Iosefa le Arimataia: Manaoga Amiotonu ma Vavega a le Atua

Saunia e Kimmy Badal

Mekasini a le Ekalesia

O ai Iosefa le Arimataia, ma o le a se mea e mafai ona tatou aoao mai lana matafaioi i le tala o le Eseta?

Sa i ai se vaega taua o Iosefa le Arimataia i le faamatalaga o le Eseta, na fesoasoani i le Alii a o Ia ausia le manumalo silisili i le talafaasolopito o tagata. Ina ua faasatauroina Iesu Keriso, “ua faamalosi [Iosefa] ona alu atu ia Pilato, ma faanoi atu ai i le tino o Iesu” (Mareko 15:43). Ina ua lafoai e le toatele o isi le Alii i Lona taimi o le faanoanoa, o le a le mea na taitai atu ai Iosefa e nofo ma faia se tulaga sili ona taua o le taulaga a le Faaola?

O lona faamaoni atonu e foliga mai e feteenai ma lona tulaga o se fesoasoani mauoa i le au Saneterini, o le faapotopotoga o tagata Iutaia na aofia ai le au Faresaio ma le au Satukaio lea na tausalaina Keriso i le oti (tagai Mataio 27:1, 57). Ma le isi, sa tausia faalilolilo e Iosefa lona avea ma soo o Keriso “ona o le fefe ia Iutaia” (Ioane 19:38).

Ae, i le iuga, sa susulu atu lava lona tuuto. Sa “lei faaopoopo o ia i la latou pule ma le latou mea na fai” o e na sailia le soifua o le Faaola (tagai i le Luka 23:50–51). Ma ina ua maliu o le Faaola, sa aui e Iosefa le tino o le Matai i le ie lino ma tuu i lona lava tuugamau fou (tagai Mataio 27:59–60; Luka 23:52–53). O le faataunuuga lea o le valoaga e faapea, o le tuugamau o Keriso o le a i ai faatasi ma e mauoa (tagai i le Isaia 53:9).

Ua Toetu o Ia

I le tuuina atu o lona tuugamau mo le falelauasiga o le Faaola, sa fesoasoani ai Iosefa le Arimataia e faataunuu le valoaga ma saunia ai se ala mo le molimau faavavega o le Toetu o Iesu Keriso. I le aso lona tolu ina ua mavae le Faasatauroga, na maua ai e soo o Keriso le tuugamau ua avanoa, ma sa tautino mai e le siufofoga o se agelu, “E le o iinei o ia: aua ua toetu mai o ia” (Mataio 28:6).

“O le Toetu o Iesu Keriso ua molimau mai i Lona paia ma ua Ia manumalo i mea uma,” na aoao mai ai Elder D. Todd Christofferson o le Korama a Aposetolo e Toasefululua. “O Lona Toetu ua molimauina ai faapea, ua noatia ia te Ia i le feagaiga, e mafai ai foi e i tatou ona faatoilaloina mea uma ma ia tasi ai. O Lona Toetu ua molimauina ai e ala mai ia te Ia, o le tino ola pea ma le ola e faavavau o ni mea moni.”

Atonu e lei iloa e Iosefa le mea na ia tuuina atu i lena uluai Eseta e sili atu nai lo lona manao e faaaloalo ia Iesu Keriso. Ae sa faaaoga e le Alii manaoga amiotonu o Iosefa o se vaega o Lana vavega tupito e avea ma “faapolopolo o e ua momoe” (1 Korinito 15:20), o lē na muamua toetu mai i e ua oti.

E pei lava ona i ai ia Iosefa se matafaioi taua e faatino, e mafai foi e i tatou taitoatasi ona avea ma se meafaigaluega i aao o le Tama Faalelagi. O Lana fuafuaga e mo tagata uma, ma o le a Ia utuvai mai i o tatou tomai, aafiaga, ma tulaga e faalautele ai Lana galuega tele. O lenei Eseta, e mafai ona tatou manatuaina lenei savali ma saili iesu Keriso, ositaulagaina mea tatou te mafaia e fesoasoani ai e fausia Lona malo ma tuu atu i Ana vavega ia faataunuuina i o tatou olaga.