Faauta, O A’u Lenei

Sa folafola atu e le Alii se fanau toatele ia Aperaamo ma Sarai. O lena faamanuiaga na alu se taimi o faatali e taunuu, po o le faapea, na taunuu i le taimi a le Alii. Peitai, sa tuu e le Alii le faatuatua o Aperaamo i le tofotofoga ina ua Ia talosagaina o ia e ositaulaga lona atalii, o Isaako, o le sa avea ma faamanuiaga sa la tatalo ai ma sa faatalitali mo se taimi umi lava. Atonu na tatou faitauina lenei tala faatusi paia i le tele o taimi, ae faafia ona tatou tuuina i tatou lava i seevae o Aperaamo?

E faigata ona vaai faalemafaufau i lagona alofa o se tamā a o lei faia sea tofiga. Ae ui i lea, o le naunautaiga o Aperaamo i le filifili e usitai e le muta lava le faaofoina o au a o ia sauni e alu i se mauga i Moria ma ofo atu le taulaga na talosagaina. I se faailoaga o le naunautai ma le gauai atu i le finagalo o le Tama Faalelagi, sa tumau ai pea lana tali, “Faauta, o a’u lenei.” (Tagai i le Kenese 22:1–2.)

O le taui mo lona usiusitai, sa faamanuiaina o ia i le faasaoina o le ola o Isaako, faapea foi ma faamanuiaga matagofie ma le le iu mo ia lava, mo Sara, ma mo a latou fanau (tagai i le Kenese 22:15–18).

O Le Gauai Atu o le Faaola

E aunoa ma se masalosalo, o le faataitaiga sili o le usiusitai ma le gauai atu i le Tama Faalelagi e totonugalemu i le Faaola, o Iesu Keriso. Sa Ia faaalia Lona naunau e usitai e ala i le sau i lenei lalolagi; e ala i le papatisoina, ia mama ma atoatoa; ma e ala i le tuuina atu o Lona soifua o se taulaga ma le tauaveina i Ona luga o tiga, puapuaga, vaivaiga, agasala, ma le maliu o Lona nuu, ina ia mafai ona Ia silafia e tusa ai ma la le tino (tagai i le Alema 7:11–13).

Sa matua malosi lava le aafiaga, mo sina taimi, na mafua ai ona Ia fesili atu pe i ai se auala e pasi ese atu ai lenei ipu oona. Ona ia fai mai lea i le taimi lava lena, “Ae ui i lea, aua le faia lo’u loto, a o lou finagalo” (Luka 22:42)—i se isi faaupuga, “Faauta, o a’u lenei”—ua faaalia ai Lona naunau e faia le finagalo o le Tama.

E mafai faapefea ona tatou atiina ae lena naunautaiga e ofoina atu se “Faauta, o a’u lenei” e tali atu ai i talosaga uma e faia e le Tama Faalelagi i ia i tatou o ni tagata o le Ekalesia, po o nisi taimi i se tulaga patino?

Sa aoao atu e Paulo i le au Roma, “O le alofa o le atoatoa lea o le tulafono” (Roma 13:10). Afai ou te manao e sue se upu uiga tutusa e suia ai le fasifuaitau “atoatoa o le tulafono,” Ou te manatu o le upu usiusitai e vave lava ona oo mai i lou mafaufau. O le mea lea, e mafai ona tatou faapea atu o le alofa o le usiusitai. Ma o lea la, o le fetalaiga a le Faaola “Afai tou te alolofa mai ia te au, ia outou tausi mai i au poloaiga” (Ioane 14:15) ua matua talafeagai lava.

Atonu tatou te tali atu i se “Faauta, o a’u lenei” po o, i upu a Nifae, “O le a ou alu ma fai” (1 Nifae 3:7). I la tatou gagana i ona po nei, atonu tatou te faapea atu, “Ioe ou te naunau e fai le mea ua poloai mai ai le Tama Faalelagi, e tusa lava po o a tulaga.”

Ae, o le mea ou te fia faamamafa atu, o le sootaga o le alofa-usiusitai, o lona uiga tatou te usiusitai i le Tama ona tatou te alolofa ia te Ia. Ou te talitonu o le filifili e usitai o se tasi lea o auala sili e tautino manino atu ai lo tatou alolofa mo Ia. “O le faatuatua ua mate pe a leai ni galuega” (Iakopo 2:26), ma ia te au lava ia ou te manatu e le ola foi lou alofa mo le Tama Faalelagi ma Iesu Keriso pe a leai le usiusitai.

E faapefea ona tatou faateleina lo tatou alolofa mo Ia ma lo tatou usiusitai ia te Ia? Na fetalai mai le Faaola, “O le ola e faavavau foi lenei, ia latou iloa oe le Atua moni e toatasi, atoa ma Le ua E auina mai, o Iesu Keriso lea” (Ioane 17:3 O le iloaina o Iesu Keriso—ma, e ala ia te Ia, le Tama—ua mafai ai ona tatou iloa le alofa o loo ia i Laua mo i tatou ma mea e le mafaamatalaina na La faia ae o le a faia mo i tatou, e aofia ai taimi faigata tatou te oo i ai i lenei olaga faaletino. O le iloaina o i La’ua e suia ai o tatou loto, ma tatou mananao ai e mulimuli i a La’ua faataitaiga i a tatou amioga ma ia naunau e fai atu, i upu ma galuega, “Faauta, o a’u lenei.” O lenei naunautaiga e atagia mai i se manao e faitau tusitusiga paia po o le talanoa atu i le Tama Faalelagi i le tatalo.

“Faauta, o a’u lenei” e mafai ona avea o se tali i se valaauga e auauna atu i se misiona pe faapaiaina atili i le usiusitai i poloaiga e pei o le tausia o le Paia o le Sapati, ava i o tatou matua, po o le saili e ola i se olaga mama. “Faauta, o a’u lenei” o le faaupuga lea e o mai faatasi pea ma soo o Keriso, e tusa lava pe aafia i le taulaga na talosagaina mea ua sili ona tatou mananao i ai pe ua tatou totogia ai se tau maualuga.

O lenei naunautaiga e usitai e taua tele, aemaise lava i feagaiga na tatou osia ina ua tatou papatiso pe ulu atu i le malumalu. E mafai ona e vaai faalemafaufau pe faape’ῑ o tatou olaga pe afai tatou te mafaufau pea i ai, “Faauta, o a’u lenei” pe a ave i o tatou luga le suafa o Keriso pe ina ia manatua pea o Ia ma tausi Ana poloaiga? O le aai ma feinu i le faamanatuga e valaaulia ai i tatou e faafou lena tautinoga, lea e tatau ona atagia mai i a tatou faatinoga i le aluga o le vaiaso. E faatatau foi lena mea pe a tatou o atu i le malumalu pe a tatou osia pe manatua feagaiga tatou te osia iina.

Ou te manatua se ma talanoaga ma se ulugalii faatoa faaipoipo i le tele o tausaga ua mavae a o auauna atu o se epikopo. I se tasi po, sa faia ai se la talanoaga umi ma vevela e faatatau i le totogiina o le sefuluai. Sa feagai le tane talavou ma se vaiaso faigata i le galuega ma sa manao e sefe le tupe sa ia maua mo nisi o a latou tupe faaalu patino. Ae peitai, ou te manatua upu a le ava talavou i le taimi, i luma o lana tane, sa ia fai mai ai, “Epikopo, ua ou naunau e aua nei faia na tupe faaalu ma e oo lava i le taofia o le ‘ai, pe a tatau ai, ae ou te manao e totogi le sefuluai ma usitai i le Alii.”

O lea la, o le mautinoa o le “Faauta, o a’u lenei,” na faailoa mai ma se molimau maoae faapea e le ava talavou, ma sa ma lagonaina ma le tane se agaga malosi i le taimi o le talanoaga. I le faaiuga, ou te le iloa pe ona o lona lava manao pe ona sa faatauanauina o ia e lona toalua, ae na iu ina totogi e le tane lana sefuluai i lena faaiuga o le vaiaso.

O le Aso Sa na sosoo ai, a o lei faia sauniga, sa talosaga mai ai le tane talavou mo se upu faatopetope ma a’u. Faatasi ai ma se foliga na ese mai le vaiaso na muamua atu, sa ia fai mai ai ia te au, “Epikopo, e te iloa o le vaiaso ua te’a na iu ai ina ou totogiina la’u sefuluai, ma sa ou fefe nei le lava ni au tupe mo meaai, ae sa na ona ou manao lava ia e iloa o lenei vaiaso e faaluaina le aofai o le tupe mo meaai e masani ona matou maua. Epikopo, o se vavega, ma ou te fia vaai pea lava i na vavega i lo’u olaga.” Ia te au, sa pei o loo ta’u mai e lena alii talavou ia te au, “Epikopo, ua ou naunau e tali atu ma se ‘Faauta, o a’u lenei’ i soo se mea e finagalo mai ai le Atua ia te a’u.”

Ua fetalai mai le Alii e noatia o Ia pe a tatou faia mea ua Ia fai mai ai (tagai Mataupu Faavae ma Feagaiga 82:10). Pe tatou te talitonu moni ea i le sa’olele o lena folafolaga?

Atonu e le oo mai faamanuiaga i o tatou taimi po o le ala tatou te mananao ai, ae ou te molimau atu ia te outou e moni ma moni le folafolaga. E manaomia ai le alofa mo Ia, gauai atu, o se manao e faia Lona finagalo, ma le ola ai o ni soo o Keriso. O le a Ia fesoasoani ia i tatou ma faamanuia i tatou ia malamalama ma tausia a tatou feagaiga. O lena auala, pe a Ia fetalai mai ia i tatou e faia Lona finagalo, tau ina ia tatou tali atu ma le mautinoa “Faauta, o a’u lenei, le Alii!”