Tausimea Amiotonu—Soo o Iesu Keriso

Uo pele i le lalolagi atoa, talofa! Ua faagaeetia lava au i lenei avanoa tatou te mafuta ai—e momoli atu ai lo’u alofa mo outou ma o’u faanaunauga mo outou. O le mea e sili ona taua, ou te faamoemoe o le a i ai sou aafiaga i lenei afiafi—se aafiaga e te lagonaina ai le alofa o le Atua ma musuia ai e ausia Ona faanaunauga aupito maualuluga mo oe!

Ua tatou i ai iinei i le Tapeneko ua taua i le talafaasolopito i le Lotoa o le Malumalu i le Aai o Sate Leki. Na amata le fauga o lenei maota maoae i le selau tausaga ae ou te lei fanau mai. Sa o se taimi na matuai taugata ai le tau o mea faufale i le Teritori o Iuta, sa leai ni auala nofoaafi e la’u mai ai sapalai, ma, tusa lava foi pe na faapea na i ai, ae sa utiuti lava tinoitupe. Peitai o i latou sa galulue i lenei maota maoae, sa tamaoaiga i ’aitia ma sa latou toe faaaogaina anomea sa maua. O nisi o laupapa sa faaaoga na toe faaaoga mai isi fale tuai na fausia. O fao ma mama manifinifi na vane mai seevae ua le aoga o povi. Ma o palusimā na seu faatasi ma fulufulu o povi ma solofanua ia malolosi ai. “Toelau’iliu,” “toefaaaoga,” ma le “toefaataamilo” o a latou faaupuga taua na ua leva ona faaaoga a’o lei avea ma vaega o la tatou muāgagana.

O le aula’iga lona lua ma le lona tolu o tamā o o’u tamāmatutua, e malaga mai Egelani, sa galulue i le fauga o faitotoa tetele o lenei Tapeneko. Pe na latou manatunatu ea i sē e tupuga mai ia te i latou, se afafine o so latou atalii, o lauga atu mai lenei nofoaga faasolopito?

Uso e ma tuagane, tou te malamalama ea i le aafiaga ua e tu atu e fai?

O le lalolagi o loo tatou ola ai ua tumu saisai i luitau. Ma o outou o se tupulaga o tamaitai ma alii na faapolopolo mo lenei taimi—o loo ia te outou le malosi, o uiga auaumama, le manao, ma le avanoa e utuvai ai mai le mana o le Atua e taulima ma foia ai na luitau. O lou outou gafatia e paia.

Ou te talitonu ia te outou. Ua faaalia e perofeta, tagatavaai, ma talifaaaliga lo latou talitonuga mautinoa ia te outou. O mea ua latou saunoa i ai, e pei lava o fetalaia e le Alii lava Ia.

Faamolemole aua tou te fiu i le sailia o auala e foia ai lavelave o le taimi lenei. Matou te manaomia outou!

Ou te malamalama i le faigofie ona maileia i mea e lē lelei, to’alia i le faifaipea o galuā o faasalalauga a le lalolagi. O le fevātaua’i i taua, o polotiki o fefinauaiga, fiapule, mala faalenatura, mafatiaga faaletagata soifua—ua matuai lofituina ai lava a’u. E te ono lagona ai lava le leai o se malosiaga e ausia ai ni vaifofo tumau.

Ma le talitonuga mautinoa, ou te tautino atu ai, i le faamanuiaina ai i le malosi ma le mana o le Atua o loo avanoa mo oe, a’o oulua osia ma tausia feagaiga ma Ia, e mafai ona e faafetaia’ia mea lē lelei ma faasusulu atu le malamalama i tulimanu uma o le pogisa.

“[O i tatou] o le malamalama o le lalolagi,” na tautino mai ai e le Faaola. Ma e “pipii atu le malamalama i le malamalama.” O le tuu atu o le malamalama o lo tatou avea ai ma soo o Iesu Keriso e susulu atu, o le ituaiga laualuga lea o le malosiaga faafouina—malosiaga mai se faapogai lea e fafagaina pea lava e le aunoa. Ou te molimau atu, o le aumaia o Lona toomaga ma le malamalama i isi, tatou te maua ai lo tatou lava toomaga ia te Ia.

O le mea lea, ia avea oe o sē e faatupuina le filemu i lou aiga, lou nuu, ma i au fegalegaleaiga i luga o upega tafa’ilagi. Faamāmā avega i mafatiaga i lou lava pitonuu.

O le manulauti a Satani ia taufaatonu i tatou i mea e fai. O le eseesega, o le fuafuaga o le fiafia a le Tama, tatou te maua ai le avanoa e galulue ai, e avea ma ē galulue mo le lelei, mo le filemu, ma mo le faamoemoe.

E mafai ona tatou faafetaia’ia faamatalaga sese e ala i le faasoa atu o faamatalaga faagaeetia, tumu i le faamoemoe, ma sa’o lelei—avea ma faufautua o le upumoni nai lo le na ona faaaoga o faamatalaga. E mafai ona tatou tali atu i faiga lē lelei e ala i le faalolovaia o le lalolagi i le malamalama ma tala e lelei o le talalelei a Iesu Keriso.

E pei ona sa fofogaina mai e lo tatou perofeta pele o Peresitene Russell M. Nelson, “O Iesu Keriso lava le tali.” “Po o a lava au fesili po o faafitauli o i ai, e maua lava le tali i le soifuaga ma aoaoga a Iesu Keriso.”

Ua valaaulia i tatou e Peresitene Nelson ia fai lo tatou avea ma Ona soo o se “faamuamua aupito maualuga.” Tatou te faalolotoina lo tatou avea ma soo pe a tatou aoao mai, ma aoao e uiga ia Iesu Keriso. Ia se’i o tatou vailiilia la aoaoga a le Faaola.

O le Mataio mataupu e 24 o loo i ai faataoto e tolu, o faataoto mulimuli ia na tusia e Mataio faapea na aoao mai e le Faaola i Lana misiona i le olaga nei. I le tapenaga o la’u lauga i le konafesi aoao talu ai nei, ma i le tapenaga mo lenei faigalotu, sa uunaia ai au e le Agaga e toefoi ma aoao mai i nei tala.

Mo o tatou faamoemoega, ou te fia faamamafa atu ai itu o le tapenaga ma le avea ma tausimea o i nei faataoto. Na valaaulia i tatou e Peresitene Nelson e fai “nei … se taimi … e sauniuni ai mo le Afio Mai Faalua o … Iesu le Keriso.” O le tausimea o le puleaina lea ma le faaeteete ma le faatuatuaina o se mea ua tuuina atu i le tausiga a se tasi. “I a tatou taumafaiga o ni tausimea, tatou te faaa’oa’o ia Iesu Keriso. O lea ia faalogologo mo lesona i le tapenaga ma le tausimea e mafai ona tatou utuvai ai mai i nei tala.

Muamua, o le faataoto i taupou e toasefulu—toalima e popoto ma le toalima o e na faamatalaina e valelea.

I le faataoto, o taupou uma e toasefulu sa i ai i le nofoaga sa’o, e faatalitali i le faatoafaiava. Sa tofu o mai i latou ma se lamepa. E faapei o outou uma. Ua outou i ai iinei, ua faaaoga lo outou faatuatua ma fauina a outou molimau.

Ina ua sau le faatoafaiava—faatusa i le Faaola—i le vaeluapo i se taimi sa le’i mafaufauina, o le toalima o taupou sa le’i lava suauu mo a latou lamepa. Atonu latou te lei mafaufau o le i ai o se suauu faasili sa taua pe alagatatau. Pe sa le o i latou foi o ni tausimea faautauta o a latou suauu sa i ai. Atonu foi sa faalavelavea, na lē lava ai ona latou tapena e faamumu pea a latou lamepa.

Ma o lea, i le tali atu i la latou augani ina ia faataga i latou e ulu atu i le tausamaaga o le faaipoipoga, na tali mai le faatoafaiava, “Tou te le iloa a’u.” Ua ta’u mai ai faapea, ona o a latou tapenaga ma le tausimea poto, na iloa e taupou popoto e toalima o Ia.

O le suauu taua, e faatusa i le liua o le tagata lava ia, na mafai ai e taupou popoto ona faamumu a latou lamepa, ma ulufale atu ai i le tausamaaga o le faaipoipoga faatasi ma le faatoafaiava. Sa le mafai ona fefaasoaai le suauu ma a latou uo, ona o le liua o le tagata lava ia e faapena—e patino. E mafai ma e tatau ona tatou tuuina i luga le malamalama o a tatou lamepa e siitia ma faamalolosia ai isi, ae o i tatou taitoatasi o se tausimea o lo tatou lava liua.

E pei ona fetalaia mai e le Faaola, “Ia faamaoni, ma tatalo i taimi uma, ma teuteu ma faamumu a oulua lamepa, ma ia i ai le suauu ia te oulua, ina ia mafai ona oulua saunia i le afio mai o le Faatoafaiavā.”

O le a faapena foi ona tatou iloa le Faaola ma maua le “talitonu mautinoa e faalatalata atu ai i le Atua i le taimi nei lava” pe a tatou saunia e faatutumu a tatou lamepa i le suauu o le liua ona tuu atu lea o le malamalama o lena liua e susulu atu. E faapei ona faaalia mai e le atavane maoae i le Lotoa o le Malumalu, e mafai ma e tatau ona tatou lagolago ma faamalolosia isi a o tatou faia—tauanau atu i isi e o mai i le malamalama—le Malamalama o le Lalolagi, o Iesu Keriso.

O le faataoto lona lua na ta’ua e Mataio o taleni. I lena tala, i le faamoemoe o le matai, e malaga mamao, na ia avatu ai i ana auauna e toatolu ni taleni. I ona po o le Feagaiga Fou, o se taleni e faatatau i tupe. Ae ou te faamoemoe o le a outou mafaufau i taleni o ni meaalofa, tomai, ma faamanuiaga e tuuina mai ia i tatou e lo tatou Tama Faalelagi. Na avatu e le matai i le tasi auauna o taleni e lima, i le tasi o taleni e lua, ma le isi e tasi. Ona alu malaga ai lea o le matai.

Ina ua toefoi mai o ia, sa ia iloa ai o auauna na ia tuu atu i ai taleni e lima ma le lua, sa avea i la’ua o ni tausimea faamaoni ma le faamanuiaina ma sa faaaogaina lelei ia taleni. Sa tofu faaluaina e i la’ua taleni na tuuina atu i ai. Ma ona o le faamaoni ai i nai mea iti, na tuu atu ai e le Matai ia i la’ua isi taleni faaopoopo ma fai atu, “Ua lelei ia, le auauna lelei e, ma le faamaoni: ua e faamaoni i nai mea iti, ou te tofia oe e pule i mea e tele: ina ulufale mai ia i le fiafia o lou Alii.”

O le eseesega, o le auauna na tuu atu i ai le taleni e tasi na alu ma nanā—atonu ai na faalavelaveina o ia ma faifaiaga ai i le faaaogaina lelei o lana taleni. Pe atonu na faaletonu ua le iloa pe faapefea ona amata pe na fefe foi nei lē manuia. Atonu foi na ia faatusatusaina o ia lava i isi auauna, ma avea ona masalosaloga i lona lava gafatia na taofia ai o ia mai le taumafai. Sa lei saunia o ia mo le toefoi mai o le matai, na te le’i oo i le olioli o le tausimea faamaoni, ma na te le’i toe maua ai lana taleni.

O le faataoto i taupou e toasefulu ma le faataoto i taleni o vasega tutusa lelei lava. E taufai faamamafa mai ai o loo i ai so tatou tiutetauave patino mo lo tatou lava liua ma e tatau ona saunia i tatou lava e maua le meaalofa a le Alii o le faaeaga—ma e tatou te tali atu o ni tausimea ma le tagata lava ia mo mea ua faamanuiaina ai i tatou.

Ma le mea mulimuli, o loo faamatala i le Mataio 25 le tala ia i latou o e ua i ai le “talitonu mautinoa i luma o le Atua.” Ua faamatalaina o mamoe a le Leoleo Mamoe Lelei, e nonofo i Lona itu taumatau, e olioli i le tausamaaga o le faaipoipoga faatasi ma Ia, ma faamanuiaina e avea ma pule i mea e tele, na Ia fetalai ai:

“Na ou [fia’ai], ona outou avane ai lea ni meaai ou te ‘ai ai: Sa ou fiainu, ma outou avane vai ou te inu ai: sa avea a’u o se tagata ese, ma sa [outou] talia lea o a’u: [na ou] le lavalavā, ona [outou] faaofuina lea o a’u: na ou ma’i, ona [outou] asiasia lea o a’u: na ou i le falepuipui, ona [outou] o ane lea ia te a’u.”

O loo matagofie le faaalia i lenei vitio.

[vitio (soaulutala)]

“Na faaali mai e Iesu ia i tatou le ala tatou te alolofa ai i o tatou tuaoi. Tatou te mulimuli i Ana faataitaiga pe a [tatou siitia] e vaivai [,] faafailele fanau [,] faamafanafana ia i latou o loo siomia i tatou[,] fafaga e fia aai[,] saili i latou e le tagolima. O aso uma lava o se avanoa e avea ai e faapei o Ia[,] auauna atu e pei o Ia[,] tausiga e pei o Ia. O le tausia i aso taitasi e amata ia te oe. Asiasi i le CaringSummary.ChurchofJesusChrist.org.”

[End video]

O le mea lena ua poloaiina ai i tatou. I le avea ai ma Ona soo, tatou te saunia i tatou lava mo Lona Afio Mai Faalua ma tatou te faaalia ai ma le faamaoni ma faamanuiaina lo tatou tausimea i mea ua faamanuiaina ai i tatou. O le tausimea agaalofa, alofa mama, amio mama, ma le faamaoni tatou te agavaa ai e ola faatasi ma Ia ma maua le talitonu mautinoa i luma o le Atua i le taimi nei lava. E pei ona aoao mai Mamona, o i latou e tumu i le alofa mama—le alofa mama a’ia’i o Keriso—”o le a lelei mo i [latou]” i le aso mulimuli. O le a avea i latou e faapei o le Faaola, vaai ia te Ia e pei ona i ai o Ia ma ua faatumulia i le faamoemoe ma faamamaina e faapei ona mama o Ia. Na tautino mai e Peresitene Nelson, “O le alofa mama ma le amio mama e tatala ai le ala e maua ai le talitonu mautinoa i luma o le Atua.”

O faataoto uma nei e tolu ua aoao mai ai le ala e tatau ai e Ona soo—auala tatou te—tapena ai mo taimi matautia e muamua mai i le Afio Mai Faalua o le Faaola. O taimi nei o loo tatou ola ai! E ao ona tatou faatumauina le malamalama o le mumu o lamepa o lo tatou liua, tuu atu lo tatou malamalama e susulu atu, faaaoga ai ma faatele a tatou taleni, tausi i latou e moomia le fesoasoani—o lona uiga, ua faatumulia i le alofa mama, le alofa mama o Keriso.

O nei faataoto uma e tolu o loo aoao mai ai i tatou e uiga i le tausimea:

Tausimea mo lo tatou lava liua.

Tausimea o meaalofa, taleni, aseta, ma fesoasoaniga ua faamanuiaina ai i tatou, e aofia ai le fogaeleele lava ia.

Tausimea mo o tatou tuaoi o ē fiaaai, leai ni mea e nonofo ai, o ē o tiga, ma vaivai.

I le avea ai ma soo o Iesu Keriso, e faapefea ona tatou faata’ita’ia le tausimea lelei?

Atonu e aoga ni talanoaga e sili atu ona maioio e uiga i le tausimea. Se’i o tatou muai faauigaina le tausimea. Ma o le a le tausimea?

O se tausimea e pulea aseta o se aiga toatele po o se esetete. O le tausimea e le o ia e ona aseta, ae ua faatuatuaina e pulea na mea e fai ma sui o lē ona ia. O se tausimea faamanuiaina e faamaoni i lē ona aseta, tausia ma le poto ma le agalelei ia punaoa. O le tausimea la, o le pulea ma le faatuatuaina o na mea ua tuuina mai i la latou tausiga.

Na aoao mai e Epikopo Gérald Caussé o le Au Epikopo Pulefaamalumalu, le uiga o le avea ma tausimea faalelalolagi. Na ia saunoa, “I faaupuga faaletalalelei, o le upu tausimea e faama’oti mai ai se tiutetauave paia faaleagaga pe faaletino e tausia se mea e ō le Atua lea tatou te tali atu ai.”

Mafaufau i le ofoofogia o lenei manatu! O i tatou o tausimea o aseta ua tuuina mai e lo tatou Tama i le Lagi ia i tatou. O lona uiga, o se faatuatuaga paia mo le lalolagi; o ona punaoa, o Ana fanau, o a tatou meaalofa, taleni, ma faamanuiaga. Ma o se tiutetauave paia le taulima ma le faaeteete o Ana aseta.

Mo le ā, pe mo ai ua e tausimea ai?

O le mea moni o foafoaga uma a le Atua i lenei lalolagi. O oe o le tausimea o lou lava tino ma le mafaufau. O oe o le tausimea mo tomai, taleni, meaalofa faaleagaga, ma le fesoasoani ua faamanuiaina ai oe. O oe o le tausimea mo le fogaeleele. Ma o oe foi o le tausimea mo le tasi ma le isi.

Na faamatala mai e Epikopo Caussé: “O lo tatou tiutetauave o ni tausimea i foafoaga a le Atua … e aofia ai, i lona faatumutumuga, se tiute paia e alofa ai, faaaloalo, ma tausia tagata soifua uma o loo tatou fefaasoaai i le lalolagi. O i latou o atalii ma afafine o le Atua, o o tatou tuafafine ma o tatou uso, ma o lo latou fiafia e faavavau o le faamoemoega tonu lea o le galuega o le foafoaga.”

Pe o le a avea ea oe ma se tausimea faamanuiaina? O lona uiga, pe o le a e tausia ea ma le poto ma le agalelei foafoaga a le Atua?

Ou te manao e faamanino la tatou tulimataiga i le tausimea mo meaalofa ma taleni ua faamanuiaina ai i tatou, lo tatou tausimea mo le lalolagi, ma le tausimea mo o tatou tuaoi. Manatua, o le tausimea amiotonu o le faamaoniga lea o lo tatou avea ai ma soo.

Muamua, tausimea mo a tatou meaalofa ma taleni.

Mai le Mataupu Faavae ma Feagaiga 46:11–12 ua tatou aoao ai lenei upumoni:

“Aua ua lē tuuina atu i tagata uma meaalofa uma; ona e tele meaalofa, ma e tuu atu e le Agaga o le Atua i tagata taitoatasi se meaalofa.

“I ni isi ua tuuina mai i ai se tasi, ma i isi ua tuuina atu i ai se isi, ina ia mafai ona manuia ai o tagata uma.”

O a tatou meaalofa faaleagaga o gafatia ia na tuuina mai e le Atua ia i tatou taitoatasi. Ua tuuina mai e tusa ai ma Lona finagalo ma Lona taimi, e ala i le mana o le Agaga Paia, ma ua faamoemoeina mo le manuia ma le aoga i fanau uma a le Atua.

O tausimea faamaoni e sailia ma valaaulia meaalofa faaleagaga i o latou olaga ma faaaoga na meaalofa ua faamanuiaina ai i latou e siitia ai ma auauna atu i isi. O outou taitoatasi, o fanau a le Atua, ua tuuina atu i ai meaalofa ma taleni faapitoa.

Na faamatala e Elder Marvin J. Ashton,o se sui o le Korama a Aposetolo e Toasefululua, ni meaalofa eseese e faalē iloa, o uiga faaleatua, ma tomai atonu tou te le o faitaulia. A o ou lisiina atu, se’i e tomanatu ifo oe lava ma saili e faailoa se tasi pe lua ua faamanuiaina ai oe? Ona, mafaufau lea i le i ai o lena meaalofa, pe o le a faapefea ona e faaaogaina o se tausimea faamaoni e faamanuia ai isi.

“O le meaalofa o le ole atu; o le meaalofa o le faalogologo; o le meaalofa o le faalogo ma faaaoga le leo itiiti ma le filemu; o le meaalofa o le mafai ona tagi; o le meaalofa o le aloese i finauga; o le meaalofa o le lotogatasi; o le meaalofa o le aloese i le tautu i upu; o le meaalofa o le saili o le mea sa’o; o le meaalofa o le le faamasino atu; o le meaalofa o le vaai i le Atua mo le taitaiga; o le meaalofa o le avea ma se soo; [o le meaalofa o le toamalie;] o le meaalofa o le manatu alofa i isi; o le meaalofa o le mafai ona mafaufau loloto; o le meaalofa o le faia o tatalo; o le meaalofa o le tuuina atu o se molimau malosi; ma le meaalofa o le maua o le Agaga Paia.”

A o faaauau pea ona e mafaufau i au meaalofa, pe mafai ona ou ofoina atu se lapataiga? Aua e te faatusatusa pe fuafaatatau au meaalofa i meaalofa a isi. Aua ne’i e faia le “tuumaualaloina o le iloiloina o oe lava.” “O le faatusatusa o le faomea o le olioli.” Talia atoatoa au meaalofa ma patipatia meaalofa ua maua e isi. Manatua, o meaalofa faaleagaga e tuuina mai e le Atua e ala i le Agaga mo le faamoemoe e faamanuiaina ai tagata uma .

O si o’u tinamatua pele, o se faiaoga Igilisi ma na te filifilia ma le faaeteete ana upu. Sa fiafia lava o ia e fai mai, “O le faatusatusa o tagata o se mea inosia.” Inosia o se upu malosi tele. O lona uiga e “mataga ma maualuga le faatausuai.” Aisea na faaaoga ai e lo’u tinamatua sea upu malosi pe a talanoa mai ia te a’u e uiga i le matautia o le faia o ni faatusatusaga? Ona o le faatusatusa o i tatou lava i isi, e seāseā lava aoga. O le faatusatusa o i tatou lava i isi, tatou te faaesea ai i tatou lava mai ia i latou. Nai lo le lagonaina o se itutino o le tino atoa o Keriso, ou te tauaveina le matafaioi a se tamatamailima, ma fua lo’u taua i se tasi ou te manatu o tau’au, ogalima, ma le fatafata. E masani, a tatou faatusatusa i tatou lava i isi, tatou te lagona a lē o le tuumaualaloina po o le faasausili, ae e le faapena. O i tatou uma o fanau faapelepele a ni matua faalelagi, ua faamanuiaina i se afifi patino o meaalofa faaleagaga, uiga auaumama, taleni, ma malosiaga.

O lea ou te valaaulia ai outou ia atia’e le meaalofa o le lafoa’i o le faatusatusa. Ole atu i le Tama Faalelagi e fesoasoani ia te oe ia e iloa au meaalofa faaleagaga ma taleni, ma pe mafai faapefea ona e faaaogaina o se tausimea faamaoni.

O se faataitaiga lenei.

I nai tausaga ua mavae, sa mafaufau loloto ai Jean, o se talavou matua i Netalani, i le poloaiga na uluai tuuina atu ia Atamu ma Eva e fanafanau ma faatumu le lalolagi. A o feagai i la’ua ma lana tane ma le le mafai ona maua ni fanau, sa la saili ia malamalama pe faapefea la ona faatatau lena poloaiga ia i la’ua. Sa ia iloaina faapea, i le taimi na le’i i ai se fanau a Atamu ma Eva, sa la galulue ma atinae le faatoaga lea na tuu atu ia i la’ua e le Atua e fai ma tausimea. A o mafaufau o ia i ona tulaga, sa mafaufau o ia e uiga i faatoaga lea sa nofo ai—le faatoaga o le fogaeleele, le faatoaga o lona atunuu, le faatoaga o lona aiga, ma le faatoaga o lana uarota.

Sa ia iloaina ai e ui ina sa le’i nofo o ia i le Faatoaga o Etena, ae o faatoaga nei na tuuina i ai o ia e le Alii. E mafai ona ia saili e faatoatele ma faalauolaola mea ua Ia tuuina atu ia te ia e tausimea ai. Sa manatunatu loloto Jean:

• “E mafai faapefea ona ou faateleina meaalofa ua tuuina mai e le Alii ia te au ma isi?

• E mafai faapefea ona ou faateleina le alofa atu i fanau a le Atua?

• E mafai faapefea ona ou faateleina lo’u taimi ma taumafaiga e auauna atu ai i isi?

• E mafai faapefea ona ou faatumu la’u lava vaieli faaleagaga?

• E mafai faapefea ona ou faatumu mea ua toese a isi, pe faaletino pe faaleagaga?

• E mafai faapefea ona ou faatumuina le faamoemoe ma le faatuatua e foliga mai ua toesea mo le toatele i le lalolagi?”

A o taulai Jean i na fesili, sa faamanuiaina o ia e iloa avanoa e faateleina ai ma faatumuina e faaaoga ai ana meaalofa ma taleni. Sa ia aoao atu atafaatino i tagata talavou mai le salafa o le lalolagi. Sa auauna atu o ia i tamaitai talavou. Sa ia faaaoga le fetuutuunai i lona lava olaga faapolofesa e fesoasoani ai e vaai fanau a ana uo. Sa tele atu se taimi na ia faaaluina e suesue ai le talalelei ma lagonaina ai le faamanuiaina ia malamalama lelei atu i auala e tauave ai avega a isi ma faamafanafana i latou e moomia le faamafanafanaga. O lena mea na faateleina ai lana molimau ma le faatuatua ia Iesu Keriso ma Lana talalelei. O le mea e sili ona taua, sa ia maua se malamalama patino i le fuafuaga a le Atua mo ia.

O tausimea lelei e faateleina ma faatumuina i taimi uma aseta a le Matai.

E ui e le o se auala lea sa ia muai manatu ai, ae o le aafiaga a Jean o se faamaoniga matagofie lea o se folafolaga mai le perofeta o Ieremia, o lē na fai mai:

“Amuia le tagata o lē faatuatua ia Ieova, o le ua fai Ieova ma ona faatuatuaga.

“Aua o ia e faapei o le laau ua toto i tafatafa ane o le vai, ua sosolo atu ona a’a i tafatafa ane o le vaitafe. Na te le iloa foi pe a oo mai le vevela; ae lauolaola ona lau. E le atuatuvale i tausaga o le lamala, e fua mai pea lava ona fua.”

Lua, o le tausimea mo le fogaeleele ma mo fanau uma a le Atua.

Na aoao mai Peresitene Russell M. Nelson: “I le avea ai ma e mauaina le Foafoaga paia, o le a se mea tatou te faia? E tatau ona tatou tausia le lalolagi, ia avea ma ni tausimea atamamai, ma faasaoina mo tupulaga o le lumanai.”

Ua ou iloa o se autu lenei e amanaia loloto e la outou tupulaga. Ua outou tauaveina se naunautaiga tele, ma o nisi o outou o feagai ma sina popolega. Se’i ou faamautinoa atu ia te outou, ua saunia e le Atua se ala, mo le ola maloloina o tagata uma i lenei paneta, pe afai tatou te loto e faaaoga a tatou meaalofa ma taleni mo lenei mea lelei, tumau le agavaa ia maua faaaliga, ma faaaoga ma le faautauta le anoanoai o punaoa o le fogaeleele e tausi ai e le tasi le isi.

Na fetalai le Alii:

“Ou te … tosoina le lagi, ma fausia le lalolagi, o au galuega-taulima lava; o mea uma ua i ai i totonu e a a’u ia.

“Aua ua tumu le lalolagi, ma ua lava ma totoe mea o i ai; ioe, na Ou saunia mea uma, ma ua tuu atu i le fanauga a tagata ia avea ma pule ia te i latou lava.”

O le a faapefea ona e faaaogaina le faitalia ua faamanuiaina ai oe, o lau tausimea, mo le faamanuiaina mamalu o le fogaeleele?

Ua faamanino mai e le Alii i le isi fuaiupu e faapea, e tatau ona tatou “ave le tele o mea [ua Ia] faia, tuu atu la tatou vaega, e tusa ai ma le tulafono o [Lana] talalelei i e matitiva, ma e ua le tagolima.” Ua lava ma totoe mea o i ai pe afai tatou te fefaasoaai le tele o faamanuiaga ma faaaoga lo tatou faitalia o ni tausimea faaKeriso o le lalolagi.

Tatou toe foi i le upusii mai ia Peresitene Nelson e uiga i lo tatou tausimea mo le lalolagi. Na ia saunoa, “I le avea ai ma e mauaina le Foafoaga paia, o le a se mea tatou te faia? E tatau ona tatou tausia le lalolagi, ia avea ma ni tausimea atamamai i ai, ma faasaoina mo tupulaga o le lumanai.”

Ona faaauau lea o Peresitene Nelson, ”Ma e tatau ona tatou alolofa ma fetausiai le tasi ma le isi.”

E taua lo tatou iloaina o le sootaga i le va o le tausiga o le fogaeleele ma le tausiga o o tatou tuaoi. I le tausiga o le fogaeleele, o le faamatagofieina o lo tatou siosiomaga i le lotoifale, ma fesoasoani i o tatou nuu ia atili mafai ona lagolago i latou, o loo tatou galulue o ni tausimea popoto o le lalolagi ia manuia ai olaga o o tatou tuaoi. O i latou ia na poloaiina i tatou e alolofa i ai. Faapei o mamoe i le faataoto, tatou te fafaga i e fiaai, faafeinu i e fiafeinu, faaoofu e ua le lavalavā, ma asiasi i e mama’i ma e vaivai. Tatou te “fesoasoani i e vaivai, sii i luga lima ua tautau i lalo, ma faamalosi tulivae ua vaivai.”

O loo faia e o outou uso ma tuagane i le lalolagi atoa lenei mea. Na ola a’e Eritai i se motu taumamao o Marakei, Kiripati. I lona toe taliu mai lana misiona, sa a’oga o ia i le BYU–Hawaii, lea na ia aofia ai i le SWAT, o le vaega Sustainable World Action Technology, ma aoao ai e uiga i togalaau e totō i le vai, o se faiga e totō ai laau e le faaaoga ai se palapala ae faaaoga niuterene o minerale i le vai. Ina ua faauu o ia, sa toefoi Eritai i Kiripati e fesoasoani i ona lava tagata.

O Kiripati o se atunuu e aofia ai ni atumotu e 32 e foliga i se mama ’amu’amu, ma atuvai e lotolotoi ai, e faaigoa o motuiti, ma se motu e atia’e i ’amu’amu. Ona o lona taatiaga i luga o le ekueta, e matuiā lava tulaga o le tau. O savili vevela ma le samia, ma āuga o tafega o le sami e faatama’ia ai laau totō ma faatauma’oia ai le vai. E leai la se palapala ma se avanoa e totō ai ni meaai maloloina. Ua taatele le le lava o meaai maloloina ma faama’i mo tagatanuu o Kiripati ona sa tele ina latou faalagolago i meaai gaosi ma meaai mai fafo.

Ae sa i ai ia Eritai le malosi ma se vaaiga mamao, ma taleni lea na ia utuvai ai e fatuina se polokalama e mafai ona lagolagoina ai, e aoao ai aiga i le lotoifale o Kiripati i le auala e totō ai fualaau ’aina suamalie ma fualaau faisua e faaaoga ai le vai. O togalaau e faaaoga ai le vai e mafai ona feavea’i, e tausia ia lava, ma vave ona ola ma fua mai i le 30 aso.

Mo lana galuega faama’ite ma faasoina ai le ola, sa maua e Eritai se taui o le Siamupini o Malo Aufaatasi o le Fogaeleele mo le Pasefika Asia.

O Eritai o se faataitaiga matagofie tele o le faaaogaina lelei o meaalofa ma taleni i lana tausimea o le fogaeleele ma ona tuaoi. O le fafagaina o e fiaaai, e faitaulia ai i tatou faatasi ma mamoe i le lima taumatau o le Atua.

Ma e tatau ona tatou avatu vai i e fiafeinu. O le faamanuiaina o o tatou tuaoi i le faafaigofie ona maua o vai mama, tumama, ma le soifua manuia e taua i le faalauolaolaina o le tagata soifua. Ina ia ausia lenei galuega, ua galulue faatasi ai le Ekalesia ma isi faalapotopotoga ma nuu i le lotoifale i le salafa o le lalolagi e faaleleia atili le faaaogaina o nei auaunaga ma faamalosia ai polokalama aoao, ia mautinoa o fofō e umi ona tumau ma e faalauiloa ai le ola tutoatasi. E taua lenei galuega! Ma ua matua faateleina le taua a o sosolo lamala i le lalolagi ma faaauau le faateleina o le faitau aofai o tagata.

Na fesili ifo Alexandra, o se talavou matua i Cascas, Peru ia te ia lava, “O a mea tatou te le o faia iinei?” Sa iloa e Alexandra e faapea a itiiti o le 20 pasene o aiga i lona nuu e le o maua ni auaunaga saogalemu mo le tumama, ma ua atili ai ona faateleina le lamatia i faama’i e afua ona o le vai e pei o le kolela. Ina ia faailoa lenei luitau, sa auai Alexandra i se aoaoga faamasani mo pisinisi o le tumama sa faia e le vaega a le Water for People i Peru.

Sa ia amataina se pisinisi ma faaoloaina lana faleoloa laitiiti i mea pei o faatanoa, gutu paipa, faleleta’ua, maafola, ma isi mea e manaomia e aiga e faamae’a ai o latou faletaele. O le taimi nei ua mafai ona maua e aiga i Cascas anomea latou te moomia e fau ai faletaele o aiga.

E mafai foi, ona e faailoa vai mama ma mea e manaomia mo le tumama i lou nuu ma le ala e mafai ona e aofia ai.

E ioe le perofeta o Isaia i lana uo i na ona po o Ieremia ina ua ia ta’u mai ia i tatou:

“Afai foi e te alofa atu i le ua fia’ai, ma e fafaga ia ma’ona o le ua tiga; ona alu ae lea o lou malamalama i le pouliuli. …

“E taitaiina foi oe e le aunoa e Ieova; e faamalie foi o ia ia te oe pe a oge vai, … e avea foi oe e pei se fanua ua faasūsūina, e pei o le punavai foi e le mate ona suavai.”

E moni, o Iesu Keriso o le faapogai o vai ola uma. Ou te molimau atu a tatou faainu i e fiafeinu, e faamanuiaina i tatou e feinu i le vai ola —“o se vaieli o le vai e puna a’e i le ola e faavavau.” A o tatou tausia le fogaeleele ma o tatou tuaoi, tatou te latalata atili i le Faaola ma mananao i se sootaga faalefeagaiga ma Ia lea e mafai ai ona tatou avea atili e faapei o Ia. O le a avea i tatou ma tausimea faautauta—ma o ni tausimea fiafia foi. O le a faafouina i tatou ma sii ae apaau e faapei o aeto ae le vaivai.

I le tausaga na te’a nei, na faasilasila mai ai e le Au Peresitene Aoao o le Aualofa le faalauteleina o se faama’ite i le lalolagi atoa e faaleleia atili le soifua maloloina ma le soifua manuia o tamaitai ma tamaiti. I le talosaga mai le Au Peresitene Sili, o loo ta’ita’ia e le Aualofa lenei taumafaiga.

Matou te mananao e faamanaina tamaitai ma aiga i se malamalama ma punaoa sili atu, ina ia sili atu ai lo latou faaauupegaina e faia suiga e mafai ona i ai aafiaga tumau i o latou aiga, nuu, ma malo. A oo ina faamanaina se tamaitai ona e soifua maloloina o ia ma aoaoina, e faamanuiaina aiga, e siitia nuu, ma faamalolosia malo. A e faamanuiaina se tamaitiiti, ua e teu faaagaagaina mo le lumanai. O le mea lea e taulai la tatou galuega i meaai paleni mo tamaiti e i lalo o le lima tausaga, tausiga o failele ma pepe faatoa fananau mai, tui puipui, ma aoaoga.

O Alaina o se talavou matua e nofo i Georgia, ISA. O loo tulimatagauina sona faailoga faafomai i le tausiga faalefaigaluega ma sana sini e faigaluega i se falemai i le vaega mo pepe faatoa fananau mai e tigaina (NICU) mo pepe e moomia se tausiga faaopoopo pe a fananau mai, aemaise i latou e fananau lē āu. Na malosi se aafiaga o Alaina i le faama’ite a le Aualofa i le lalolagi atoa mo tamaitai ma tamaiti. I le musuia ai e le valaaulia e auai i le faama’ite i le lalolagi atoa, ua faia ai nei e Alaina le “tausiga faaKagalū” po o le pa’u i le pa’u, mo pepe e fananau lē āu, o le mataupu lea o lana poloketi taualuga o lona faauuga.

Ua toeitiiti atoa le 15 miliona o pepe e fananau lē āu i tausaga taitasi i le lalolagi atoa. Ma i Atalana, Georgia, i le mea e nofo ai Alaina, o le aofaiga o e fananau lē āu, ma le aofaiga o pepe maliliu e maualuluga atu nai lo le averesi lautele o le Iunaite Setete.

O loo fatuina e Alaina se polokalama faaleaoaoga ina ia atili silafia ai e tagata le aoga o le fesootaiga o le pa’u i le pa’u, i le va o pepe fananau lē āu ma o latou tina. O pepe, e fai na o o latou napekini, e tuu sa’o lava i luga o le pa’u o le tina i luga o lona fatafata, ona tuu lea o se ie e ufiufi ai luga o i la’ua uma. O lea sootaga e tausisia ai le mafanafana, tuuitiitia ai le popole, e faasolosolo ai mone, faateleina ai le sootaga, siitia ai le faasusuina, faaleleia ai le moe, ma le tele o isi aoga. Ae e le faaaogaina i taimi uma i NICU o se tausiga laugatasia. O le poloketi a Alaina ua faamoemoe e faaleleia ai le faaaogaina.

O lana suesuega sa lagona le faaleagaga tele ia te ia. “O le faitauina o le saienisi … ma le … aoaoina o o tatou tino na foafoaina e faia nei mea” na agatonu ia te ia ona o mea ua ia iloa e uiga i le ata o le faaolataga.

O le tausiga o le pa’u i le pa’u mo pepe fanau lē āu e faapitoa lona taua ia te a’u, ona sa i ai se atalii a lo’u atalii na fanau ia Fepuari, toetoe atoa le fitu vaiaso na vave ai. I le na o le tolu pauna lima aunese, sa toetoe atoa le masina o i ai si a matou toa laitiiti i le NICU. Ma o aso taitasi o na aso, sa tuu ai e le toalua o lo’u atalii ma lo’u atalii o ia i luga o o la’ua fatafata, pa’u i le pa’u. Tou te iloa la, o le “tausiga faakagalū” e mo tamā foi. O le natura faapopolevale o le fanau faafuasei mai o le atalii a lo ma atalii, ma le tiga i le tuueseeseina na o faatasi ma le tuua o ia i le falemai, sa faanāina i na taimi.

Ua tuu e Alaina le malamalama o lona liua e susulu atu; ua ia faaaogaina taleni ua faamanuiaina ai o ia, ma ua ia tausia i latou o e moomia e ala i le suesue ma le faatupulaia o le silafia i lenei faiga taua. O ana taumafaiga ua tali atu ai i le valaau a le Faaola—“Sa ou ma’i ona ou tou asiasi mai ai lea ia te a’u.”

O Eritai, Alexandara, ma Alaina o soo o Iesu Keriso o loo tapenaina i latou lava mo Lona Afio Mai Faalua a o latou faaaogaina ma le faamaoni ma le aoga lelei le tausimea i mea ua faamanuiaina ai i latou e le Alii.

Na fetalai le Faaola, “Aua na faia e outou i le tasi o e aupito itiiti o o’u uso nei, o a’u lea na outou faia i ai.” E moni lava o nei talavou matutua o ni sui lava o i latou ua faamatalaina e le Faaola o Ana mamoe, o ē o le a i ai i Lona itu taumatau, ua agavaa e olioli i Ona luma.

O i tatou o ni o o se ekalesia e faia mea lelei ofoofogia i le lalolagi atoa, e faamanuia ai olaga o o tatou tuaoi, ae le na o o tatou tagata auai. I le 2024, sa 6.6 miliona itula na ofofua atu. E 1.45 piliona tala Amerika i tupe faaalu. E 192 atunuu ma teritori na auauna atu i ai. O le faama’ite o galuega alofa fesoasoani a le Ekalesia i le lalolagi atoa na aofia ai vai mama, o poloketi faamamā ma mea mo le tumamā, o toomaga mo faalavelave faafuasei, tausiga faasoifua maloloina, ma poloketi mo le saogalemu o taumafa. Ua faasusulu atu e Le Ekalesia a Iesu Keriso o le Au Paia o Aso e Gata Ai ma ona tagata lo latou malamalama e faamamaluina ai lo tatou Tama o i le Lagi.

E ui ina mafai e le Ekalesia ma le Aualofa ma o le a faaaoga lo latou aapa atu i le lalolagi e fuaina ai taumafaiga musuia e fafaga ai e fiaaai, faafeinu e fia feinu, faaoofu e ua le lavalavā, ma tausia e mama’i, ae o le galuega e aupito sili ona taua ma sili ona aafia ai, e faaauau pea ona faia ta’itasitasi.

I le taumafai ai e faaa’oa’o ia Iesu Keriso, tatou te saili ia vave ona iloa manaoga o i latou o siomia i tatou ma tali atu i ai ma le alofa. Tatou te tauivi ia avea o ni tausimea faamaoni i Ana aseta—lea e aofia ai taleni ma avanoa e faamanuiaina ai i tatou, le fogaeleele i lona matagofie atoa, ma tagata i lo tatou lalolagi o tosinaga.

Faapei o Naamanu mai le Feagaiga Tuai, atonu o loo e faatalitali sei ta’u atu “se mea maoae” e fai—taumafaufau pe o le a faapefea ona e oo i lena vaega maotua o Aferika po o se motu i le sami e tausia lou tuaoi faalelalolagi.

Uso e ma tuagane, ou te valaaulia outou e faaaoga a outou meaalofa ma taleni e faia ai ni nai mea iti ma faigofie i le siomaga o lau tausimea. Po o fea lava e te nofo ai, o loo i ai lava tamaiti fiaaai. Po o fea lava e te nofo ai, o loo i ai lava tagata e le mafai ona faitau. Po o fea lava e te nofo ai, o loo i ai lava papupuni i le tausiga o le soifua maloloina. Po o fea lava e te nofo ai, o loo i ai lava i latou e fiaaai, fiafeinu, le lavalavā, mama’i, ma i le falepuipui, moni lava pe faafaatusa foi.

Uo e, matou te manaomia outou! Ou te faamoemoe o le a e sailia ma le naunautai ni faaaliga ma faaaoga au meaalofa ma taleni e sue ai ni vaifofo fatufatuai e fesoasoani ai e faamanuia ai le lumanai o fanau uma a le Atua. O se vaega moni lenei o lau tausimea paia.

[vitio (soaulutala)]

“E vatele le atulaulau. E faitau tiliona aniva ma le piliona o fetu, laueleele, vai, laau, ma meaola. Ae … e silafia ma alofa le Atua i Ana foafoaga uma e ala i o latou igoa. E aofia ai ma oe.”

[End video]

Ou te faaiu atu i se tala patino, o se tasi e uiga i la’u uo pele o Lydia, o le na tuuina atu le tatalo amata i lenei afiafi. Na ma masani ma Litia ina o galue o ia i le Maota o le Aualofa o se faifeautalai mo auaunaga mo le tele o tausaga ua mavae. E ofu lanu viole lava Litia i aso uma ona o le tamaitai sa faamatalaina e faapea o le uluai tagata liliu mai a Paulo o Litia, sa ia faatauina atu ie lanu viole.

Sa maua Litia i le ma’i gugu ina ua faatoa fa ona tausaga. Ma a o mafatia o ia i le tiga i aso uma, na te faasusulu atu ma le fiafia le malamalama o lona liua ia Iesu Keriso. Afai o i ai nisi mea e mama, matagofie, pe logoleleia pe tauleleia—o ia lava o na mea uma!

E avea o se vaega o lenei tofiga e lauga atu ia te outou uma, sa valaaulia a’u e filifili na tagata o le a tatalo i le po nei. Na vave lava ona oo mai Litia i lo’u mafaufau. Sa ia faamae’aina lana misiona, amata lana aoga i le BYU, ma sa taliaina o ia i le Kolisi o Tausisoifua. Ma ona o ia o sa’u uo pele, ma te fesootai ai pea lava pea. Ou te alofa ia Litia.

O lo’u galuega o le talosagaina lea o ia e tatalo, ae ou te le’i vilia lava o ia. Ona oo lea i le aso 31 o Mati, sa ou maua ai le feau tusitusia lenei mai ia Litia:

“Taeao Manuia Peresitene Johnson!!!

“Ou te alofa tele ia te oe!

“O anapo na ou miti ai ia te oe. Sa ou matuai gatete lava ma popolevale e uiga i se mea sa tatau ona ou faia, ma sa e matauina. Na e opoina a’u ma toso [faalatalata] atu a’u ia te oe ao punou lou ulu i autafa o lo’u ulu ma musumusu mai i lo’u taliga, ‘E le afaina, Litia[;] e mafai ona e faia. Tau lava ina fai mea iti.’ O lau faamalosiau agamalu ma se faamanatu e fai lea la’a ma lea la’a o le mea tonu lava lena na ou moomia ona faalogo ai i le asō. Ma, oka so’u manaomia o se opo mai ia Peresitene Johnson! Ou te manatu e auina mai e le Tama Faalelagi ia i tatou ni nai feau iti i nisi o taimi e ala mai i tagata tatou te alolofa i ai ma talitonuina e pei o oe.

“Ou te faamoemoe e te lagona le sapasapaia o oe e agelu i lenei vaiaso. O se opo lapo’a lenei mo oe le uo pele.”

Sa ou toe tesi atu i ai, “Ua faigata ona ou faatali e ta’u atu ia te oe le mafuaaga na e faia ai lena miti!”

Sa ou vili ia Litia i lena afiafi pe manao e tatalo i lenei faigalotu i le lalolagi atoa mo talavou matutua. Ioe, sa ia fai mai ioe—ma ia faamatala mai ai le mea na te le’i faasoa mai i lana feau tusitusia. O se faamatalaga na ia manatu e le taua pe a ia tusi mai ai. I lana miti, sa popole o ia e uiga i le tatalo i luma o se aofia toatele.

Oka, se mutimutivale o le alofa o le Alii! Sa faatuatuai ona ou fai ia Litia e tatalo ma e leai lava se mafuaaga lelei—vagana ai na manaomia ona fai e Litia lana miti O se faamautinoaga e silafia e le Alii o ia ma sa manao ia ona maua lenei avanoa.

Ioe, e lautele le atulaulau. E faitau tiliona aniva. Ma le piliona o fetu. Laueleele, vai, laau, meaola ua tuuina mai e Ia tatou te tausimea ai. Ma e silafia e le Atua ana foafoaga uma i o latou igoa ma alofa i ai. E aofia ai ma oe.

Na folasia mai e le Faaola Lana misiona i le olaga nei i le fetalai mai e faapea, na auina mai o Ia “e folafola le tala lelei i e matitiva; … ia faamalolo i e loto momomo, e tala’i le saolotoga i le tafeaga, ma ia pupula mata o e tauaso, e tuu saoloto i e ua faasauaina.” Afai o Lana misiona lena, ma o i tatou o Ona soo, ua tatou faasoa i Lona faamoemoega.

Outou, a’u uo e, ua tulagaese lo outou saunia ma ua muai faauuina e fesoasoani ia te Ia. O outou o atalii ma afafine o le Atua. Na te silafia outou. Ua outou i ai i se sootaga faalefeagaiga ma Ia. O le a outou le faamutaina lava Lona onosai mutimutivale mo outou. Ma a o outou tausia feagaiga na outou osia ma Ia, o le a faamanuiaina outou i “Lona mana faamalolo, faamalosi.” O le mana o le Atua o le a faalauteleina ai o outou gafatia, faateleina ai taleni ua faamanuiaina ai outou, ma fesoasoani ia outou iloa atu o Ia i e fiaaai, o e fiafeinu, ma e taase, ma e mama’i.

I le avea ai ma ona soo, ia tatou saunia i tatou lava mo Lona Afio Mai Faalua e ala i le faaaogaina lelei ma le faamaoni o lo tatou tausimea i mea ua ia faamanuiaina ai i tatou. Ou te molimau atu a o outou avatua le toomaga o Iesu Keriso i isi, o le a faamanuiaina outou e iloa lou lava toomaga ia te Ia.

Ua ou mautinoa o loo soifua Iesu Keriso. O loo Ia taitaia Lana Ekalesia e ala i perofeta, tagatavaai, ma talifaaaliga soifua. Ua ou mautinoa o Russell M. Nelson o Lona fofoga taumomoli malosi lea i le lalolagi i le taimi nei.

O le galuega ma le mamalu o lo tatou Tama o i le Lagi ma Iesu Keriso o le tagai lea ua tatou foi atu i le aiga, ua saunia ma agavaa e tutumau i lo La’ua afioaga i le mea e leai se e fiaai, fiainu, taase, ma’i pe pipili—aua o le a faamaloloina i latou ma faaatoatoaina. O outou o a la’ua paaga taua. Ou te alofa ia te outou. E alolofa i La’ua ia te outou.

I le suafa paia o lo tatou Togiola, o Iesu Keriso, amene.