ʻi he fofonga hoku uaifí, ka naʻá ma ako ke sio pē ki he leleí ʻaki ʻema tafoki ki he Fakalelei ʻa Sīsū Kalaisí. ʻOku tokoniʻi kitautolu ʻe he Fakamoʻuí ke tau fakatuʻamelie mo fiefia neongo e ngaahi faingataʻá. ʻOku tau ʻilo te Ne lava ʻo fakamoʻui kitautolu ʻi Hono taimi mo ʻEne founga pē ʻAʻana.

Naʻe ʻikai ngata ʻi he totongi pē ʻe Sīsū Kalaisi ʻetau ngaahi angahalá—ka naʻá Ne toe fuesia kotoa ʻetau “ngaahi mamahí mo e faingataʻaʻiá … koeʻuhí ke fonu hono lotó ʻi he ʻaloʻofa, ʻo fakatatau ki he kakanó, koeʻuhí ke ne ʻafioʻi ʻo fakatatau ki he kakanó ʻa e founga ke tokoniʻi ai ʻa hono kakaí ʻo fakatatau ki honau ngaahi vaivaí” (ʻAlamā 7:11–12).

Naʻá ma ongoʻi fiemālie koeʻuhí he naʻá ma ʻiloʻi naʻe mahino kia Sīsū Kalaisi ʻa ʻema mamahí. Koeʻuhí naʻá ma haʻi kimaua kiate Ia, naʻá ma maʻu ai ha “fiemālie ki [homa] laumālié” (vakai, Mātiu 11:28–30).

Naʻe akoʻi ʻe Palesiteni Kamila N. Sionisoni, ko e Palesiteni Lahi ʻo e Fineʻofá:

“ʻE lava ke fakamaʻamaʻa ʻe Sīsū Kalaisi ʻetau haʻamongá.

“ʻE lava ke fueisa ʻe Sīsū Kalaisi ʻetau ngaahi kavengá. …

“Ko Sīsū Kalaisi ʻa hotau fakafiemālié.”