Ua Faamanatu e le Au Paia o Aso e Gata Ai le 50 tausaga o le Ekalesia i Kiripati

O le tausaga e 2025 na faailoga ai le 50 tausaga o Le Ekalesia a Iesu Keriso o le Au Paia o Aso e Gata Ai i le atumotu o le Pasefika o Kiripati. Sa faamanatuina e tagata o le Ekalesia lenei mea na tupu faasolopito i le silia ma le 9 aso, e aofia ai se faamanatuga faaleaganuu ma se faigalotu i le atunuu atoa.

O le aso faamanatu i le faaiuga o le vaiaso na pa‘u‘u faatasi ma le faavaeina o le siteki lona fa i Kiripati (o se tuufaatasiga o faalapotopotoga o Au Paia o Aso e Gata Ai i se nofoaga faafanua).

Ua faatupula’ia vave le Ekalesia i Kiripati, i le tusa ma le 1 i le 5 o tagata e auai. E faitauafe tagata sa auai i le sauniga faamanatu sa faatulagaina e le Fitugafulu Eria Elder Iotua Tune ma isi tagata o le Ekalesia i le lotoifale.

O Elder Jeremy R. Jaggi o le Fitugafulu ma le Au Peresitene o le Eria a le Pasefika sa pulefaamalumalu i le konafesi ma sauniga faamanatu i le faaiuga o le vaiaso.

O le faamanatuga faaleaganuu sa faia i le Aso Toonai, 18 o Oketopa, i le Aoga Maualuga a Moronae, o se aoga a le Ekalesia. Sa auai ai i le sauniga faamanatu Lana Afioga ia Taneti Maamau, o le Peresitene o Kiripati ma le toatele o minisita mai le faigamalo a Kiripati. E tusa ma le 1,000 tagata sisiva mai Siteki o Betio, Sisifo ma Sasa’e ma o le Itu i Matu sa auai i fiafiaga faaleaganuu sa faatinoina ai ni faafiafiaga se 12, lea sa mauaina se faaviiviiga mai ia Peresitene Maamau.

I le Aso Sa, 19 o Oketopa, sa faatulaga ai le siteki lona fa—le Siteki o Tarawa Kiripati i Matu. O le siteki fou e aofia ai uarota e lima, e aofia ai ma ni uarota fou se lua faatoa faavaeina, ma paranesi e fa. O iunite fou e manaomia se auperesitene fou o le siteki ma epikopo fou e lima e valaauina.

A o faagasolo le konafesi, sa faapea mai Elder Tune, “O le a faamanuiaina nei i tatou e le Alii a o tatou galulue faatasi e fausia se nuu o Siona, e tasi le loto ma e tasi le mafaufau, e faasauni ai mo le malumalu.”

O le malumalu mo Tarawa, Kiripati, sa faasilasila i le 2021 ma o loo fausia i le taimi nei.

O le aso 19 foi o Oketopa, sa faia ai se faigalotu mo le atunuu atoa e faamanatu ai le 50 tausaga o le Ekalesia a Iesu Keriso. Sa usuina e le aufaipese a tamaiti le Ana Tataro te Tei (O se tatalo a se tamaitiiti). O isi pese sa usuina e le aufaipese a le autalavou mai le Aoga Maualuga a Moronae.

Sa saunoa Elder Tune e uiga i le tauamataga o le Ekalesia i Kiripati ma le auala na saunia ai e le Alii le autalavou e ala i aoaoga ma galuega faafaifeautalai e taitaia le Ekalesia iina.

“Sa matua toatele tagata na filifilia e le Tama Faalelagi e taitaia le Ekalesia i Kiripati,” o le saunoaga lea a Elder Tune. “E toatele o matou tagata sa o i Toga e saunia ai.”

O Siaosi (George) Moleni sa o se faifeautalai i le Aoga Maualuga a Moronae mai i le 1977–1979. Sa ia faimalaga mai Toga e talanoa e uiga i lana auaunaga faafaifeautalai ma le tele o lona fiafia e toe foi i Kiripati ma le vaaia o tagata o Kiripati o fiafia, alolofa i la latou ekalesia ma lo latou motu.

Sa saunoa ai foi ia Peresitene Maamanu i le faigalotu. O lana tautalaga sa atagia ai lona faafetai i le Ekalesia ma aoaoga ua saunia mo tagata aooga i le Aoga Maualuga i Moronae. Sa ia faamalo i le Ekalesia mo le atiinaa’eina o taitai o e auauna atu i le alalafaga, e aofia ai i le malo.

“O le a tuputupu a’e pea le Ekalesia i Kiripati ma o le a malolosi tagata ma fiafia,” sa ia saunnoa ai.

Sa faailoaina e Elder Jaggi le sootaga lelei i le va o le Ekalesia ma le faigamalo a Kiripati. Sa ia pa’ia le talafaasolopito o le Ekalesia i Kiripati, sa faaaloalogia ai paionia ma faasoa atu ata mai mea autu na tutupu o le talafaasolopito.

Sa ia saunoa i le autalavou, valaaulia i latou e auauna i ni misiona ma faaauau a latou aoaoga. Sa ia tuuina atu foi le valaaulia e “avea aso uma o se aso fiafia.” Sa ia faaiu i le valaaulia o tagata o le Ekalesia ma i latou uma sa auai e faamalolosia o latou faatuatua ia Iesu Keriso ma ia saunia mo le malumalu o le a oo mai.