“Ko e Ongoongo Fakafiefiá,” Liahona, Māʻasi 2026.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Ongoongo Fakafiefia
Koeʻuhí ko e Fakalelei taʻe-fakangatangata ʻa e Fakamoʻuí, ʻoku ou ʻilo te u toe mamata ki hoku kaungāmeʻá.
Tā fakatātaaʻi ʻe Brian Kranz
ʻI heʻema kaungāʻapí, naʻá ku fetaulaki ai mo Malisa ʻi heʻema kei īkí. Neongo naʻá ne kiʻi lahi ʻaki ʻiate au ha ngaahi taʻu siʻi, ka naʻá ma kaungāmeʻa lelei mo mātuʻaki vāofi.
ʻI hoku taʻu 19, pea tautautefito ki heʻeku fiemaʻu ha fakahinohinó, naʻá ne fakafeʻiloaki au ki he ongoongolelei ʻo Sīsū Kalaisi kuo fakafoki maí, ʻo fakafou ʻi he ongo faifekau taimi kakató. Naʻá ku ʻosi ʻilo ha kiʻi meʻa fekauʻaki mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻo fakafou ʻi he tokoua ʻeku tamaí mo ʻeku kuifefiné. Ko e ongo mēmipa paionia kinaua ʻo e Siasí ʻi hoku fāmilí.
Naʻá ku feohi mo Malisa ʻi he lolotonga ʻo ʻeku uluí, ʻo ne tokoni ke fakatupulaki ʻeku fakamoʻoni ki he Fakamoʻuí mo ʻEne ongoongoleleí, mo ne puke hoku nimá ʻi he taimi kotoa pē naʻá ku fiemaʻu ai iá.
Naʻá ku ako mei ai ʻa e fiefia ʻi hono moʻui ʻaki e ongoongoleleí ʻi he tuʻunga founga faingofua mo lotoʻaki. Naʻá ku tanganeʻia ʻi heʻene poto he feohí, anga ʻo ʻene fakatahaʻi e fāmilí mo e ngaahi kaungāmeʻá, mo ʻene vilitaki ke aʻusia e ngaahi taumuʻa fakatuʻsinó mo fakalaumālié. Naʻá ku ʻilo mei ai ko e taimi ʻoku tau fetaulaki ai mo e moʻoní, kuo pau ke tau fakaʻaongaʻi e meʻa ʻoku tau akó, tauhi e ngaahi fekaú mo fakaʻaongaʻi e ngaahi akonaki ʻo e ongoongoleleí ʻi heʻetau moʻuí mo hotau ngaahi fāmilí. Koeʻuhí ke tau kei faivelenga, kuo pau ke tau loto-toʻa ʻi heʻetau fakamoʻoní mo feinga ke piki maʻu ki heʻetau tuí, neongo ʻa e faingataʻá.
ʻI he 2010, naʻe siʻi mālōlō ai ʻa Malisa ʻi ha fepaki ʻi ha kā. Ko ha mōmēniti fakamamahi ia kiate au, ka ʻoku ou ʻiloʻi te u toe feʻiloaki mo ia, tuʻunga ʻi he palani ʻo e fakamoʻuí mo e Fakalelei ʻa Sīsū Kalaisí. ʻOku ou ʻiloʻi ʻokú ne hokohoko atu ʻi he feituʻu ʻokú ne ʻi ai he taimi ní ʻaki e loto-fiefia tatau mo e ivi naʻá ne fakafōtunga ia ʻi māmaní.
ʻOku ou ʻilo ko e “tuʻunga ʻahiʻahiʻanga” ko ʻení (ʻAlamā 12:24) ʻoku ʻikai ko e ngataʻangá ia. ʻOku ou ʻilo ʻoku tau toe feʻiloaki mo hotau fāmilí mo e kaungāmeʻá ʻi he tafaʻaki ʻe taha ʻo e veilí. Te tau mamata kiate kinautolu, fakafeʻiloaki kiate kinautolu, pea tau toe fakataha. Te tau foua ʻa e ngaahi ongo tatau ʻo e ʻofa ne tau maʻu ʻi heʻetau feʻofaʻaki ʻi he māmaní (vakai, Tokāteline mo e Ngaahi Fuakava 130:2). ʻOku ʻi ai ʻa e kau mēmipa ʻo hoku fāmilí. ʻOku ou ʻiloʻi ʻoku ʻi ai mo Malisa foki.
Naʻe talanoa fiefia ʻa Malisa mo e tokotaha kotoa kau ki he ongoongoleleí, ʻi heni ʻi māmani. ʻOku ou tui fakapapau ʻokú ne fakahoko ʻa e meʻa tatau ʻi he maama tataliʻanga ʻo e ngaahi laumālié (vakai, Tokāteline mo e Ngaahi Fuakava 138:57). ʻOkú ne akoʻi e Fakalelei taʻe-fakangatangata ʻa e Fakamoʻuí pea mo e ongoongo fakafiefia, ʻoku tuʻunga ʻiate Ia pea ʻoku fakafou ʻi he ngaahi ouau ʻo e temipalé, ʻa ʻetau lava ke foki kiate Ia mo e ʻao ʻo e Tamaí, ke nofo ko ha ngaahi fāmili ʻo taʻengatá.