Faamanuiaina o Aiga Uma o le Lalolagi

Sa maua e Elder Bruce C. Hafen, o se tasi o Fitugafulu ua faamalolo faamamaluina, se valaau mai le faatonu o se mekasini o talafou a le atunuu. Sa manao le faatonu e talanoa e uiga i se tusi talu ai nei lea na sailiili ai le talafaasolopito o talitonuga e uiga i le lagi i le salafa o lotu eseese.

“Na iloa e tusitala ua lagona e tagata lautele le faateleina o le fiaai mo le lagi—ma aiga i le lagi,” na tusia ai e Elder Hafen. Ae e ui o le toatele o tagata sa talitonu pea i le olaga pe a mavae le oti, alofa e faavavau, ma faatasiga faaleaiga faalelagi, “o le tele o lotu Kerisiano e ofoina atu sina tali itiiti i lenei matelaina i totonu”—faatasi ai ma se tuusaunoaga e tasi: O Le Ekalesia a Iesu Keriso o le Au Paia o Aso e Gata Ai.

I le Ekalesia toefuataiina a le Faaola, ua ia i tatou malumalu paia. Ua ia i tatou le faaipoipoga e faavavau, faatasi ai ma le pule o faamauga lea e faamanuiaina ai i talaatu o le oti faaletino. Ua ia i tatou le folafolaga o se lumanai e faavavau faatasi ma e pele i le afioaga o le Tama ma le Alo. I le tuuina mai o nei mea uma, na faaiuina ai e tusitala o le manatu faavae o le Au Paia o Aso e Gata Ai o le lagi e sili ona atoatoa—ma, o le a ou faaopoopo atu, e sili ona fiafia.

“E maeu lea mea na Maua!” Sa matauina e Elder Hafen. “O le toatele o tagata i aso nei e moomoo mo aiga e faavavau, ma o le [talalelei toefuataiina a Iesu Keriso] e faataunuuina lena faananauga e sili atu nai lo se isi lava seti o manatu [po o talitonuga faalelotu]. Maimau pe ana mafai ona lagona e le lalolagi atoa [a tatou] fanau o usuina le tala fiafia: ‘E mafai ona faatasia aiga e faavavau.’”

O aiga e le na o se faatulagaga faaagafesootai talafeagai. O mamanu ia e faavavau o le lagi. O le aiga o le totonugalemu lea o le fuafuaga a le Foafoa mo le taunuuga e faavavau o Lana fanau. E pei ona aoaoina i tatou e Peresitene Russell M. Nelson: “[O le Alii] na foafoaina le lalolagi [ina ia] mafai ai ona tatou maua ni tino faaletino ma fausia ni aiga. Sa Ia faatuina Lana Ekalesia e faaeaina ai aiga. Na te saunia malumalu ina ia mafai ona faatasia aiga e faavavau.”

Ae o lo tatou naunau i aiga malolosi e le na o taunuuga e faavavau e faatatau i ai. E i ai foi se matafaioi taua a le aiga i lo tatou fiafia i le olaga nei. O lo tatou Tama Faalelagi, o le e silafia lelei le mea e aumaia le fiafia i le taimi nei ma le faavavau, e auina mai Ana fanau i aiga—e le atoatoa e pei ona i ai—ma valaaulia i tatou e fausia ma faafailele ni aiga malolosi. E moni, “o manaoga faapitoa, oti, po o nisi mea e tula’i mai, e alagatatau ai ona fetuutuunai tagata taitoatasi.” Ae e leai se mea e mafai ona suitulaga i tiutetauave taua, ua atofaina mai le lagi o le tane ma le ava, tama ma le tina.

O loo faaauau pea ona faaalia i sailiiliga e uiga i “aiga moni, fusia faatasi, ma matua e toalua” ma faaauau ona faaalia e taua le aiga i le faasaoina o “noataga loloto o le alofa ma le alofa.” O “le masini autu mo tagata e mausali, fetuunai lelei, ma malamalama i agafesootai.”

Ioe, e le tatau ona faateia i tatou faapea o se mea e sili ona taua i le fuafuaga a le Atua o le a feagai ma mea faafeagai. E lei avea lava Satani ma se uo faaleaiga, ma o ana taumafaiga ua na o le faateleina o le faanatinati “aua ua na iloa ua saasaa ona po” (Faaaliga 12:12). E pei ona saunoa mai Peresitene M. Russell Ballard (1928–2023), Sui Peresitene o le Korama a Aposetolo e Toasefululua, “Ua iloa e Satani o le auala sili ona mautinoa ma aoga e faalavelave ai i le galuega a le Alii o le faaitiitia lea o le aoga o le aiga ma le paia o le aiga.”

O le iloaina o mea ua tatou iloa e uiga i le aiga e faavavau o le Atua, o Lana fuafuaga mo Lana fanau, ma le taua e faavavau o sootaga faaleaiga, e tatau ona tatou i ai faatasi ma tagata sili ona maelega i le puipuia o le aiga i le lalolagi.

E faapefea ona tatou faia?

Na tuuina mai e Peresitene Dallin H. Oaks, Fesoasoani Muamua i le Au Peresitene Sili le fautuaga lenei: “O le folafolaga i le aiga … o le toe faamamafa mai e le Alii o upumoni o le talalelei tatou te manaomia e lagolagoina ai i tatou e ala i luitau o i ai nei i le aiga.”

I o tatou olaga patino, e mafai ona tatou faia “mea laiti ma faatauvaa” (Alema 37:6) lea e faamalosia ai sootaga faaleaiga. E aofia ai le mulimuli i mataupu faavae o aiga ma faaipoipoga faamanuiaina o loo otooto atu i le folafolaga i le aiga: “faatuatua, tatalo, salamo, faamagaloga, faaaloalo, alofa, agaalofa, galuega, ma gaoioiga faafiafia tuufaatasi.” E tusa lava po o a o tatou tulaga faaleaiga o i ai nei, e mafai ona tatou faaali atu e ala i a tatou faatinoga o sootaga faaleaiga e taua e faavavau ia i tatou.

I le avea ai ma “tagatanuu faatuatuaina” i o tatou nuu, e mafai ona tatou “faalauiloa atu na fuafaatatau ua fuafuaina e faatumauina ma faamalosia ai le aiga.”

O i tatou o tagata o le feagaiga a le Alii i aso e gata ai. O i tatou o tagata e mauaina folafolaga na faia ia Aperaamo, Isaako, ma Iakopo—ua folafola mai e i ai mea uma e faatatau i aiga. O na folafolaga e o mai faatasi ma le valaau paia e faamanuia “aiga uma o le lalolagi.” Ma o se tasi o auala taua tatou te faia ai lena mea o le ola ai, puipuia, ma le faasoaina atu o le upumoni e faavavau e faapea “o le aiga ua faauuina e le Atua” ma o “sauniga ma feagaiga e maua i malumalu paia ua mafai ai e tagata taitoatasi ona toe foi atu i le afioaga o le Atua ma toe faatasia ai aiga e faavavau.”

Pe a ma vaavaai atu ma Sister Uchtdorf i tagata o lo matou aiga o osia feagaiga paia ma lo tatou Tama Faalelagi alofa, e faavavau, e faatumulia o ma’ua loto i le olioli ma le lotofaafetai. Ma te olioli e le gata i a ma’ua fanau ma a latou fanau ae faapea foi i o ma’ua matua ma o latou matua. Ma te mafaufau loloto ma le alofa loloto i le auala e tuufaatasia ai i matou e feagaiga o le talalelei i augatupulaga uma. O se aafiaga e pei o le vaaia “o se apefai ua faatuina i le fogaeleele, … o le tumutumu [o le aapa atu] i le lagi: faauta foi o agelu a le Atua ua a’ea’e ma ifoifo ai” (Kenese 28:12).

O faamanuiaga na folafola mai e le Alii ia Iakopo i lana miti ua tuuina atu i Ana fanau uma o le feagaiga—e aofia ai oe ma a’u. E pei ona faia e le Alii mo Iakopo, o le a Ia tali mai ia i tatou “i le aso na [tatou] puapuaga ai” (Kenese 35:3) pe afai tatou te filifilia o Ia.

“Faauta foi,” na fetalai mai ai le Alii, “Ou te i ai i a te oe, ou te tausi foi ia te oe i mea uma e te alu i ai, … aua ou te le tuua oe” (Kenese 28:15).

E pei o Iakopo, ua tofu uma i tatou ma se vao e sopoia. O nisi taimi o faamanuiaga folafolaina e foliga mai e mamao ese lava. Pe a oo mai ni faafitauli ogaoga po o ni luitau, atonu tatou te fesiligia le alofa o le Alii. Atonu foi tatou te lagonaina ua tuulafoaiina i tatou e le Atua. E ui i a tatou taumafaiga sili i le avea ai ma soo, atonu tatou te lagonaina tatou te le o mauaina faamanuiaga sa tatou faamoemoe i ai.

Uso e ma tuafafine, uo pele, o le ala o feagaiga o se ala fiafia, e ui e i ai taimi e ono pisipisia ai i loimata. Afai e te lagona o vaega o le fuafuaga o le fiafia e le faataunuuina i lou olaga i le taimi nei, faamolemole ia talitonu e manatu mai le Alii ia te oe ma o le a faamanuiaina oe i Lona taimi e tatau ai, e tusa ai ma Lona poto.

O le faatuatua ia Iesu Keriso ma Ana folafolaga e musuia ai i tatou e tulimatai atu i luma, ae le o le solomuli. Ona o Ia, e le manaomia ai ona taofia faatagataotaua lo tatou lumanai i soo se mea na tupu i le taimi ua tuanai pe o loo polokaina la tatou vaaiga i le taimi nei. Ioe, o i tatou uma lava, pe o le a faamanualia i se auala se tasi po o se isi. Ae tatou te talitonu i le Faamalolo Sili. Tatou te faalagolago ia te Ia—o le mea moni, tatou te taliaina Ana folafolaga, “faatauanauina atoatoa e i latou,” e tusa lava pe “mamao” i latou (Eperu 11:13).

“Ia manatua e i tatou uma, i le ala ma le taimi a le Alii lava ia, e leai se faamanuiaga o le a taofia mai Lana Au Paia faamaoni.” na saunoa ai Peresitene Nelson. O le a faamasinoina ma tauia e le Alii tagata taitasi e tusa ai ma le naunauga o le loto faapea foi ma galuega.”

Ou te folafola atu a tatou mulimuli ma faasoa atu le fuafuaga a lo tatou Tama Faalelagi mo aiga, o le a faatasi o Ia ma i tatou, lagolagoina i tatou, ma auai faatasi ma i tatou i la tatou malaga. O le a Ia le tuua lava na o i tatou, aemaise lava pe a oo mai tofotofoga ia i tatou po o ē pele ia i tatou. O le a Ia tauaveina i tatou, sii ae i tatou i luga, ma aumaia i tatou i le nuu folafolaina o se atoatoaga o le olioli faatasi ma Ia, faatasi ai ma Lona Alo, o Iesu Keriso, ma faatasi ma o tatou aiga—e faavavau.