Tausimea Amiotonu—Soo o Iesu Keriso

Mataio 25 o loo i ai ni faataoto se tolu o loo faamatala ai. Muamua, o le faataoto i taupou e toasefulu (tagai fuaiupu 1–13). E toalima sa popoto ma e toalima sa faavalevalea. O le toasefulu uma sa i ai i le nofoaga sa’o, o loo faatalitali mai mo le faatoafaiava, ma sa o mai uma i latou ma se lamepa.

Ina ua sau le faatoafaiava—faatusa i le Faaola—i le vaeluapo i se taimi sa le’i mafaufauina, o le toalima o taupou sa le’i lava suauu mo a latou lamepa. Atonu sa latou manatu e le i manaomia tele le iai o se suauu faaopoopo. Pe sa le o i latou foi o ni tausimea faautauta o a latou suauu sa i ai. Atonu foi sa faalavelavea, na lē lava ai ona latou tapena e faamumu pea a latou lamepa.

Ma o lea, i le tali atu i la latou talosaga e ulu atu i le tausamaaga o le faaipoipoga, sa tali atu le faatoafaiava, “Tou te le iloa a’u” (Joseph Smith Translation, Matthew 25:11 [i le Mataio 25:12, vaefaamatalaga a]). Ua ta’u mai ai faapea, ona o a latou tapenaga ma le tausimea poto, na iloae taupou popoto e toalima o Ia.

O le suauu taua e mafai ona vaaia o lo latou liua patino. Na mafai ai e taupou popoto ona faamumu a latou lamepa, ma ulufale atu ai i le tausamaaga o le faaipoipoga faatasi ma le faatoafaiava. Sa le mafai ona fefaasoaai le suauu ma a latou uo, ona o le liua o le tagata lava ia e faapena—e patino. E mafai ma e tatau ona tatou tuuina i luga le malamalama o a tatou lamepa e siitia ma faamalolosia ai isi, ae o i tatou taitoatasi o se tausimea o lo tatou lava liua.

E pei ona fetalaia mai e le Faaola, “Ia faamaoni, ma tatalo i taimi uma, ma teuteu ma faamumu a oulua lamepa, ma ia i ai le suauu ia te oulua, ina ia mafai ona oulua saunia i le afio mai o le Faatoafaiavā” (Mataupu Faavae ma Feagaiga 33;17; faaopoopo le faamamafa).

O le faataoto lona lua o loo faamatalaina i le Mataio 25 o taleni ia (tagai fuaiupu 14–30). I lena tala, i le faamoemoe o le matai, e malaga mamao, na ia avatu ai i ana auauna e toatolu ni taleni. O se “taleni” e faatusa i tupe. E mafai foi ona tatou mafaufau i ai o ni meaalofa, tomai, ma faamanuiaga mai lo tatou Tama Faalelagi. Na avatu e le matai i le tasi auauna o taleni e lima, i le tasi o taleni e lua, ma le isi e tasi. Ona alu malaga ai lea o le matai.

Ina ua toefoi mai o ia, sa ia iloa ai o auauna na ia tuu atu i ai taleni e lima ma le lua, sa avea i la’ua o ni tausimea faamaoni ma le faamanuiaina ma sa faaaogaina lelei ia taleni, na faaluaina o latou aoga. Ma ona o le faamaoni ai i nai mea iti, na tuu atu ai e le Matai ia i la’ua isi taleni faaopoopo ma fai atu, “Ua lelei ia, le auauna lelei e, ma le faamaoni: ua e faamaoni i nai mea itiiti, ou te tofia oe e pule i mea e tele: ina ulufale mai ia i le fiafia o lou Alii.” (fuaiupu 21).

I se faatusatusaga, sa tanumia e le auauna sa i ai le taleni e tasi—atonu ona sa faalavelaveina ma faatuai o ia. Pe atonu na faaletonu ua le iloa pe faapefea ona amata pe na fefe foi nei lē manuia. Atonu foi na ia faatusatusaina o ia lava i isi auauna, ma o lona le mautonu na taofia ai o ia mai le taumafai. Sa lei saunia o ia mo le toefoi mai o le matai, na te le’i oo i le olioli o le tausimea faamaoni, ma na te le’i toe maua ai lana taleni.

O le faataoto i taupou e toasefulu ma le faataoto i taleni e tutusa lelei lava. E taufai faamamafa mai ai o loo i ai so tatou tiutetauave patino mo lo tatou lava liua ma e tatau ona saunia i tatou lava e maua le meaalofa a le Alii o le faaeaga—ma o loo i ai tatou le tausimea ma le tali atu faaletagata lava ia mo taleni ma meaalofa ua tuuina mai ai i tatou.

Mulimuli ane, o loo faamatala mai i le Mataio 25 le tala ia i latou o e “talitonu i luma o le Atua,” o loo faamatalaina o mamoe a le Leoleo Mamoe Lelei, o loo maua i Lona itu taumatau, fiafia i le tausamaaga o le faaipoipoga faatasi ma Ia, ma faamanuiaina e avea ma pule i le tele o mea (tagai i fuaiupu 31–40). O le a fetalai atu le Alii ia i latou:

“Aua na ou fia ai, ona outou avane ai lea ni mea ou te ‘ai ai, na ou fia inu, ona outou avane ai lea ni vai ou te inu ai; sa fai a’u ma tagata ese, ona outou talia lea o a’u:

“Na ou le lavalalva, ona outou faaofuina lea o au: na ou ma’i ona outou asiasia mai lea o au: na ou i le falepuipui ona outou o ane ai lea ia te au.

I le avea ai ma Ona soo, tatou te saunia i tatou lava mo Lona Afio Mai Faalua ma tatou te faaalia ai ma le faamaoni ma faamanuiaina lo tatou tausimea i mea ua faamanuiaina ai i tatou. O le tausimea agaalofa, alofa mama, amio mama, ma le faatuatua tatou te agavaa ai e ola faatasi ma Ia ma maua le talitonu mautinoa i luma o le Atua i le taimi nei lava E pei ona aoao mai Mamona, o i latou e tumu i le alofa mama—le alofa le pona lea o Keriso—”o le a lelei ia te ia [latou]” i le aso gataaga. O le a latou faapei o Ia, ona o le a tatou vaai ia te Ia e pei ona i ai o Ia, tau ina ia tatou maua lenei faamoemoe, tau ina ia mafai ona faamamaina i tatou e pei lava ona mama o Ia. Tagai i le Moronae 7:47–48 Na tautino mai e Peresitene Nelson, “O le alofa mama ma le amio mama e tatala ai le ala e maua ai le talitonu mautinoa i luma o le Atua.”

Leoleo Mamoe—Eseesega IV, saunia e Jorge Cocco

O nei faataoto uma e tolu ua aoao mai ai le tausimea o lo tatou lava liua; mo meaalofa, taleni, ma aseta ua faamanuiaina ai i tatou; ma mo o tatou tuaoi o e ua fia aai, ua leai ni fale, faatiga, ma ua lelavava.

Latou te aoao mai le ala e tatau ona saunia ai soo o Keriso mo taimi faigata o le a muamua mai i le Afio Mai Faalua o le Faaola. O taimi nei o loo tatou ola ai! E tatau ona tatou faatumauina le mumu susulu o lamepa o lo tatou liua, ia faasusulu atu lo tatou malamalama, faaaoga ma faalauteleina a tatou taleni, ma tausia i latou e le tagolima. O le i ai lea o le alofa mama, le alofa le pona o Keriso.