I Lana Galuega

Ata na tusia e Briana Kranz

Afai o le aafiaga aupito sili ona tiga faaletagata o le onosaia lea o le maliu matautia ma le lei faamoemoeina o se tasi e pele ia te ia, ou te manatu o le aafiaga lona lua e sili ona faigata e ono tupu pe a tilotilo atu se tagata tali muamua i mata o se tina ma se tama ma ta’u atu ia i la’ua ua maliu le la tama.

I se tasi taeao sa auina atu au e faailoa atu i se aiga ua maliu le la tama teine laitiiti a o tietie atu i le fale mai le kolisi. Sa moe o ia i le foeuli ma maliu vave ai ina ua tifa ese lana taavale mai le auala ma lavea ai ma le matautia. O le Aso Sa o le Eseta.

Sa ou fefe i le tiga o le a ou faaoo atu i lenei aiga. I se isi itu e ese lava, sa toetoe lava a lagonaina e pei o le lofituina o le aiga i lenei tala fou, sa mafua ona o a’u.

Sa ou oomi le logo o le faitotoa, ma sa alu atu se tamaloa. Sa ma feva’aia’i i le faamalama o le faitotoa. Sa faamalo o ia, o loo faaali mai le tiga i ona foliga. Sa ia iloa o lo’u i ai iina na faamatalaina ai le toesea o lona afafine. Na faafuasei lava, ona ou maua se uunaiga faaleagaga:

“Iasoni, faagalo oe lava. O loo e i ai i la’u galuega ma ua i ai le aia tatau mo lo’u mana. Faaaoga loa. Talitonu i ai. O le a taialaina oe e le Agaga Paia e aumai le malamalama ma le faaiuga ia i latou o e feteenai pe fenumiai.”

Sa tatala e le tamaloa le faitotoa i se u’u malu. O le lototele faaleagaga na suia ai lo’u musuā a o ou faailoa atu a’u lava ma talosagaina ou te alu atu i totonu. E ui ina sa faamalosia e le Agaga, ae sa matua tiga lo’u loto mo ia. Sa ou manao e faasoa atu i lona faavauvau, faanoanoa faatasi ma ia, ma tagi faatasi ma ia (tagai i le Mosaea 18:8–9), o le lagonaina o le faia o lena mea e ono faaitiitia ai ona mafatiaga.

Sa ma savavali atu i se auala savali puupuu i totonu o se potu lea sa faapotopoto ai lona toalua ma le fanau. Sa faamalosia e le Agaga Paia, sa ou lagonaina le mautinoa ma le manino o le mafaufau. Sa ou taliina a latou fesili ona tuuina atu lea o la’u molimau ona o Iesu Keriso, o Lana taulaga ma le Toetu, o le a la toe vaai ai i le la tama teine.

E ala mai i lenei aafiaga, o lo’u faatuatua i le Alii na tupu a’e i le faatuatuaina. Sa ou faamoemoe foi ua i ai foi ia i latou.

Na aoao mai Elder Paul B. Pieper o le Fitugafulu, “O nisi taimi o le auala sili e aoao ai e faatuatuaina le Atua, o le faatuatuaina lea o Ia.”

O le faatuatuaina o le Alii ua fesoasoani ou te maua ai le malosi e fesoasoani ai i isi. Ua faamalosia ai foi la’u molimau ma alo ai le ala mo avanoa e le mafaitaulia e auauna atu ai i isi mo Ia.