Mata e Vaai ai i le Lelei

Ata na tusia e Briana Kranz

Ia Ianuari 2025, na amata ai ona tauivi lo’u toalua, o Kayla ma lana vaai. Sa ia maua soo i le tiga o le ulu ma le tiga i lona mata tauagavale. Sa le lelei lana vaai, ma sa amata ona ma popole.

Ina ua ma o i se fomai mata, sa ia iloa ai o lona mata tauagavale sa i ai se uunaiga maualuga. Sa ia faasino i ma’ua i se isi fomai mata e siaki ai mo le mai mata e tauaso ai. Sa maualuga le lamatia o le vaai a Kayla. Sa ma’ua valaau atu i ni fomai, ae o le tele o ofisa sa tapunia pea mo aso malolo. Na o le pau le mea na mafai ona ma faia o le faatali.

Sa loloto le fetaomi mai o le popole i o ma mafaufau. Sa ma liliu atu i le Tama Faalelagi i le tatalo mo se fesoasoani, ma aioi atu ia faia mea uma e tusa ai ma Lana fuafuaga. Sa ma moomoo mo se lagolagosua, ma sa ma lagonaina Lona alofa. Sa ma iloa o le a lelei mea uma.

Na iu lava, ina ma maua se taimi faatulagaina i le na o le fa aso ma se tagata faapitoa e masani lava ona i ai se lisi faatalitali mo ni nai masina le umi. Na iloa e le fomai mata ua alu i lalo le afaina o mata o Kayla. Sa ia faatonuina ni vaituluimata, ma sa ma o loa i le fale.

E leai se mea na suia ai le olaga na tupu i mata o lo’u toalua, ae sa ma aoao e vaai i le lelei e ala i le liliu atu i le Togiola a Iesu Keriso. E fesoasoani le Faaola ia i ma’ua ia lelei ma fiafia e ui lava i tofotofoga. Ua ma’ua iloa e mafai ona Ia faamaloloina i ma’ua i Lana lava taimi ma i Lana lava ala.

E le’i na ona totogiina e Iesu Keriso mo a tatou agasala - sa Ia puapuagatia foi i o tatou tiga ma puapuaga … o ituaiga eseese uma; … ina ia mafai ona faatumulia Ona lagona i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ai ma o latou vaivaiga” (Alema 7:11–12).

Sa ma lagona le mafanafana aua sa ma iloa sa malamalama Iesu Keriso i o ma’ua faanoanoaga. Ona sa ma avatu i ma’ua lava ia te Ia, o lea na ma maua ai le “malologa mo [o ma’ua] agaga” (tagai i le Mataio 11:28–30).

Na aoao mai ia Peresitene Camille N. Johnson, Peresitene Aoao a le Aualofa:

“E mafai e Iesu Keriso ona faamāmā la tatou avega.

“E mafai e Iesu Keriso ona si’i i luga a tatou avega. …

O Iesu Keriso o lo tatou mapusaga.”