O Le Talafou Fiafia

Ata na tusia e Briana Kranz

I le avea ai ma tuaoi, sa ma feiloai ai ma Maritza a o ma laiti. E ui ina sa na o ni nai tausaga e matua ai, ae sa avea i maua ma se uo maoae ma sa matua vavalalata lava.

Ina ua 19 ou tausaga ae maise lava i le manaomia o le taitaiga, sa ia faailoa mai ia te au le talalelei toefuataiina a Iesu Keriso e ala i faifeautalai faamisiona. Ua uma ona ou iloa sina mea itiiti e uiga i Le Ekalesia a Iesu Keriso o le Au Paia o Aso e Gata Ai i le uso o lo’u tama ma lo’u tinamatua. O i la’ua o uluai tagata o le Ekalesia i lo’u aiga.

Sa ma faatasi ma Maritza i lo’u liuaga atoa, ma fesoasoani ia te au e atiina ae la’u molimau i le Faaola ma Lana talalelei, ma uu mai lo’u lima i taimi taitasi ou te manaomia ai o ia.

Sa ou aoao mai ia te ia le olioli i le ola ai i le talalelei ma le faigofie ma le naunautai. Sa ou faamemelo i lona atamai, auala e tuufaatasia ai aiga ma uo, ma le faapalepale i le ausiaina o sini faaletino ma faaleagaga. Sa ou aoao mai ia te ia a tatou fetaiai ma le upumoni, e tatau ona tatou faatinoina mea ua tatou aoaoina, tausia poloaiga ma faaaoga aoaoga o le talalelei i o tatou olaga ma aiga. Ina ia tumau i le faamaoni, e tatau ona tatou lototetele i a tatou molimau ma taumafai e pipiimau i lo tatou faatuatua, e ui lava i faigata.

I le 2010, na maliu ai Maritza i se faalavelave tau taavale. O se taimi faanoanoa mo au, ae ou te iloa e ala i le fuafuaga o le faaolataga ma le Togiola a Iesu Keriso, o le a ou toe vaai ai ia te ia. Ou te iloa o loo faaauau pea o ia i le mea o loo i ai nei o ia i le uiga fiafia lava lea e tasi ma le finau lea na iloga ai o ia iinei i le lalolagi.

Ou te iloa o lenei “tulaga e nofovaavaaia ai” (Alema 12:24) e le na o le pau lea o le mea o loo i ai. Ou te iloa tatou te toe vaai i o tatou aiga ma uo i le isi itu o le veli. O le a tatou vaai ia i latou, faafeiloai i latou, ma toe faatasia. O le a tatou oo foi i lagona lava e tasi o le alofa na tatou maua mo le tasi ma le isi i le lalolagi (tagai i le Mataupu Faavae ma Feagaiga 130:2). O loo i ai tagata o lo’u aiga iina. Ou te iloa o loo i ai foi Maritza iina.

Sa talanoa ma le fiafia Maritza ma tagata uma e uiga i le talalelei iinei i le lalolagi. Ou te mautinoa o loo ia faia lea lava mea e tasi i le lalolagi o agaga (tagai i le Mataupu Faavae ma Feagaiga 138:57). O loo ia aoao atu e uiga i le Togiola e le iu a le Faaola ma le tala fiafia ona o Ia ma e ala i sauniga o le malumalu, e mafai ai ona tatou toe foi atu i Lona afioaga ma le afioaga o le Tama e nonofo ai o ni aiga mo le faavavau.